Дар ҷаласаи Кумитаи Маҷлиси миллии Маҷлиси Олии Ҷумҳурии Тоҷикистон оид ба ҳамоҳангсозии фаъолияти Маҷлиси миллӣ бо Маҷлиси намояндагон, ҳокимияти иҷроия, иттиҳодияҳои ҷамъиятӣ, воситаҳои ахбори омма ва робитаҳои байнипарламентӣ, ки шашуми апрели соли ҷорӣ таҳти раёсати раиси он Фарҳод Раҳимӣ баргузор шуд, масъалаҳои зерин мавриди баррасӣ қарор гирифтанд: Қонуни Ҷумҳурии Тоҷикистон «Оид ба ворид намудани илова ба Қонуни Ҷумҳурии Тоҷикистон «Дар бораи вазъи ҳуқуқии вакили Маҷлиси вакилони халқи Вилояти Мухтори Кӯҳистони Бадахшон, вилоят, шаҳри Душанбе, шаҳр ва ноҳияҳо», Қарори Ҳукумати Ҷумҳурии Тоҷикистон аз 27 феврали соли 2021, №46 «Дар бораи пешниҳоди Маҷлиси вакилони халқи шаҳри Душанбе оид ба тағйир додани сарҳади ноҳияҳои Шоҳмансур, Фирдавсӣ, Сино ва Исмоили Сомонии шаҳри Душанбе», Қарори Ҳукумати Ҷумҳурии Тоҷикистон аз 27 феврали соли 2021, № 47 «Дар бораи пешниҳоди Маҷлиси вакилони халқи ноҳияи Тоҷикобод оид ба иваз намудани номи баъзе маҳалҳои аҳолинишини ноҳияи Тоҷикобод» ва Қарори Ҳукумати Ҷумҳурии Тоҷикистон аз 27 феврали соли 2021, № 48 «Дар бораи пешниҳоди Маҷлиси вакилони халқи вилояти Хатлон оид ба иваз намудани номи баъзе маҳалҳои аҳолинишини ноҳияҳои вилояти Хатлон».
Пас аз шарҳу тавзеҳи масъалаҳои зикршуда хулосаҳо қабул ва ба Маҷлиси миллии Маҷлиси Олии Ҷумҳурии Тоҷикистон пешниҳод шуданд.
Зимни ҷаласаи Кумитаи Маҷлиси миллии Маҷлиси Олии Ҷумҳурии Тоҷикистон оид ба масъалаҳои аграрӣ, шуғли аҳолӣ ва экология, ки таҳти раёсати раиси кумита Қурбон Ҳакимзода шашуми апрели соли равон доир гардид, Қонуни Ҷумҳурии Тоҷикистон «Оид ба ворид намудани тағйирот ба Қонуни Ҷумҳурии Тоҷикистон «Дар бораи ниҳолпарварӣ» баррасӣ шуд.
Баъди баёни фикру мулоҳизаҳо, хулоса қабул ва ба Маҷлиси миллии Маҷлиси Олии Ҷумҳурии Тоҷикистон пешниҳод гардид.
Шашуми апрели соли равон таҳти раёсати раиси Кумитаи Маҷлиси миллии Маҷлиси Олии Ҷумҳурии Тоҷикистон оид ба масъалаҳои иҷтимоӣ, ҳифзи сиҳатӣ, илм, маориф, фарҳанг ва сиёсати байни ҷавонону занон Маҳмадшоҳ Гулзода ҷаласа баргузор шуд.
Аъзои кумита Қонуни Ҷумҳурии Тоҷикистон «Дар бораи Академияи миллии илмҳои Ҷумҳурии Тоҷикистон» — ро мавриди баррасӣ қарор доданд.
Дар охир хулоса қабул ва барои баррасӣ ба Маҷлиси миллии Маҷлиси Олии Ҷумҳурии Тоҷикистон пешниҳод гардид.
Бурҳониддин КАРИМЗОДА,
Шариф АТОБУЛЛОЕВ,
«Садои мардум».
Суратгир Неъматулло АЛИЕВ
