19 октябри соли 2015 баъди ифтитоҳи Маркази таълимӣ-фароғатии Вазорати корҳои дохилии Ҷумҳурии Тоҷикистон дар ноҳияи Шаҳристон барои омодабошӣ, машқу машғулиятҳои низомию махсус ва табобату тавонбахшии кормандони мақомоти ҳифзи ҳуқуқу тартибот Президенти мамлакат Эмомалӣ Раҳмон аз ноҳияи Шаҳристон ба шаҳри Истаравшан ташриф овард.
Маросими истиқболи Сарвари давлат дар шаҳри Истаравшан хеле бошукӯҳ ва самимӣ бо иштироки шумораи зиёди сокинон баргузор шуд.
Дар ин ҷо Президенти мамлакат Эмомалӣ Раҳмон нахуст бо гузоштани санги асос ва кушодани хатти обрасонӣ дар маросими оғози корҳои сохтмонӣ дар шаҳраки нави Баҳористон барои 35 ҳазор нафар аҳолии шаҳри Истаравшан ва ноҳияи Ғончӣ иштирок кард.
Нақшаи генералии шаҳраки Баҳористон аз ҷониби Корхонаи воҳиди давлатии «Лоиҳакаш»-и шаҳри Истаравшан таҳия гардида, аз тарафи Шӯрои шаҳрсозии Кумитаи меъморӣ ва сохтмони назди Ҳукумати Ҷумҳурии Тоҷикистон қабул карда шудааст.
Дар ҳудуди шаҳраки Баҳористон ба 3630 оилаи эҳтиёҷманд барои сохтмони хонаҳои истиқоматӣ, коттеҷҳо ва биноҳои баландошёна қитъаҳои замини наздиҳавлигӣ ҷудо гардидааст.
Умуман, дар шаҳраки Баҳористон мутобиқи нақшаи генералӣ бунёди бинои маъмурии шаҳрак, як беморхона, ду дармонгоҳ, чор мактаб, се варзишгоҳ, ду ҳаммом, бозор, истгоҳи нақлиёти мусофиркаш, дар майдони се гектар боғи фарҳангӣ-фароғатӣ, се боғчаи бачагона, 70 хонаи баландошёна, 98 коттеҷ ва дар ошёнаи якуми биноҳои баландошёна нуқтаҳои хизматрасонӣ пешбинӣ шудааст.
Барои рушди соҳибкорӣ ва таъсиси ҷойҳои нави корӣ дар шаҳрак бунёди минтақаи истеҳсолӣ низ дар нақша аст.
Кӯчаи асосии шаҳрак бо дарозии умумии як километр мумфарш карда, новаҳои обгузар хобонида, хатти барқ ва оби нӯшокӣ гузаронида шудааст.
Лоиҳаи таъминоти оби нӯшокии шаҳраки Баҳористон бо маблағи умумии панҷ миллион сомонӣ амалӣ гардидааст. То имрӯз ду чоҳи амудӣ кофта, ба истифода омода ва хатҳои қубури 400 мм ба масофаи 2,4 км кашида шудааст.
Корҳои сохтмонии ду ҳавзи захиравии оби нӯшокии ҳаҷмаш 1500 метри мукааб низ ба итмом расидааст.
Зимни шиносоӣ бо нақшаи асосии шаҳраки Баҳористон Президенти мамлакат таваҷҷуҳи масъулини мақомоти иҷроияи ҳокимияти давлатии шаҳри Истаравшан, ноҳияи Ғончӣ ва бинокоронро ба иҷрои корҳои босифат ҷалб намуд.
Таъкид гардид, ки ин шаҳрак бояд мутобиқ ба талаботи меъёрҳои шаҳрсозӣ хеле зебо бунёд гардад ва дар ҳақиқат ба як маркази маъмурии нав табдил ёбад.
Дар ҳамин ҷо Президенти мамлакат Эмомалӣ Раҳмон дар назди фаъолону сокинони шаҳри Истаравшан, ки барои мулоқот бо Пешвои хеш ҷамъ омада буданд, суханронӣ кард.
