18 январи соли 2018 дар бинои Ҳукумати Ҷумҳурии Тоҷикистон таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Ҳукумати мамлакат муҳтарам Эмомалӣ Раҳмон маҷлиси васеи Ҳукумати Ҷумҳурии Тоҷикистон баргузор гардид, ки дар он нишондиҳандаҳои рушди иқтисодию иҷтимоии мамлакат дар соли 2017 натиҷагирӣ ва вазифаҳои асосӣ барои соли 2018 муайян карда шуд.
Дар кори маҷлис роҳбарият ва аъзои Ҳукумати кишвар, Дастгоҳи иҷроияи Президенти Ҷумҳурии Тоҷикистон, воҳидҳои сохтории он, роҳбарони сохторҳо ва мақомоти марказии давлатӣ, идораҳои назди Президент ва Ҳукумат, корхонаю муассисаҳои ҷумҳуриявӣ, раисони вилоятҳо ва шаҳру ноҳияҳо, роҳбарони муассисаҳои олии таълимӣ, марказҳои татбиқи лоиҳаҳои инвеститсионӣ, бонкҳои давлатӣ ва саҳомӣ, рӯзномаю маҷаллаҳои расмӣ ва дигар шахсони масъул иштирок карданд.
Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон кори маҷлисро оғоз бахшида, таъкид намуданд, ки соли 2017 дар маҷмӯъ барои мардуми тоҷик соли бобарор ба ҳисоб рафта, бо ҷаҳду талошҳои меҳнаткашон бо натиҷаҳои назаррас ҷамъбаст гардид.
Сипас, оид ба натиҷаҳои рушди иқтисодию иҷтимоӣ дар соли 2017 ҳисоботи Сарвазири мамлакат Қоҳир Расулзода шунида шуд.
Тавре таъкид гардид, бо вуҷуди таъсири манфии омилҳои берунӣ рушди босуботи иқтисодии мамлакат нигоҳ дошта, иҷрои нишондиҳандаҳои макроиқтисодӣ ва иҷтимоӣ тибқи ҳадафҳои афзалиятнок таъмин шуд.
Қайд гардид, ки соли 2017, новобаста аз мураккабии вазъи геополитикии ҷаҳонӣ ва таъсири манфии омилҳои берунӣ ба вазъи иҷтимоию иқтисодии кишвар, ҳамчун соли таърихӣ дар ҳаёти сиёсию иқтисодии мамлакат боқӣ мемонад. Зеро дар натиҷаи тадбирҳои андешидаи Ҳукумати мамлакат таҳти роҳбарӣ ва сиёсати хирадмандонаи Пешвои миллат, Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон бори аввал дар замони соҳибистиқлолӣ дар давраи тирамоҳу зимистон маҳдудияти неруи барқ пурра бардошта шуд.
Омили мазкур ба фаъолияти мунтазами корхонаҳои истеҳсолӣ, бунёди корхонаҳои нави саноатӣ ва гузоштани қадамҳои устувор ба сӯи яке аз ҳадафҳои стратегии мамлакат, яъне аз кишвари аграрию саноатӣ ба кишвари индустриалию аграрӣ табдил додани кишвар заминаи мусоид фароҳам меорад.
Сарвазири Ҷумҳурии Тоҷикистон ёдовар шуд, ки соли 2017 рушди иқтисодию иҷтимоии мамлакат бинобар иҷрои саривақтӣ ва сифатноки дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, инчунин таҳия ва татбиқи барнома ва нақшаю чорабиниҳои дахлдори Ҳукумати мамлакат имкон дод, ки ҳаҷми Маҷмӯи маҳсулоти дохилии кишвар ба 61,1 млрд. сомонӣ баробар гардида, суръати рушд 7,1 фоизро ташкил диҳад.
Ба рушди иқтисодӣ як қатор нишондиҳандаҳо, аз ҷумла афзоиши маҳсулоти саноатӣ 21,3 фоиз, кишоварзӣ — 6,8, маблағгузорӣ ба сармояи асосӣ — 4,1 ва гардиши савдои чакана 6,6 фоиз мусоидат намуд.
