Ҳамовозӣ ба Паёми Президенти мамлакат ба Маҷлиси Олии ҷумҳурӣ

Кӯҳистони Мастчоҳ. Ҷавонон ҳамеша дастгирӣ меёбанд

№7 (3801) 16.01.2018

1495519778_god-molodezhiПаёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро ба Маҷлиси Олии Ҷумҳурии Тоҷикистон сокинони ­ноҳия­и Кӯҳистони Мастчоҳ самимӣ истиқбол карданд.

- Ҳар як Паёми Сарвари давлат ба мақоми олии қонунгузори мамлакат ва мардуми шарафманди кишвар дастури раҳнамост. Дар ҳуҷҷати сарнавиштсозе, ки Президенти мамлакат пешниҳод карданд, имрӯзу фардои рӯзгори мардум мавриди таҳлилу баррасӣ қарор гирифт, — гуфт роҳбари дастгоҳи раиси ноҳияи Кӯҳистони Мастчоҳ Ҳотамбек Ахмедов.

Номбурда, инчунин зикр кард, ки пешниҳоди Пешвои миллат дар мавриди эълон гардидани соли 2017- «Соли ҷавонон» дар ҳаёти ҷавонони ноҳия навгонии зиёд овард. Бори аввал стипендияи раиси ноҳия барои 6 нафар хонандаи муассисаҳои таълимӣ таъсис дода шуд. Панҷ нафар ҷавони маъюб барои табобат ба осоишгоҳҳои вилояти Суғд роҳхат гирифтанд. Барои таъмири майдончаи варзишии деҳаи Табушн 5000 сомонӣ, майдончаи варзишии деҳаи Дашт 1500 сомонӣ ҷудо гардид. Дар зербинои мақомоти иҷроияи маҳаллии ҳокимияти давлатии ноҳия толори варзишӣ барои ҷавонону наврасон ташкил ва барои хариди таҷҳизоти варзишӣ 7500 сомонӣ маблағ ҷудо шуд.

Дар арафаи Рӯзи Конститутсия дар ­назди мактаб — интернати ноҳия майдончаи варзишии замонавӣ барои бозиҳои футболу баскетбол мавриди баҳрабардорӣ қарор гирифт. Сохтмони варзишгоҳ барои 3000 ҷойи нишаст дар маркази ноҳия – шаҳраки Меҳрон дар марҳилаи анҷомёбист. Сохтмону азнавсозии майдонҳои варзишӣ дар маҳаллу деҳаҳои ноҳия бо дастгирии мақомоти иҷроияи маҳаллии ҳокимияти давлатӣ ва соҳибкорону сокинони маҳалҳо идома дорад.

Ҳамсуҳбатамон гуфт, ки барои мардуми Кӯҳистони Мастчоҳ, аз ҷумла ҷавонон, боиси шодмонист, ки соли 2018 аз ҷониби Асосгузори сулҳу ваҳдати миллӣ — Пешвои миллат, Президенти кишвар муҳтарам Эмомалӣ Раҳмон «Соли рушди сайёҳӣ ва ҳунарҳои мардумӣ» эълон гардид.

- Кӯҳистони Мастчоҳ захираҳои бойи табиӣ, иқлими мусоид, чашмаҳои шифобахш, гиёҳҳои табобатӣ, кӯҳҳои сарсабз, манзараҳои табиии зебо, ёдгориҳои таърихии диданию тамошобоб ва мардуми заҳматкашу ҳунарпеша дошта, барои рушди соҳаи сайёҳӣ ва ҳунарҳои мардумӣ бисёр мувофиқ мебошад. Масалан, дар ноҳия чанд осори атиқаи таърихӣ, ба монанди Қалъаи Ҳисорак, Ҳаммоми Дашти Оббурдон, Қалъаи Вогиф, ­Қалъаи Ботурхӯҷа ва дигар ёдгориҳои таърихӣ мавҷуданд, ки хеле қадимӣ буда, таваҷҷуҳи сайёҳонро ҷалб карда метавонанд, — афзуд Ҳотамбек Ахмедов.

Бо ибтикори мақомоти иҷроияи маҳаллии ҳокимияти давлатии ноҳия Мазори Хоҷа Муҳаммади Гулшан дар деҳаи Вогиф таъмиру таҷдид гардида, аз ҷониби соҳибкорон як силсила иншооти хизматрасон, маишӣ ва фарҳангӣ сохта, ба истифода дода шуд. Тибқи нақшаи чорабиниҳои омодашуда оид ба татбиқи «Барномаи рушди туризм дар Ҷумҳурии Тоҷикистон дар давраи солҳои 2015 — 2017» омодасозии ноҳия ба мавзеи сайру саёҳат идома дорад.

Дар ҳар хонадони деҳаҳои ноҳия ҳатман як ё ду нафар ба касбу кори хонагӣ ва ҳунари халқӣ машғуланд. Дар байни мардон оҳангариву мисгарӣ, дуредгариву наҷҷорӣ, косаву табақу қошуқтарошӣ, кандакориву хонасозии шарқӣ, дар байни занон ҳунарҳои сӯзаниву борпӯшдӯзӣ, тоқию дастурхондӯзӣ, ҷомаву қуроқдӯзӣ ривоҷ гирифтааст.

Сехи дӯзандагии «Зарафшон» дар ­тарбияи бонувон барои аз худ кардани ҳунарҳои миллӣ ва таъмини онҳо бо ҷойи кор саҳми муносиб мегузорад.

Ҳусейни НАЗРУЛЛО,

«Садои мардум»