ДАЪВАТ БА АДЛУ ИНСОФ!
Ҳамватанони арҷманд, шукргузорем аз раҳмати Илоҳӣ, ки боз ба моҳи шарифи Рамазон расидем. Моҳе, ки рӯзадории онро Худованди меҳрубон яке аз фароизи панҷгонаи ислом гардонидааст. Ин моҳ дар Қуръони Карим ва ҳадисҳои Паёмбари гиромӣ аз беҳтарин моҳҳои сол, моҳи файзу баракат, эҳсону накукорӣ, адлу инсоф, муруввату инсондӯстӣ ва пеш аз ҳама моҳи раҳмату мағфират, озодӣ аз азоби дӯзах ва моҳи шарафмандии умматони Муҳаммад (саллаллоҳу алайҳи васаллам) дониста шудааст.
Моҳи мубораки Рамазон фурсати муносибе барои худшиносӣ, дарёфти камолоти инсонӣ, покдоманию парҳезгорӣ, имтиҳони ҷавонмардӣ ва таҳаммулгароиву қаноатмандӣ мебошад. Яке аз ҳикматҳои рӯзадории моҳи шарифи Рамазон дар баробари ҷилавгирӣ аз хӯрдану нӯшидан, ин риояи ҳатмии адлу инсоф дар кору фаъолияти ҳар як фард буда, ба соҳибкорону тоҷирон алоқамандии зиёд дорад. Зеро асосан соҳибкорону тоҷирон таъминкунандаи рӯзгори мардум мебошанд. Ниёгони бузургамон низ дар тӯли таърих маҳз бо риояи ин суннатҳои арзишманди исломӣ сатҳи зиндагии мардумро баланд бардоштаанд. Аз ин рӯ, аҳли савдою тиҷоратро зарур аст, ки дар ин моҳ қаноатмандиро пеша карда, барои дарёфт намудани ризои Худованд аз рӯйи адлу инсоф ба мардум хизматгузорӣ кунанд.
Бовари комил дорем, ки ба хотири ризоияти Худованд ва нигоҳ доштани арзишҳои муҳими ахлоқию иҷтимоӣ дар давоми моҳи шарифи Рамазон нарху навои маҳсулоти кишоварзӣ ва маводи хӯрокаро пасттар карда, дар мувозинат бо қобилияти харидории сокинони шаҳр нигоҳ медоред.
Аз фурсати муносиб истифода намуда, бо камоли эҳтиром ҳамаи Шумо — аҳли тиҷорат ва сокинони шаҳрро бо фарорасии моҳи шарифи Рамазон табрику таҳният гуфта, таманно дорем, ки тавфиқу инсоф ва ҷавонмардию саховатпешагӣ асоси кору фаъолиятамон бошад!
Бо Қарори Раиси шаҳри Душанбе №399 аз 8 июли соли 2013 ҷонибдорӣ карда шудааст.