Дар натиҷаи тадбирҳои андешидаи Ҳукумати мамлакат қисми умумии даромади Буҷети давлатӣ 100,1 фоиз таъмин гардида, ба он 19,5 млрд. сомонӣ ворид шуд, ки нисбат ба нақша 13 млн. сомонӣ зиёд мебошад.
Дар давраи ҳисоботӣ нақшаи воридоти андозҳо аз ҷониби мақомоти андоз 102,6 ва Хадамоти гумрук 98 фоиз таъмин гардид.
Бо мақсади самаранок ва оқилона истифода намудани захираву имкониятҳои мавҷуда ва дар ин замина таъсис додани ҷойҳои нави корӣ соли 2017 дар кишвар 170 корхонаву коргоҳи нави саноатӣ қариб бо 3 ҳазор ҷойи нави корӣ таъсис дода шуд.
Бунёд гардидани корхонаи металлургӣ бо иқтидори солонаи истеҳсоли 50 ҳазор тонна металли сурб дар «Минтақаи саноатии Тоҷикистон ва Хитой» ва пешбинӣ гардидани бунёди силсилаи корхонаҳои саноатӣ дар самти саноатикунонии мамлакат заминаи устувор мегузорад.
Аз таҳлилҳо бармеояд, ки дар қатори пешравиҳои соҳа камбудиҳо низ ба мушоҳида мерасанд. Аз ҷумла, қисми даромади буҷети суғуртаи иҷтимоӣ ва нафақа аз ҳисоби андози иҷтимоӣ 97 фоиз таъмин шуд, ки аз ин ҳисоб ба буҷет 46 млн. сомонӣ ворид нагардид.
Соли 2017 танҳо 18 фоизи пахтаи дар дохили кишвар истеҳсолгардида коркард карда шуд. Яке аз сабабҳои пурра коркард нагардидани нахи пахта аз фаъолият бозмондани корхонаҳои ресандагӣ ё бо иқтидори пурра фаъолият накардани онҳо мебошад. Дар давраи ҳисоботӣ аз 16 корхонаи ресандагӣ 4 корхона умуман фаъолият накард. Ҳамчунин сатҳи таъминоти хонандагон бо либосҳои мактабии истеҳсоли ватанӣ ҳамагӣ ба 12 фоиз баробар мебошад. Аз 54 корхонаи ба истеҳсоли либоси мактабӣ машғулбуда 8 корхона фаъолият накард, 12 корхонаи дигар истеҳсоли либоси мактабиро коҳиш доданд.
Сарвари давлат ба Сарвазири мамлакат, муовини якум ва муовинони Сарвазир ҷиҳати бартараф намудани камбудиҳои мавҷуда ва таҳлилу ҷамъбасти воқеии соҳаҳои иқтисодию иҷтимоӣ дар соли 2017 супоришҳои мушаххас доданд. Дастурҳо, ҳамчунин вобаста ба вазъи ҷомеаи ҷаҳонӣ ва таъсири омилҳои беруна ба иқтисодиёти кишвар, дарёфти сарчашмаҳои нави маблағгузорӣ, иҷрои саривақтӣ ва бечунучарои нишондиҳандаҳои Паёми Президенти Ҷумҳурии Тоҷикистон ба Маҷлиси Олӣ, татбиқи самараноки лоиҳаҳои сармоягузорӣ, азхудкунии маблағҳо, истифодаи иқтидорҳои мавҷудаи иқтисодӣ, вусъат бахшидан ба рушди иқтисодиёту иҷтимоиёт, афзоиши истеҳсолу содироти молу маҳсулоти гуногун дода шуд.
Дар маҷлис, ҳамчунин ҳисоботи вазири молия Абдусалом Қурбониён, раиси Кумитаи андоз Нусратулло Давлатзода ва сардори Хадамоти гумрук Абдуфаттоҳ Ғоиб шунида шуд.
Президенти мамлакат муҳтарам Эмомалӣ Раҳмон камбудиҳои вазири молияро оид ба иҷрои нокифояи қисми даромади Буҷети давлатӣ, ба амал омадани қарзи маош дар баъзе шаҳру ноҳияҳои кишвар, аз ҷумла шаҳрҳои Ваҳдат, Турсунзода ва ноҳияи Шаҳринав, истифодаи ғайримақсадноки маблағҳои буҷетӣ, назорати ғайриқаноатбахши истифодаи маблағҳо, татбиқи нокифояи талаботи Қонуни Ҷумҳурии Тоҷикистон «Дар бораи буҷети давлатӣ», сари вақт пардохт нагардидани қарзҳо аз ҷониби субъектҳои қарзгир нишон дода, ислоҳи саривақтии онро талаб намуданд.
