Паёми шодбошии Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ба муносибати Рӯзи ҷавонони Тоҷикистон
23-юми майи соли 2024
Ҳамватанони азиз!
Ҷавонони сарбаланди меҳан!
Бо самимият ва фараҳмандӣ ҳамаи шуморо ба ифтихори Рӯзи ҷавонони Тоҷикистон, ки ҳар сол дар фасли пуртаровати баҳору зебоӣ таҷлил менамоем, табрик мегӯям.
Хушбахтона, дар марҳилаи нави таърихӣ дар Ҷумҳурии Тоҷикистон нисбат ба ҷавонон таваҷҷуҳ ва ғамхории махсус зоҳир гардида, ҷиҳати ба камол расонидани насли нави худогоҳу худшинос ва соҳибмаърифату ватандӯст саъю талоши бесобиқа анҷом дода мешавад.
Дар даврони соҳибистиқлолӣ ҷиҳати пешбурди сиёсати давлатии ҷавонон ва фароҳам овардани шароити мусоид барои инкишофи ҳамаҷонибаи онҳо як қатор ҳуҷҷатҳои барномавӣ қабул ва амалӣ гардонида шуда, барои таълиму тарбия ва ташаккули шахсияти наврасону ҷавонон тамоми имкониятҳо фароҳам оварда шуданд.
Амалигардонии иқдомоти давлату Ҳукумат барои таҳкими мақоми ҷавонон дар ҳаёти сиёсию иқтисодӣ ва иҷтимоию маънавии ҷомеа, беҳтар шудани муҳити зиндагӣ, таҳсил, шуғлу касбомӯзӣ ва фаъолияти эҷодии онҳо мусоидат намуда истодааст.
Ҷавобан ба ин ғамхорӣ имрӯз ҷавонони мо бо азму иродаи қавӣ ва бо завқи баланд илму донишҳои муосир, аз ҷумла забонҳои хориҷиро аз худ намуда, дар бахшҳои гуногуни давлат ва ҷомеа фаъолият доранд.
Ҷавонони ободпешаи диёр дар пешбурди корҳои созандагию бунёдкорӣ, ободу зебогардонии маҳал, таъсиси коргоҳу корхонаҳо ва рушди инфрасохтор саҳми арзанда мегузоранд.
Ҷавонони соҳибфарҳангу соҳибмаърифати мо бо эҳсоси баланди дӯст доштани Ватан, эҳтиром ва гиромидошти арзишҳои миллӣ Тоҷикистонро дар арсаи байналмилалӣ ба таври шоиста муаррифӣ намуда, номбардору парчамбардори муносиби меҳан гардида истодаанд.
Ҷавонони далеру ғаюри мо дар ҳар лаҳза баҳри дифои марзу бум ва ҳифзи истиқлолияти кишвар омода мебошанд.
Мусаллам аст, ки ҷавонони мо неруи ояндасози давлати соҳибистиқлол ва умеду орзуи Ватани азизамон ҳастанд.
Итминони комил дорам, ки минбаъд низ мо — ҷавонон арзишҳои бузурги миллию давлатӣ ва инсониро сармашқи кору зиндагӣ ва фаъолияти ҳамарӯзаамон қарор дода, бо ифтихор аз миллат, забон ва таъриху фарҳанги худ дар бунёди кишвари воқеан ободу пешрафта саҳмгузор хоҳем буд.
Бори дигар ҳамаи шуморо ба ифтихори Рӯзи ҷавонони Тоҷикистон табрик гуфта, ба мардуми шариф ва ҷавонони бонангу номуси Тоҷикистони азиз бахту иқбол ва зиндагии босафо орзу менамоям.
