10 июни соли 2020 Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо ноиби президенти Бонки ҷаҳонӣ оид ба кишварҳои Аврупо ва Осиёи Марказӣ хонум Анна Бйерде, ки дар қароргоҳи Бонки ҷаҳонӣ дар шаҳри Вашингтони ИМА ҳузур дошт, суҳбати видеоконфронсӣ анҷом доданд.
Дар ҷараёни суҳбат ҷонибҳо ҳолати кунунӣ ва дурнамои муносибатҳои ҳамкорӣ, вазъи ҷомеаи ҷаҳонӣ, тадбирҳои табобат ва пешгирии бемории сироятии коронавирус — COVID-19-ро дар Тоҷикистон баррасӣ карданд.
Президенти мамлакат муҳтарам Эмомалӣ Раҳмон аз сатҳи ҳамкории Тоҷикистон бо ташкилоти бонуфузи молиявӣ изҳори қаноатмандӣ намуданд. Таъкид гардид, ки Бонки ҷаҳонӣ аз рӯзҳои аввали бақайдгирии беморӣ дар Тоҷикистон барои пешгирии он кумак кард.
Ҷонибҳо дар бораи паҳншавии бемории сироятии коронавирус — COVID-19, ки аксар кишварҳои оламро фаро гирифтааст, андешаронӣ карда, роҳҳои коҳиш додани таъсири манфии онро ба вазъи иҷтимоию иқтисодии Тоҷикистон баррасӣ намуданд.
Зикд гардид, ки Тоҷикистон аз рӯзҳои аввали бақайдгирии беморӣ чораҳои фаврию судманд андешида, Ҳукумати Ҷумҳурии Тоҷикистон Ситоди ҷумҳуриявӣ оид ба пешгирӣ аз паҳншавии бемории нави сироятии COVID-19-ро таъсис дода, беморхонаҳо бо садҳо кати хоб ва муҷаҳҳаз бо таҷҳизоти муосири тиббӣ ва доруворӣ таъмин шуданд.
Ҷараёни табобати беморон, беҳдошти вазъи беморхонаҳо, баланд бардоштани сатҳи хизматрасонии тиббӣ ба мубталоён ва таъмини беморхонаҳо бо доруворӣ ва дигар таҷҳизоти зарурии тиббӣ таҳти назорати бевоситаи Президенти Ҷумҳурии Тоҷикистон қарор дорад.
Дар ҷараёни суҳбат, ҳамчунин, дигар ҷанбаҳои муҳими ҳамкории барои ҳар ду ҷониб судманд баррасӣ шуд.
www.president.tj