Вобаста ба иҷро нагардидани нақшаи 4 намуди андоз ва ба Буҷети давлатӣ ворид нашудани 400 миллион сомонӣ, ба раиси Кумитаи андози назди Ҳукумати Ҷумҳурии Тоҷикистон дастур дода шуд, ки барои ислоҳи камбудиҳои ҷойдошта ва таъмини нақшаи даромади Буҷети давлатӣ тадбирҳои муҳиму мушаххас андешад.
Сарвари давлат фаъолияти Хадамоти гумрукро натиҷагирӣ карда, аз иҷро нагардидани нақшаи даромади боҷи гумрукӣ, ба амалҳои коррупсионӣ даст задани кормандони Хадамоти гумрук, иҷрои ғайриқаноатбахши татбиқи Кодекси гумруки Ҷумҳурии Тоҷикистон, назорати нокифояи фаъолияти гузаргоҳҳои сарҳадӣ, воридоти маҳсулоти гӯштии пастсифат, муҳлаташон гузашта ва ба саломатии инсон зараровар изҳори нигаронӣ карданд.
Раиси Бонки миллӣ Ҷамшед Нурмуҳаммадзода ва раиси Бонки давлатии амонатгузории Тоҷикистон «Амонатбонк» Руҳулло Ҳакимзода доир ба тадбирҳои беҳдошти низоми бонкӣ ва сиёсати самараноки пулию қарзӣ ҳисобот доданд.
Таъкид гардид, ки дар соли 2017 даромади софи Бонки давлатии амонатгузории Тоҷикистон «Амонатбонк» ба 31,7 миллион сомонӣ расонда шуд, ки дар муқоиса ба соли 2016 — ум 11, 3 маротиба зиёд аст. Аз рӯи фаъолияти бонкӣ ба андозаи 47, 1 миллион сомонӣ андозу пардохтҳои ҳатмӣ ба буҷет ворид гардид, ки нисбат ба соли 2016 — ум 9 фоиз зиёд мебошад. Бақияи амонатҳои шахсони ҳуқуқӣ ва воқеӣ 2,9 миллиард сомониро ташкил намуд, ки нисбат ба соли 2016 — ум 29,5 фоиз афзоиш ёфтааст.
Бо натиҷагирӣ аз фаъолияти Бонки миллӣ ва Бонки давлатии амонатгузории Тоҷикистон «Амонатбонк» Президенти мамлакат ба роҳбарону масъулин супориш доданд, ки дар вақтҳои муайянгардида ҷиҳати ислоҳи камбудиҳо, нигоҳ доштани қурби пули миллӣ, низоми истифодаи кортҳои пластикӣ, беҳдошти системаи пулию қарзии ҷумҳурӣ, аз байн бурдани мушкилоти як қатор бонкҳои саҳомии мамлакат, инчунин дигар масъалаву мушкилоти соҳа чораандешӣ намоянд.
Раиси Кумитаи давлатии сармоягузорӣ ва идораи амволи давлатӣ Қаҳҳорзода Файзиддин Саттор дар бораи татбиқи лоиҳаҳои сармоягузорӣ ва ҷалби бештари сармоя ба иқтисодиёти кишвар ҳисобот дод.
Президенти мамлакат муҳтарам Эмомалӣ Раҳмон ба Ҳукумати Ҷумҳурии Тоҷикистон ва Кумитаи давлатии сармоягузорӣ ва идораи амволи давлатӣ супориш доданд, ки ҷиҳати татбиқи самараноки лоиҳаҳо, мусоидат барои амалӣ кардани дастгирии давлатии соҳибкорӣ, ҷалби ҳар чӣ бештари сармоя баҳри рушди бахшҳои муҳими хоҷагии халқ, аз ҷумла бахшҳои маориф, роҳу нақлиёт ва обрасонӣ,аз марҳилаи аввали таҳияи лоиҳаҳо ба интихоби кадрҳо, истифодаи самараноку саривақтии маблағҳои ҷудогардида аҳамияти махсус зоҳир намоянд.
