8 сентябри соли 2021 дар толори Маҷмааи давлатии «Кохи Борбад»-и Дастгоҳи иҷроияи Президенти Ҷумҳурии Тоҷикистон ба истиқболи 30-юмин солгарди Истиқлолияти давлатии Ҷумҳурии Тоҷикистон ҷамъомади тантанавӣ баргузор гардид.
Тантанаи бошукӯҳи идона бо ворид шудани Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба толор ва садо додани Суруди Миллии Тоҷикистон оғоз шуд.
Дар ҷамъомади тантанавӣ аъзои Ҳукумати мамлакат, роҳбарони идораҳои давлатӣ, фаъолону собиқадорони ҷумҳурӣ, ҷавонон, намояндагони касбу кори гуногун ва сафирони кишварҳои хориҷи муқими Тоҷикистон иштирок карданд.
Сарвари давлат муҳтарам Эмомалӣ Раҳмон зимни суханронии табрикӣ Истиқлолияти давлатиро бузургтарин ва муқаддастарин неъмат, нишонаи олии ҳувияти миллӣ, ифтихор ва номуси ватандорӣ, рамзи ҳастии миллати бостонӣ ва соҳибихтиёру соҳибдавлати тоҷик ва асоси хушбахтиву сарбаландии сокинони Тоҷикистон маънидод карда, аҳли толор ва мардуми кишвар, ҳамчунин, ҳамватанону ҳамзабонони бурунмарзиро бо солгарди 30 — солагии Истиқлолияти давлатӣ таҳният гуфтанд.
Президенти мамлакат муҳтарам Эмомалӣ Раҳмон дар бораи дастовардҳои кишвар аз давраи баъди ҷанги шаҳрвандӣ, баргардонидани гурезаҳо, таъмини сулҳу ваҳдати миллӣ, рушди иқтисодиёт, барқарорсозии шохаҳои фалаҷгаштаи ҳокимият, қабули Конститутсия ва рамзҳои давлатӣ, ислоҳоти соҳаҳо ба хотири таъмини зиндагии шоистаи мардум, интихоби самтҳои асосию стратегӣ ва қабули барномаҳои давлатии стратегии рушд андешаронӣ намуданд.
Таъкид гардид, ки ҷашни сисолагии Истиқлолияти давлативу озодӣ ва бузургтарин дастоварди ин давра — сулҳу оромӣ, суботи сиёсӣ ва ваҳдати миллӣ ба мардуми шарифи Тоҷикистон ба осонӣ муяссар нашудааст. Ноил шудан ба ин дастовардҳоро Пешвои миллат муҳтарам Эмомалӣ Раҳмон ба хоҳишу талошҳои мардуми тоҷик бо ҷонибдорӣ аз сиёсати роҳбарияти Давлату Ҳукумати кишвар мансуб донистанд.
Пешвои миллат муҳтарам Эмомалӣ Раҳмон таъкид доштанд, ки маҳз татбиқи ҳадафҳои стратегии мамлакат ва амалӣ гардонидани афзалиятҳои пешбинигардида имкон дод, ки дар 20 соли охир суръати миёнаи солонаи рушди иқтисодии кишвар дар сатҳи 7,5 фоиз таъмин гардида, даромади буҷети давлатӣ аз 252 миллион сомонии соли 2000-ум то 27,6 миллиард сомонӣ дар соли 2021 афзоиш дода шавад.
Ҳаҷми Маҷмӯи маҳсулоти дохилӣ ба ҳар сари аҳолӣ дар ин давра аз 289 сомонӣ то 9 ҳазор сомонӣ расида, беш аз 30 баробар зиёд гардид.
