Суханронии Пешвои миллат муҳтарам Эмомалӣ Раҳмон дар нишасти матбуотӣ пас аз музокирот бо Раиси Ҷумҳурии Исломии Эрон Сайид Иброҳим Раисӣ
Эрон, 30 майи соли 2022
Муҳтарам намояндагони воситаҳои ахбори омма!
Хонумҳо ва ҷанобон!
Қабл аз ҳама, мехоҳам бори дигар ба Раиси Ҷумҳурии Исломии Эрон, Ҷаноби Олӣ муҳтарам Сайид Иброҳим Раисӣ барои даъваташон ҷиҳати анҷом додани сафари расмӣ ба ин сарзамини бостонӣ самимона изҳори сипос намоям.
Мавриди зикр аст, ки дар оғози соли равон мо 30 — солагии барқарор намудани робитаҳои дипломатӣ миёни кишварҳоямонро ҷашн гирифтем.
Тоҷикистон ва Эрон, тайи ин давра, ҷиҳати дарёфти роҳҳои нави таҳкиму тавсеаи муносибатҳои фарогир ва таъмини густариши самараноки онҳо мунтазам тадбирҳои амалӣ андешида, ба сатҳи баланди ҳамкориҳои созанда расиданд.
Мулоқоту музокироти имрӯзаро мо идомаи талошҳои пайвастаи ҳар ду ҷониб дар ин ҷода, ҳамчунин ҷавобгӯи манфиатҳои волои мардумонамон арзёбӣ менамоем.
Ба ин манзур, дар доираи барномаи ин сафар мо дар фазои ҳусни тафоҳум, эътимод ва эҳтироми ҳамдигар гуфтушунидҳои муфид баргузор намуда, масъалаҳои муҳими муносибатҳои ҳамкории Ҷумҳурии Тоҷикистон ва Ҷумҳурии Исломии Эронро баррасӣ намудем.
Бар ин боварем, ки бастаи санадҳои нави дар ҳошияи ин сафар ба имзорасида, ки соҳаҳои иқтисоду тиҷорат, нақлиёт, энергетика ва дигар соҳаҳои мавриди манфиатҳои тарафайнро фаро мегиранд, барои тавсеаи робитаҳои ду кишвар дар арсаҳои гуногун хизмат хоҳанд кард. Аз ҷумла, мутобиқ ба тавофуқоти қаблӣ, «Барномаи дарозмуддати ҳамкориҳои иқтисодиву тиҷоратӣ то соли 2030», ҳамчунин, санадҳои дахлдор ҷиҳати таъсис додан ва фаъолияти Палатаи муштараки савдо ва саноати Тоҷикистону Эрон ва Шӯрои муштараки сармоягузорӣ имрӯз ба имзо расиданд.
Итминон дорем, ки мувофиқаҳои дар ҷараёни музокирот ҳосилшуда ба ҳамкориҳои ҳар ду кишвар дар соҳаҳои сиёсӣ, иқтисодиву тиҷоратӣ, сармоягузорӣ ва фарҳангиву башарӣ такони тоза хоҳанд бахшид.
Мо дар баробари таъкид ба арзишҳои муштараки таърихӣ ва тамаддунии мардумонамон изҳори боварӣ намудем, ки онҳо дар оянда низ ба рушди минбаъдаи равобити гуногунҷанбаи мо мусоидати ҳамаҷониба хоҳанд кард.
Тақвияти минбаъдаи муколамаи созандаи сиёсии гуногунсатҳи байни ҳар ду давлат, ки дар таҳкими фазои ҳусни тафоҳум ва эътимод нақши муҳим доранд, ба манфиати ду ҷониб созгор дониста шуд.
Густариши ҳамкориҳои байнипарлумонӣ низ ҳамчун заминаи мусоиди ин раванд арзёбӣ гардид.
Ба манзури густариши ҳамкориҳои иқтисодиву тиҷоратӣ, аз ҷумла такмили сохтори муомилоти тиҷоратии ҳар ду ҷониб, талошҳои бештари ниҳодҳои соҳавӣ зарур дониста шуд.
Дар соҳаҳои тиҷорат ва сармоягузорӣ бештар фаъол гардидани тамосу робитаҳои бахши хусусӣ ва соҳибкорони ҳар ду кишвар мувофиқи мақсад дониста мешавад.
