- Соли 2024 аз муомилоти ғайриқонунӣ 504 килою 353 грамм маводи нашъаовар мусодира гардид, ки нисбат ба соли 2023-юм 9 килою 256 грамм (2 фоиз) зиёд мебошад. Гарчанде соли 2024 мусодираи маводи нашъаовар аз рӯи миқдор кам шуда бошад ҳам, вале мусодираи моддаҳои психотропии синтетикӣ, ки хатари бештар доранд, 110 килограммро ташкил дода, нисбат ба соли 2023-юм 41 килограмм (59 фоиз) зиёд аст, — хабар дод директори Агентии назорати маводи нашъаовари назди Президенти Ҷумҳурии Тоҷикистон Зафар Самад зимни нишасти матбуотӣ.
Мутобиқи маълумоти оморӣ соли 2024 аз ҷониби мақомоти ҳифзи ҳуқуқ ва сохторҳои қудратии ҷумҳурӣ 22314 ҷиноят ба қайд гирифта шудааст, ки аз онҳо 839 ҷиноят вобаста ба маводи нашъаовар аст ва нисбат ба соли 2023-юм 140 ҷиноят зиёд мебошад. Ҳамчунин, бо мақсади қатъ намудани фаъолияти ҷиноятии шахсони алоҳида ва гурӯҳҳои муташаккили ҷиноятпеша, ки ба воридсозӣ ва паҳнкунии маводи нашъаовар машғуланд, аз ҷониби кормандони агентӣ фаъолияти 32 гурӯҳи ҷиноятӣ дар ҳайати 83 нафар ошкор ва қатъ карда шудааст.
Тибқи омори расмӣ то 1 январи соли 2025 дар ҷумҳурӣ 4014 нафар нашъаманд дар қайди наркологӣ қарор доранд, ки нисбати соли 2023-юм 146 нафар ё 3,5 фоиз коҳиш ёфтааст.
Дар фарҷоми нишасти матбуотӣ дар бухории махсуси агентӣ бо иштироки комиссияи махсус ва дар ҳузури намояндагони воситаҳои ахбори омма 255 килограмм маводи нашъаовар бо роҳи сӯзонидан нобуд карда шуд.
М. ЗОКИР,
«Садои мардум»
