Соли 2024 дар ноҳияи Сино 4 корхонаи саноатӣ бунёд гардида, 11 муассисаи таҳсилоти миёнаи умумӣ ва 5 боғча тариқи низоми бойлерӣ бо гармӣ таъмин шуданд.
Дар ин хусус иҷрокунандаи вазифаи раиси ноҳияи Сино Умед Гуреззода зимни нишасти матбуотӣ иттилоъ дод.
Хонандагони муассисаҳои таҳсилоти миёнаи умумии ноҳия дар олимпиадаҳои фаннӣ фаъолона иштирок намуда, бо гирифтани 434 ҷойи ифтихорӣ (37 медали тилло, 115 нуқра ва 282 биринҷӣ) дар даври ҷумҳуриявӣ мақоми аввалро соҳиб гардиданд.
Тибқи иттилои раиси ноҳия дар давраи ҳисоботӣ ба буҷети маҳаллӣ аз рӯи контингенти умумӣ 1 миллиарду 364 миллиону 361,0 ҳазор сомонӣ ворид гардид, ки 114,5 фоизи нақшаро ташкил медиҳад.
М. СОЛИҲЗОДА,
«Садои мардум»
