Аъзои Ҳукумати мамлакат савганд ёд карданд

№151 (4257) 17.12.2020

15 декабри соли 2020 дар Маҷмааи давлатии «Қасри миллат»-и Дастгоҳи иҷроияи Президенти Ҷумҳурии Тоҷикистон бо иштироки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон маросими савгандёдкунии аъзои Ҳукумати Ҷумҳурии Тоҷикис­тон баргузор гардид.

Аъзои Ҳукумат бо дарки масъулият ба Президенти Ҷумҳурии Тоҷикистон савганд ёд карданд, ки манфиатҳои миллат ва давлатро аз ҳама боло гузошта, неру ва донишро барои рушди иқтисодиву иҷтимоии Тоҷикистон содиқона ва бо виҷдони пок сарф карда, Конститутсия, қонунҳо ва амру фармонҳои Президенти Ҷумҳурии Тоҷикистонро қатъиян риоя намуда, баҳри баланд бардоштани шуҳрати Тоҷикистон дар арсаи байналмилалӣ софдилона хизмат мекунанд.

Сипас, Президенти Ҷумҳурии Тоҷикистон муҳтарам Эмомалӣ ­Раҳмон аъзои Ҳукуматро барои хизмати содиқона ва софдилона ба халқу Ватан ҳидоят намуданд.

Бояд ёдовар шуд, ки мутобиқи моддаи 73 Конститутсияи Ҷумҳурии Тоҷикистон ва моддаи 8 Қонуни конститутсионии Ҷумҳурии Тоҷикистон «Дар бораи Ҳукумати Ҷумҳурии Тоҷикистон» аъзои Ҳукумат баъди таъин шудан ба вазифа ва тасдиқ гардидани фармон дар ҷаласаи якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон ба Президенти Ҷумҳурии Тоҷикистон савганд ёд мекунанд.

www.president.tj