Президенти мамлакат муҳтарам Эмомалӣ Раҳмон изҳор доштанд, ки дар натиҷаи таъмин гардидани суботи макроиқтисодӣ даромади пулии аҳолӣ аз 1 миллиард сомонии соли 2000-ум ба 65,4 миллиард сомонӣ дар соли 2020 афзуда, сатҳи камбизоатии аҳолӣ аз 83 фоизи соли 1999 то 26,3 фоиз дар соли 2019 коҳиш дода шуд. Яъне, дар бист соли охир сатҳи камбизоатӣ зиёда аз се баробар паст гардид.
Дар ин давра шумораи аҳолии кишвар аз 5,5 миллион нафар то 9,7 миллион нафар, яъне, беш аз 1,7 баробар зиёд шуда, сатҳу сифати зиндагии мардум беҳтар гардид ва дарозумрии миёнаи шаҳрвандон ба 75,1 сол расид. Соли 1991 умри миёнаи сокинони кишвар 70,1 солро ташкил мекард. Суръати афзоиши миёнаи аҳолӣ дар давоми ин солҳо 2,1 фоизро ташкил кард.
Дар даврони соҳибистиқлолӣ ба 1,4 миллион оила барои бунёди манзили истиқоматӣ 138 ҳазор гектар замин ҷудо карда шуд. Яъне, беш аз 8 миллиону 800 ҳазор нафар шаҳрванд имконият пайдо карданд, ки шароити истиқоматиро беҳтар намоянд.
Тоҷикистон, тибқи арзёбии байналмилалӣ, дар даҳ соли охир чор маротиба ба даҳгонаи кишварҳои пешсафи ислоҳотгари ҷаҳон дар самти пешбурди соҳибкориву сармоягузорӣ дохил гардид. Соҳибкорон, махсусан, ба хотири истиқболи сазовори ҷашни бузурги 30 — солагии Истиқлолияти давлатии Тоҷикистон дар бунёди беш аз 25 ҳазор иншооти истеҳсоливу иҷтимоӣ саҳм гузоштанд, ки ба ташкили даҳҳо ҳазор ҷойи нави корӣ ва ҳалли бисёр мушкилоти иҷтимоии аҳолӣ мусоидат менамояд.
Зимни суханронӣ Сарвари давлат муҳтарам Эмомалӣ Раҳмон оид ба вазъи зудтағйирёбандаи ҷомеаи ҷаҳонӣ, авзои мураккаби сиёсии кишвари ҳамсояи Афғонистон, таъсири он ба амнияти кишварҳои минтақа ва ҷаҳон мавқеи ягонаву устувори Тоҷикистонро муайян карданд. Ҳамчунин аз ҷомеаи ҷаҳон, кишварҳои сайёра ва ниҳодҳои байналмилалӣ оид ба ҳуқуқи башар қатъиян талаб карданд, ки нисбат ба тақдири мардуми ҷангзадаи афғон бетараф набошанд.
Дар охир Сарвари давлат муҳтарам Эмомалӣ Раҳмон таъкид доштанд, ки бояд мардуми тоҷик Истиқлолияти давлатӣ ва давлати мустақили Тоҷикистонро неъмати бебаҳо шумурда, онро чун гавҳараки чашм ҳифз намоянд ва ҳамеша пос доранд.
- Мо бояд минбаъд низ сарҷамъу муттаҳид бошем, неъмати қиматтарини зиндагиамон — Истиқлолияти давлативу озодиро ҳимоя кунем, дастоварди бузургтарини даврони истиқлолият — сулҳу оромӣ, суботи сиёсӣ ва ваҳдати миллиро боз ҳам таҳкиму тақвият бахшем, — таъкид намуданд Сарвари давлат муҳтарам Эмомалӣ Раҳмон.
Ҷамъомади тантанавиро ба муносибати таҷлили 30-юмин солгарди Истиқлолияти давлатии Ҷумҳурии Тоҷикистон барномаи рангини консертии ҳунармандони варзидаю ҷавон, ки таҷассумгари дастовардҳои мардуми шарифи тоҷик тайи солҳои соҳибистиқлолӣ буд, хотима бахшид.
