Прокуратураи генералии Ҷумҳурии Тоҷикистон тавассути воситаҳои ахбори омма ба шаҳрвандони кишвар муроҷиат намуда, чунин ҳушдор додааст: «Ба маълумоти шаҳрвандони мамлакат расонида мешавад, ки вақтҳои охир дар шабакаҳои иҷтимоӣ аз ҷониби шахсони алоҳида ва ширкатҳои гуногун ҳар гуна эълону реклама ва таблиғот вобаста ба таъмини ҷойи кор дар давлатҳои хориҷӣ, бахусус Иёлоти Муттаҳидаи Амрико, Канада ва Британияи Кабир, зиёд гардидаанд».
Таъкид шудааст, ки ин таблиғот асос надошта, барои мардумфиребӣ ва бо роҳҳои қаллобӣ аз худ намудани маблағи шаҳрвандон суиистифода шуда, дорои пайомадҳои манфӣ, инчунин, боиси ба шаҳрвандон расонидани зарари калон мегарданд. Аз ин рӯ, Прокуратураи генералии ҷумҳурӣ аз шаҳрвандони кишвар эҳтиромона хоҳиш кардааст, ки фирефтаи ҳар гуна таблиғоти беасос оид ба таъмини ҷойи кор дар хориҷи мамлакат нашаванд ва худро зери хатар нагузоранд.
Ш. ҲУСЕЙНЗОДА,
«Садои мардум»
