Бистуми феврали соли равон таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Шӯрои машваратӣ оид ба беҳтар намудани фазои сармоягузорӣ муҳтарам Эмомалӣ Раҳмон ҷаласаи XIX Шӯро баргузор гардид.
Зимни баррасии масъалаҳо Пешвои миллат муҳтарам Эмомалӣ Раҳмон вобаста ба амалисозии тадбирҳо дар самти васеъ истифода бурдани иқтидорҳои энергетикӣ дар соҳаҳои гуногуни иқтисодиёти ҷумҳурӣ бо шарикони тиҷоратии ҷумҳурӣ ва кишварҳои минтақа, беҳтаршавии мавқеи кишвар дар арзёбии ҳисоботи «Пешбурди соҳибкорӣ», таҳияи санади меъёрию ҳуқуқӣ оид ба тартиби арзёбии самаранокии имтиёзҳои мавҷуда, тақвият бахшидан ба раванди ҷорӣ намудани технологияҳои пешқадами иттилоотӣ дар фаъолияти мақомоти давлатӣ ва муосиргардонии хизматрасонӣ ва танзими давлатии соҳибкорӣ ва дигар масъалаҳо ибрози назар намуданд.
Оид ба масъалаи якуми рӯзнома — рафти иҷрои қарорҳои Шӯрои машваратӣ гузориши котиби масъули Шӯро, раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Фаррух Ҳамрализода шунида шуд.
Дар робита бо ин, дар бораи ба роҳ мондани сабти электронии асноди ҳолати шаҳрвандӣ ва рақамикунонии бойгониҳо, таҳия ва пешниҳоди лоиҳаи Нақшаи чорабиниҳои Ҳукумат оид ба беҳтар намудани мавқеи кишвар дар арзёбии «Пешбурди соҳибкорӣ» дар таҳрири нав, роҳандозии тартиби мустақими бақайдгирии давлатии шахсони ҳуқуқӣ ва соҳибкорони инфиродӣ, пардохти боҷи давлатӣ барои бақайдгирии давлатии субъектҳои соҳибкорӣ ва андозҳо дар низоми «онлайн» бо истифода аз корти миллӣ, ВИЗА ва МАСТЕРКАРД, фаъол гардидани Системаи электронии Феҳристи ягонаи давлатии уҳдадориҳои гаравӣ барои бақайдгирии гаравҳои молу мулки манқул ва қабули бастаи қонунҳо дар доираи ислоҳоти низоми созишҳои таъминшуда, ворид гардидани тағйиру иловаҳо ба Кодекси андоз ва Кодекси гумрук бо пешниҳоди дар маҷмӯъ 30 имтиёзу сабукӣ барои беҳтар гардидани фазои сармоягузорӣ ва соҳибкорӣ иттилоъ дода шуд.
Тибқи банди дуюми рӯзнома, вазири молияи Ҷумҳурии Тоҷикистон Файзиддин Қаҳҳорзода оид ба натиҷаҳои таҳлили масъалаҳои низоми андозбандию гумрукӣ ва самаранокии имтиёзҳои пешниҳодшаванда маълумот пешниҳод намуд.
Вобаста ба масъалаи сеюми рӯзнома вазири маориф ва илми Ҷумҳурии Тоҷикистон Нуриддин Саид роҷеъ ба натиҷаҳои таҳлил оид ба беҳтар намудани фазои сармоягузорӣ ва соҳибкорӣ дар бахши маориф ва илм гузориш дод.
Оид ба масъалаи ниҳоӣ котиби масъули Шӯро, раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Фаррух Ҳамрализода суханронӣ карда, масъалаҳои таҳлили рушди кластерӣ дар соҳаи агросаноатӣ ва беҳтар намудани фазои сармоягузорӣ ва бахши технологияҳои иттилоотию телекоммуникатсиониро барои баррасӣ ба ҷаласаҳои оянда пешниҳод намуд, ки онҳо аз ҷониби аъзои Шӯро ҷонибдорӣ гардиданд.
Зимни баррасии масъалаҳо, инчунин, вазири адлия Рустам Шоҳмурод, роҳбари намояндагии Барномаи рушди СММ дар Ҷумҳурии Тоҷикистон Пратибҳа Меҳта, роҳбари намояндагии Бонки ҷаҳонӣ дар Тоҷикистон, раиси Шӯрои ҳамоҳангсозии рушд Ян Питер Олтерс, намояндаи Хазинаи кӯдакони СММ дар Тоҷикистон Лючиано Колестини, узви Шӯрои машваратӣ аз бахши хусусӣ, директори иҷроияи Иттифоқи ҳунармандони Тоҷикистон Нигина Икромова, узви Шӯрои машваратӣ аз бахши хусусӣ, директори ҶДММ «Беҳамто» Исломиддин Ҳакимов, директори Муассисаи таълимии хусусии «Литсейи Раҳнамо» Ҳакимниё Илҳомиддин ва дигарон андешаронӣ намуданд.
Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Шӯрои машваратӣ муҳтарам Эмомалӣ Раҳмон ҷаласаро ҷамъбаст намуда, вобаста ба нуктаҳои дар он зикргардида ба вазорату идораҳо, масъулини дахлдор дастуру супориш ва ба шарикони рушд тавсия доданд.
www.president.tj