Ҷониби Тоҷикистон баргузории намоишгоҳҳои молу маҳсулот ва ҳамоишҳои доираҳои соҳибкорӣ дар қаламрави ҳамдигарро дар роҳи дастрасӣ ба ин ҳадафҳо муассир ҳисобид.
Ҳамзамон бо ин, эътироф гардид, ки роҳандозии ҳамкориҳои густурда байни минтақаҳои озоди иқтисодӣ ва шаҳракҳои саноатии ҳар ду кишвар ба нафъи ҳар ду ҷониб мебошад.
Нақши Комиссияи муштараки ҳамкориҳои тиҷоратӣ, иқтисодӣ, техникӣ ва фарҳангӣ дар раванди баррасӣ ва таҳкими робитаҳои иқтисодиву тиҷоратӣ муҳим арзёбӣ гардид.
Ба мақсади тавсеаи ҳамкориҳои иқтисодиву тиҷоратӣ, афзоиши табодули мол ва тамосҳои башарӣ зарурати рушди зерсохтор ва пайвастани шабакаҳои нақлиётии ҳар ду кишвар мавриди таъкид қарор гирифт.
Ҷониби Тоҷикистон аз тадбирҳои муштарак барои бунёди роҳҳои заминӣ, ки ҳар ду кишварро бо ҳам мепайванданд, истиқбол менамояд. Дар ин замина, мо алоқамандии худро барои баромадан ба бандарҳои обии Эрон, ҳамчунин истифодаи имконоти бандарҳои Чобаҳор ва Бандар — Аббос барои ҳамлу нақли молу маҳсулот иброз доштем. Эътироф гардид, ки робитаҳо байни минтақаҳо ва вилоятҳои Тоҷикистону Эрон метавонанд аз соҳаҳои дигари ояндадор бошанд.
Бо таъкиди иқтидорҳои кофии мавҷуда дар соҳаи сайёҳӣ, мо ташаккули низоми мусоиди рафтуомад миёни ҳар ду кишварро барои рушди ҳамкориҳо дар ин ҷода мувофиқи мақсад медонем.
Ҳамин тартиб, тақвияти минбаъдаи заминаи ҳуқуқӣ ва қарордодӣ дар соҳаҳои мавриди таваҷҷуҳи тарафҳо ҳамчун омили муҳими тавсеаи муносиботи гуногунҷанбаи босамар арзёбӣ гардид.
Мо, бо дарназардошти вазъи ҳассоси имрӯзаи минтақа ва ҷаҳон, манфиатдор будани худро барои рушди ҳамкориҳо дар соҳаи таъмини амният таъкид намудем. Дар робита ба ин, ба вазъи ҷории Афғонистони ҳамсоя таваҷҷуҳи хос зоҳир гардид.
Тоҷикистон ҷонибдории худро аз ҳама гуна талошҳои сиёсиву дипломатӣ ва кумакҳои башарӣ, ки ба таъмини амният ва пешгирӣ аз фоҷиаи инсонӣ дар ин кишвари ҳамсоя равона шудаанд, иброз намуд.
Мо тақвияти ҳамкориҳоро дар роҳи мубориза бар зидди терроризм, экстремизм, қочоқи маводи мухаддир, ҷинояткории муташаккили фаромиллӣ ва ҷиноятҳои киберӣ ба манфиати ҳар ду кишвар ва минтақа донистем.
Ҳозирини гиромӣ!
Мо қаноатмандии худро аз ҳолат ва раванди афзояндаи ҳамкориҳо миёни Тоҷикистон ва Эрон дар чаҳорчӯбаи созмонҳои байналмилалӣ ва минтақавӣ изҳор кардем.
Ба мувофиқа расидем, ки ҳамкориҳои самарабахши худро дар ин қолабҳо идома хоҳем дод.
Дар интиҳо ба Раиси Ҷумҳурии Исломии Эрон, Ҷаноби Олӣ муҳтарам Сайид Иброҳим Раисӣ барои пазироии бародаронаашон ибрози сипос намуда, ба мардуми соҳибтамаддуни Эрони бостонӣ сулҳу субот ва пешрафту шукуфоӣ орзумандам.
Саломат бошед!