Дар робита ба нишондиҳандаҳои пасти азхудкунии маблағҳои сармоягузорӣ Сарвари давлат таваҷҷуҳи роҳбарони татбиқи лоиҳаҳоро ба истифодаи мақсадноки маблағҳо ва сифати корҳо ҷалб карданд.
Сипас, ҳисоботи директори Агентии суғуртаи иҷтимоӣ ва нафақа Сафаралӣ Наҷмуддинов оид ба натиҷаҳои фаъолияти соҳа дар соли 2017 шунида шуд.
Сарвари давлат барои аз байн бурдани мушкилот дар самти хизматрасонии соҳаи иҷтимоӣ ва иҷрои нақшаи суғуртавӣ ба роҳбарияти Агентии суғуртаи иҷтимоӣ ва нафақа супориш доданд.
Директори генералии Ҷамъияти саҳомии кушодаи Неругоҳи барқи обии «Роғун» Хайрулло Сафарзода оид ба рафти корҳои сохтмонӣ дар иншооти муҳими аср ҳисобот дод.
Президенти мамлакат муҳтарам Эмомалӣ Раҳмон ба роҳбарияти ширкат барои иҷрои босифати корҳои сохтмонӣ, истифодаи мақсадноки маблағҳои буҷетӣ ва дар муҳлатҳои муайяншуда ба истифода додани навбати аввали агрегати Неругоҳи барқи обии «Роғун» супоришҳои қатъӣ доданд.
Дар идомаи кори маҷлис ҳисоботи прокурори генералӣ Юсуф Раҳмон оид ба вазъи пешгирии қонуншиканиҳо дар самти истифодаи маблағҳои буҷетӣ, қонуншиканиҳо дар самти тақсимоти замин ва дигар паҳлуҳои фаъолияти соҳа шунида шуд.
Таъкид гардид, ки дар мавриди қабули баъзе қарорҳо ва дигар санадҳои ҳуқуқӣ талаботи қонунгузории ҷорӣ риоя нагардидааст, бо ин асос 14 санади қабулнамудаи роҳбарони вазорату идораҳо бо эътирозҳои прокурорӣ бекор карда шуданд.
Дар робита ба қонуншиканиҳо дар самти истифодаи замин таъкид гардид, ки роҳбари Стансияи озмоиши машинаҳои зертобеи Вазорати кишоварзӣ Ҳ. Раҳимов аз беэътиноии роҳбарият истифода бурда, дар чор соли охир 12,6 гектар замини муассисаро, воқеъ дар ҳудуди ноҳияи Рӯдакӣ, ба маблағи 263 ҳазор доллар ба шаҳрвандон фурӯхтааст.
Дар самти истифодаи неруи барқ бошад, аз ҷониби мақомоти прокуратура 50 миллион сомонии қарзи истифодаи қувваи барқ барқарор карда шуд.
Вобаста ба татбиқи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» аз ҷониби мақомот 563 қонуншиканӣ ошкор ва нисбат ба шахсони гунаҳкор парвандаҳои маъмурӣ оғоз ва 363 нафар ба ҷавобгарии интизомӣ кашида шуданд.
Сарвари давлат муҳтарам Эмомалӣ Раҳмон супориш доданд, ки бо иҷрои хизмати содиқонаву поквиҷдонона кормандони мақомоти прокуратура ҷиҳати сари вақт пешгирӣ намудан ва аз байн бурдани қонуншиканиҳо дар мамлакат чораҷуйӣ намоянд.
Баъд ҳисоботи вазири корҳои дохилии Ҷумҳурии Тоҷикистон Раҳимзода Рамазон Ҳамроҳ шунида шуд.
Таъкид гардид, ки дар соли 2017 зиёда аз 22 ҳазор ҷиноят ба қайд гирифта шудааст, ки марбут ба амалҳои террористию экстремистӣ, куштор, роҳзанию ғоратгарӣ, нашъамандӣ, гардиши ғайриқонунии маводи мухаддир, истифодаи ғайриқонунии силоҳ ва ғайра мебошанд.
