Барои дастгирии иҷтимоии табақаҳои осебпазири аҳолӣ, аз ҷумла маъюбон, Мақомоти иҷроияи маҳаллии ҳокимияти давлатии шаҳри Ҳисор таваҷҷуҳи хос зоҳир намуда, масъулин дар ин самт тадбирҳои судманд меандешанд.
Соли ҷорӣ барои сохтмони бинои истиқоматии панҷошёнаи Комбинати нобиноён 800 ҳазор сомонӣ ҷудо шуд.
Тибқи ҳисоботи оморӣ, ҳоло дар шаҳри Ҳисор 5107 нафар шахси маъюб, аз ҷумла, маъюбони гурӯҳи якум — 742, дуюм — 2277, сеюм – 934 ва то 18-сола 1154 нафар умр ба сар мебаранд.
Бино ба гуфтаи мудири шуъбаи ҳифзи иҷтимоии Мақомоти иҷроияи маҳаллии ҳокимияти давлатии шаҳри Ҳисор Абдураҳмон Ҳайбуллоев, барои беҳтар намудани шароити моддию иҷтимоии оилаҳои камбизоат, ятимону маъюбон ва шахсони яккаю танҳо бо дастгирии Ҳукумати Ҷумҳурии Тоҷикистон ба 4483 оилаи камбизоати шаҳри Ҳисор кумакпулии яквақта дастрас шуд.
Номбурда, инчунин иброз дошт, ки: бо кумаки Мақомоти иҷроияи маҳаллии ҳокимияти давлатии шаҳр, вакилони Маҷлиси вакилони халқи шаҳр, соҳибкорон ва фаъолони шаҳр ба 3849 маъюб кумаки моддию молиявӣ дар ҷашнҳои Наврӯз, Рамазон, Қурбон расонида, 18 маъюб бо аробачаҳои маъюбӣ таъмин шуданд.
Сайидо НАЗАРОВ,
«Садои мардум»
