шаҳри Душанбе, 8 октябри соли 2018
Ҷаноби Олӣ, Президенти Ҷумҳурии Ҳиндустон! Муҳтарам намояндагони воситаҳои ахбори омма!
Қабл аз ҳама аз номи худ ва мардуми меҳмоннавози тоҷик боз як бори дигар ташрифи Ҷаноби Олӣ Шри Рам Натҳ Ковинд ва ҳайати ҳамроҳашонро ба Тоҷикстон хайрамақдам мегӯям.
Ҷониби Тоҷикистон ин сафари Президенти Ҷумҳурии Ҳиндустонро идомаи муколамаи байнидавлатии роҳбарияти ду кишвар медонад.
Мулоқоту музокироте, ки имрӯз мо анҷом додем, дар фазои анъанавии дӯстона, созандагӣ ва ҳусни тафоҳум сурат гирифтанд.
Тарафҳо бар онанд, ки густариши дарозмуддати муносибатҳои неки дӯстӣ ва ҳамкориҳои гуногунҷанбаи Тоҷикистону Ҳиндустон ҷавобгӯйи манфиатҳои милливу давлатии ҳар ду ҷониб буда, ба таҳкими сулҳу истиқрори минтақавӣ мусоидат менамояд.
Бо ишора ба аҳамияти машваратҳои сиёсӣ дар сатҳи баланду олӣ, мо зарурати тақвияти минбаъдаи онҳоро ҷиҳати боз ҳам таҳким бахшидан ба ҳамкориҳои мутақобилан судманди миёни кишварҳоямон таъкид намудем.
Дар ин зимн, қайд гардид, ки ҳамкориҳои иқтисодиву тиҷоратӣ рукни муҳими муносибатҳои тарафайн мебошанд ва барои рушди минбаъдаи онҳо бояд ба таври лозим тамоми имконияти мавҷуда мавриди истифода қарор гирад.
Ҳар ду ҷониб ба манзури рушди самти мазкури ҳамкорӣ омодагии худро ҷиҳати фаъолтар сохтани кори Комиссияи байниҳукуматии Тоҷикистону Ҳиндустон таъкид намуданд.
Ҷониби Тоҷикистон ҳамоно хоҳони ба сатҳи сифатан наву баланд баровардани ҳамкориҳояш бо Ҳиндустон дар соҳаи ҷалби сармояҳо мебошад.
Мо омодаем, ки фаъолияти сармоягузорони Ҳиндустонро дар ин соҳа минбаъд низ пуштибонӣ намоем.
Ҷониби Тоҷикистон манфиатдор аст, ки сармояи ҳиндустонӣ барои татбиқи лоиҳаҳои инфрасохториву истеҳсолӣ, саноативу кишоварзӣ ва тиҷоративу хизматрасонӣ ворид шавад.
Ҷонибҳо густариши робитаҳои фарҳангиву башариро, бахусус, дар арсаҳои иҷтимоӣ, ба монанди илму маориф, тиб ва сайёҳӣ, таъкид карданд.
Дар ҷараёни мулоқот ва музокирот, ҳамчунин, мавзӯъҳои муҳими минтақавӣ ва байналмилалӣ мавриди баррасӣ қарор гирифтанд.
Тарафҳо нигаронии амиқи худро оид ба идомаи нооромиҳо ва боз ҳам мураккаб гардидани вазъ дар Афғонистон изҳор намуданд.
Ҷумҳурии Тоҷикистон алоқамандии худро барои ҳамкории васеъ дар самти истиқрори сулҳу субот дар Афғонистон бори дигар таъкид кард.
Мо мувофиқ бар он будем, ки дарёфти роҳҳои самараноки ҳалли қазияи Афғонистон ва истиқрори ҳаёти осоишта дар он ҳамоҳангии бештари амалҳои муштараки ду кишвар ва дигар ҷонибҳои манфиатдорро тақозо менамояд.
Дар ин робита, ҷониби Тоҷикистон аҳамияти андешидани тадбирҳои ғайринизомӣ, қабл аз ҳама, татбиқи лоиҳаҳо дар соҳаи энергетика, нақлиёт ва иртибототро омили муҳими истиқрори сулҳу субот ва ҳаёти осоишта дар Афғонистон арзёбӣ кард.
Тоҷикистон ва Ҳиндустон перомуни аксари масъалаҳои минтақавию байналмилалӣ мавқеи муштарак ё ба ҳам наздик доранд.
Қайд гардид, ки муносибатҳои Тоҷикистону Ҳиндустон дар доираи созмонҳои байналмилалӣ, минҷумла, Созмони Милали Муттаҳид, хуб ба роҳ монда шудаанд.
Тарафҳо бо дарназардошти хатару таҳдидҳои рӯзафзуни глобалӣ, аз қабили терроризми байналмилалӣ, экстремизм, ифротгаройии динӣ, қочоқи маводи мухаддир ва ҷиноятҳои муташаккили фаромиллӣ, ҷонибдории худро аз тақвият бахшидан ба ҳамкорӣ дар арсаи амниятӣ таъкид намуданд.
Умед дорам, ки сафари мазкур дар таърихи навтарини муносиботи ҳамкории шарикии ду кишвари дӯст ҷойи муносиберо ишғол хоҳад кард.
Ташаккур.
