3-юми апрели соли 2025 Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ сафири фавқулода ва мухтори Шоҳигарии Арабистони Саудӣ дар Ҷумҳурии Тоҷикистон Валид ибни Абдураҳмон Ар-Решайдонро ба ҳузур пазируфтанд. Дар ин хусус аз шуъбаи иттилоотии дастгоҳи Раиси шаҳри Душанбе хабар доданд.
Ҷонибҳо аз сатҳи имрӯзаи муносибатҳо байни Тоҷикистон ва Арабистони Саудӣ изҳори қаноатмандӣ намуданд.
Иброз гардид, ки дар натиҷаи муколамаи сиёсии сатҳи олии ду давлат муносибатҳои судманд мунтазам рушд ёфта, заминаи ҳуқуқии робитаҳои ду кишвари бо ҳам дӯст таҳким меёбад.
Зимни мулоқот ҷонибҳо вазъи ҳамкорӣ дар соҳаҳои сиёсию иқтисодӣ, тиҷорату сармоягузорӣ ва фарҳангию башарӣ, аз ҷумла афзоиши ҳаҷми мубодилаи мол, тавсеаи сохтори тиҷорати мутақобил ва ҷалби бештари сармоягузорони Арабистони Саудӣ ба соҳаҳои мухталифи иқтисоди Тоҷикистонро мавриди баррасӣ қарор доданд.
Дар мулоқот, ҳамчунин, атрофи дигар масъалаҳои мавриди таваҷҷуҳ мубодилаи афкор шуд.