Сарвари давлат муҳтарам Эмомалӣ Раҳмон бо таҳлилу баррасии вазъи воқеӣ ба роҳбарияти Вазорати корҳои дохилӣ ҷиҳати пурзӯр намудани назорати ҷинояту ҷинояткорӣ дар ҷумҳурӣ бо истифода аз воситаҳои муосири технологӣ, баланд бардоштани савияи касбии кормандони мақомот ва таҳкими робитаи онҳо бо аҳолӣ дастуру супоришҳои мушаххас доданд.
Дар ҳисоботи директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон Султонзода Сулаймон Саид, аз ҷумла таъкид гардид, ки дар соли 2017 — ум 1980 ҷинояти коррупсионӣ, иқтисодии характери коррупсионидошта ва ҷиноятҳои марбут ба андоз ошкор шуд, ки ҳаҷми зарар аз ҳисоби онҳо 208 миллион сомониро ташкил медиҳад.
Зарарҳои молиявӣ, ҳамчунин дар ҳисоботи раиси Палатаи ҳисоби Ҷумҳурии Тоҷикистон Фаррух Ҳамрализода таъкид карда шуд.
Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон аз ҳолатҳои содиршудаи ҷиноятҳои коррупсионӣ аз ҷониби кормандони соҳа изҳори нигаронӣ карда, роҳбарияти Агентӣ ва Палатаи ҳисобро ҷиҳати тақвияти мубориза бар зидди коррупсия, барқарор намудани маблағи зарарҳои молиявии ба давлат расонидашуда ва ба танзим даровардани тадбирҳои тафтишотӣ вазифадор намуданд.
Дар идома доир ба самтҳои фаъолият дар соҳаҳои саноат, кишоварзӣ, маориф ва илм, тандурустӣ ва ҳифзи иҷтимоӣ роҳбарони вазоратҳои номбурда ҳисобот доданд.
Пешвои миллат муҳтарам Эмомалӣ Раҳмон ҷиҳати бунёди коргоҳҳои коркарди шир, рушди саноати дӯзандагӣ ва истеҳсоли маҳсулоти воридотивазкунанда, пурзӯр намудани назорати фаъолияти истихроҷи ангишт, ташкили ҷойҳои нави корӣ, афзун намудани истеҳсоли картошка, тақвияти корҳои обмонии заминҳои кишт ва боғу токзор, таъмини шаффофияти тақсимоти квотаҳои байналмилалӣ барои таҳсил дар хориҷа, навсозӣ, таъмиру тармим ва муҷаҳҳазсозии муассисаҳои таҳсилоти миёнаи умумии куҳнаю фарсудашуда дар шаҳру ноҳияҳо, пешгирӣ аз паҳншавии бемориҳои сироятиву хавфнок дар байни аҳолӣ ва беҳдошти хизматрасонии тиббӣ ба аъзои Ҳукумат, раисони вилоятҳо ва шаҳру ноҳияҳои мамлакат дастуру супоришҳои қатъӣ доданд.
Раиси шаҳри Душанбе Рустами Эмомалӣ зимни гузориш аз натиҷаи фаъолияти Мақомоти иҷроияи ҳокимияти давлатии шаҳр дар соли 2017 зикр кард, ки маҳз бо дастуру ҳидоят ва дастгирию ташаббусҳои созандаи Пешвои миллат пойтахт ба дастовардҳои назаррасу умедбахш ноил гардид.
Танҳо дар соли 2017 дар шаҳри Душанбе 21 ҳазор ҷойи нави корӣ фароҳам омад ва ҷиҳати таъсиси боз 31 ҳазор ҷойи нави корӣ барои сокинони пойтахт дар соли ҷорӣ нақшагирӣ шудааст.
Бо мақсади сарфаи неруи барқ 1600 хона ва иншоот ба системаи гармидиҳӣ пайваст гардид. Соли 2018 бунёди 15 муассисаи замонавии таълимӣ бо такмили беш аз 12 ҳазор ҷойи нишаст амалӣ карда хоҳад шуд.