Сарвари давлат нахуст ба кулли сокинони заҳматқарини шаҳри Истаравшан ва ноҳияи Ғончӣ барои талошҳои созанда дар роҳи ободии Ватани маҳбуб, инчунин барои пазироии самимии Роҳбари давлат, ки баёнгари эҳсоси гарми ватандӯстиву ҷонибдорӣ аз сиёсати пешгирифтаи Давлату Ҳукумати кишвар мебошад, арзи сипос намуд.
Президенти мамлакат дар бораи ҳадафҳои роҳбарияти Давлату Ҳукумати кишвар баҳри беҳдошти сатҳи зиндагии мардум андешаронӣ карда, изҳор дошт, ки дар доираи қарорҳои Ҳукумати мамлакат тайи солҳои 2010-2015 дар вилояти Суғд 78 ҳазор оилаҳои эҳтиёҷманд, яъне қариб 500 ҳазор нафар сокинони шаҳру ноҳияҳо соҳиби қитъаҳои замини наздиҳавлигӣ гардида, шароити зисти худро беҳтар карданд.
Ба андешаи Сарвари давлат Эмомалӣ Раҳмон солҳои охир аҳолии шаҳру ноҳияҳои Хуҷанд, Бобоҷон Ғафуров, Панҷакент, Истаравшан, Ғончӣ, Ашт, Қайроққум, Чкалов ва Мастчоҳ мисли дигар шаҳру ноҳияҳои мамлакат хеле афзуда, зарурати бунёди маҳаллаҳои нави аҳолинишин бо биноҳои бисёрошёнаи муосир ба миён омадааст.
Бунёди шаҳракҳои нав имконият медиҳад, ки заминҳои бекорхобида аз худ карда шуда, ҳазорҳо оилаҳои ниёзманд дар баробари бунёди манзили истиқоматии нав соҳиби замини корам ва боғу токзор гардида, бо шуғли доимӣ ва даромади хуб таъмин шаванд.
Ҳадафи асосии Ҳукумати кишвар низ дар ин самт ба он нигаронида шудааст, ки тавассути истифодаи самараноку мақсадноки обу замин ва ба гардиши кишоварзӣ ворид намудани заминҳои бекорхобида аҳолӣ ҳар чӣ бештар ба шуғл ҷалб гардида, барои онҳо шароити мусоиди зиндагӣ фароҳам оварда шавад.
Сарвари давлат бо истифода аз фурсат дар назди ҳозирин дар бораи вазъи зудтағйирёбандаи ҷаҳон, амалҳои номатлуб, гаравидани ҷавонон ба сафи гурӯҳҳои ҷинояткор изҳори нигаронӣ карда, изҳор дошт, ки вазифаи ҳамаи мост, ки мардум ва хусусан наврасону ҷавононро аз вазъи пурмоҷарову пурҳаводиси ҷаҳон хабардор кунем, онҳоро ба роҳи рост ҳидоят намоем ва ба қадри сулҳу суботи кишвар расем.
- Ҳар яки мову шумо бояд зиракиву ҳушёрӣ ва эҳтиром кардану ҳифз намудани манфиатҳои миллату давлатро ҳеҷ гоҳ аз мадди назар дур накунем, — таъкид намуд Сарвари давлат Эмомалӣ Раҳмон.
Президенти мамлакат бо итминон иброз дошт, ки дар ояндаи наздик сокинони шаҳри Истаравшан ва ноҳияи Ғончӣ бо заҳмати аҳлона шаҳраки Баҳористонро ба диёри ободу зебо ва биёбони дирӯзаро ба гулистон табдил хоҳанд дод.
Дар охир Президенти мамлакат Эмомалӣ Раҳмон ба иштирокчиён ва дар шахси онҳо ба кулли сокинони вилояти Суғд хонаи обод, баракати рӯзгор ва барори кор орзу намуд ва таъкид кард, ки мо бо шумо — мардуми меҳнатқарин ифтихор дорем.
Баъди суханронии Сарвари давлат намояндагони касбу кори гуногун баромад карда, ба Пешвои ғамхори хеш Эмомалӣ Раҳмон барои фароҳам овардани зиндагии шоиста ва дигар заҳматҳои шабонарӯзӣ изҳори сипосу миннатдорӣ намуданд.
www.president.tj
