Ҳафтуми августи соли 2014 Президенти кишвар Эмомалӣ Раҳмон ба қароргоҳи воҳиди махсуси зиддитеррористии «Алфа»- и Кумитаи давлатии амнияти миллӣ ба муносибати 20-солагии таъсиси он ташриф оварда, бо шароити нави муҳайёгардида ва омодагии касбии ҳайати шахсӣ бевосита шинос шуд.
Чунонки зикр гардид, бо дастгирии молиявии Ҳукумати ҷумҳурӣ ва ғамхории пайвастаи Президенти кишвар Эмомалӣ Раҳмон тайи чанд муддати охир биною иншооти ин воҳиди махсуси низомӣ пурра навсозӣ шуда, бо техникаю таҷҳизот ва яроқу аслиҳаи муосир таъмин гардидааст.
Сарвари давлат Эмомалӣ Раҳмон бо рафти дарсу машғулиятҳои назариявӣ ва амалии ҳайати шахсӣ, ки асосан ба омодагии зиддитеррористӣ нигаронда шудааст, бевосита шинос шуда, барои баланд бардоштани савияи маҳорату малакаи касбӣ ва обутоби ҷисмонию рӯҳии онҳо ба масъулин дастуру ҳидоятҳо дод.
Тавре аён гардид, ҳайати шахсии воҳиди махсуси зиддитеррористии «Алфа»- и Кумитаи давлатии амнияти миллии Ҷумҳурии Тоҷикистон дар амалиётҳои озод намудани гаравгонон бо роҳи ҳуҷуми ногаҳонии ғофилгир, бо усули кӯҳнавардӣ ворид шудан ба ошёнаҳои болоии биноҳои бисёрқабата, истифода аз техникаю таҷҳизот ва яроқу аслиҳаи гуногуни ҷангӣ малакаи баланди касбӣ доранд.
Маҳорати баланди онҳо, ҳамчунин дар муҳорибаҳои тан ба тан бо усули якҳарбаҳои шарқӣ ва намудҳои гуногуни гӯштии муҳорибавӣ намоиш дода шуд.
Воҳиди махсуси зиддитеррористии «Алфа»-и Кумитаи давлатии амнияти миллии Ҷумҳурии Тоҷикистон ҳамчунин дорои шуъбачаи омодасозии сагҳои хизматӣ аст, зеро ин дӯстони вафодори инсон дар гузарондани амалиётҳои зиддитеррористӣ ёварони басо моҳир ва беминнатанд.
Намудҳои зиёди техникаи махсуси ҳарбӣ ва яроқу аслиҳаи гуногунтаъинот, ки воҳиди махсуси зиддитеррористии «Алфа»- и Кумитаи давлатии амнияти миллии Ҷумҳури Тоҷикистон дар ихтиёр дорад, ба он имкон медиҳад, ки дар ҳама гуна шароити шабу рӯз ва боду ҳавои мухталифи чор фасли сол фаъолияти босамар дошта бошад.
Барои будубоши бофароғати доимӣ барои ҳайати шахсии воҳиди махсуси зиддитеррористии «Алфа»-и Кумитаи давлатии амнияти миллии Ҷумҳурии Тоҷикистон хобгоҳҳои барҳаво, ошхонаи муосиру муҷаҳҳаз, бунгоҳи тиббии дорои шароити зарурӣ бунёд ёфта, бо ҳамаи талаботи замонавӣ мутобиқ карда шудааст. Ҳамчунин онҳо дорои хобгоҳҳо, ошпазхона ва бунгоҳҳои тиббии сайёр мебошанд, то ки ҳангоми амалиётҳои дур аз қароргоҳи худ бо ҳамаи шароити зарурӣ таъмин бошанд.
Сарвари давлат Эмомалӣ Раҳмон дар назди ҳайати шахсии беш аз якунимҳазорнафараи ин воҳиди махсус суханронӣ намуда, онҳоро, пеш аз ҳама, бо солгарди 20-умини таъсисёбии он табрику таҳният гуфт.
Президенти кишвар аз солҳои аввали таъсис ва ташаккулёбии ин ва дигар воҳидҳои низомӣ ва фаъолияти онҳо дар шароити муноқишаҳои шадиди дохилӣ ёдовар шуда, бо қаноатмандӣ изҳор дошт, ки имрӯз Тоҷикистони соҳибистиқлол дар муқоиса ба он даврони носозгор дорои артиш ва неруҳои махсуси аз ҳар ҷиҳат таъмину муҷаҳҳаз, пуриқтидор ва обутобёфта мебошад, ки ҳайати шахсии онҳо бо ҳисси баланди ифтихору сарфарозӣ аз давлату давлатдории миллии худ барои ҳифзи музаффариятҳои Истиқлолияти давлатии Тоҷикистони азиз ва таъмини ҳаёти орому осоиштаи мардуми шарифи кишвар ҳамеша омодагии қавӣ доранд.
www.president.tj
