Президенти Ҷумҳурии Тоҷикистон Эмомалӣ Раҳмон ба Раиси Ҷумҳурии Халқии Хитой Си Ҷинпин барқияи табрикӣ фиристод, ки дар он, аз ҷумла, омадааст:
«Муҳтарам ҷаноби Раис!
Барои ман боиси қаноатмандии бузург аст, ки ба Шумо ва тамоми мардуми дӯсти Хитой табрикоти самимӣ ва таманниёти беҳтарини хешро дар иртибот ба 66-умин солгарди ташкили Ҷумҳурии Халқии Хитой баён дорам.
Дар даҳсолаи охир Хитойи бо мо дӯст дар кори дигаргунсозии куллӣ дар бахшҳои иқтисодӣ, иҷтимоӣ ва ҳаёти ҷамъиятӣ — сиёсии кишвар ба комёбиҳои назаррас ноил гардид, ки бо шарофати он Хитой дар сатҳи ҷаҳонӣ мавқеи сазоворро касб кард.
Мо ба сатҳи кунунии ҳамкории мутақобилан судманди бисёрҷонибаи стратегӣ бо Хитой, ки дар солҳои охир барои тавсеа ва тақвияти минбаъда ҷараёни муқтадир гирифт, баҳои баланд медиҳем.
Бовар дорам, он ҳуҷҷатҳое, ки мо дар ҷараёни сафари кории чанде пеш ба кишвари зебои Шумо анҷомдода ба имзо расонидем ва кӯшишҳои қобили қабули ҷонибҳо ба рушди муътадили ҳамкории мутақобилаи бисёрҷанба ҷараёни нав мебахшанд.
Ман муътақид бар онам, ки мо бо кӯшишҳои муштарак метавонем ба ҳамкории мутақобилан судманди Тоҷикистону Хитой, ки ба манфиати аслии мардумони ин давлатҳо ҷавобгӯянд ва омили муҳими сулҳу субот дар минтақа маҳсуб мешаванд, ҷараёну инкишофи тоза бубахшем.
Бо истифода аз ин имконияти фараҳбахш, мехоҳам аз самими қалб ба Шумо, муҳтарам ҷаноби Раис, сиҳатмандӣ, саодат ва амалҳои навро дар фаъолиятатон, ба мардуми дӯсти Хитой сулҳу рафоҳатро таманно кунам».
www.president.tj