Дар муддати кӯтоҳ 70 майдончаи варзишӣ бо сифати баланд бунёд гардида, сохтмони 12 боғу гулгашти муосир ва 92 майдончаи варзишии дигар бо муосиртарин воситаҳои машқу тамрин ва гузаронидани чорабиниҳои варзишӣ босубот ҷараён дорад.
- Дар пойтахт соли сипаришуда 66 км роҳҳо бунёд ва таҷдиду навсозӣ шуданд, ки дар муқоиса бо соли 2016 — ум 44 км зиёд аст. Ҷиҳати баланд бардоштани сатҳи хизматрасонии аҳолӣ ва меҳмонони пойтахт харидории боз 100 нақлиёти мусофиркаши ҷавобгӯйи стандартҳои муосир ба нақша гирифта шудааст. Аллакай 13 адади он ворид гардидааст, ки рӯзҳои наздик ба хатсайрҳо тақсим мешаванд, — изҳор дошт раиси шаҳри шаҳри Душанбе Рустами Эмомалӣ.
Қайд гардид, ки бо мақсади дастгирӣ ва ҳавасмандии ҷавонон 200 стипендияи раиси шаҳр барои донишҷӯёну мактаббачагони фаъоли пойтахт таъсис дода шудааст.
Робита бо аҳолӣ тавассути телефони боварӣ, сайти электронӣ ва шабакаҳои иҷтимоӣ муваффақона ҷараён дорад, барои ҷалби ҷавонони лаёқатманду дорои ҷаҳонбинии созанда, ташкили озмуни шаффофи қабул ба сохторҳои марбутаи шаҳр натиҷаҳои хуб медиҳад.
Дар охир раиси Вилояти Мухтори Кӯҳистони Бадахшон Шодихони Ҷамшед, иҷрокунандаи вазифаи раиси вилояти Суғд Раҷаббой Аҳмадзода, раиси вилояти Хатлон Давлатшо Гулмаҳмадзода аз пешрафту норасоиҳои мавҷудаи минтақаҳо дар соли 2017 ва нияту нақшаҳои созанда дар соли 2018 ҳисобот доданд.
Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба раиси шаҳри Душанбе, раисони Вилояти Мухтори Кӯҳистони Бадахшон, вилоятҳои Суғд, Хатлон, шаҳру ноҳияҳои тобеи ҷумҳурӣ дастур доданд, ки дар муҳлати кӯтоҳтарин ҷиҳати таъсиси корхонаҳои хурду бузурги коркарду истеҳсоли маҳсулоти ширӣ, макарон, обҳои нӯшокӣ, гиёҳҳои шифобахш, истеҳсоли доруҳои хушсифат ва дар ҳамин замина таъмини аҳолӣ бо маҳсулоти хушсифату арзон тадбирҳои таъхирнопазир андешанд.
Ҳамчунин, масъулин то охири сол ҷиҳати таъмини пурраи наврасони ҷумҳурӣ бо либосҳои мактабӣ, бо дарназардошти ташкили сехҳои нави дӯзандагӣ ва таъмиру таҷдиди мактабҳои таъмирталаби тамоми манотиқи кишвар, супоришҳои мушаххас гирифтанд.
Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо натиҷагирӣ аз фаъолияти соҳаҳои хоҷагии халқи мамлакат ба аъзои Ҳукумат, Дастгоҳи иҷроияи Президенти Ҷумҳурии Тоҷикистон, роҳбарони вазорату идораҳо, вилоят, шаҳру ноҳияҳо ва ташкилоту муассисаҳои ҷумҳуриявӣ барои рафъи камбудиҳои мавҷуда, иҷрои нишондиҳандаҳои Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон, таҳияи нақша-чорбиниҳои таъминкунандаи пешрафту тараққиёти соҳаҳои муҳими ҷумҳурӣ дастуру супоришҳои мушаххас дода, дар ҳузури иштирокчиён суханронӣ намуданд.
Зимни суханронӣ Сарвари давлат муҳтарам Эмомалӣ Раҳмон изҳори боварӣ карданд, ки дар соли 2018 давлат ва миллати тоҷик бо меҳнати садоқатмандона ва якдилию ҳамбастагии ҷомеа ба рушду пешрафти боз ҳам бештару хубтари иқтисодию иҷтимоӣ ноил мегарданд.
www.president.tj
