Бинои куҳнаю фарсуда, нарасидани техникаҳои партовкашӣ аз мушкилотест, ки солҳо боз кормандони Корхонаи давлатии фаръии «Хоҷагии манзилию коммуналии ноҳияи Ховалинг»-ро ба ташвиш овардааст.
Бино ба иттилои директори корхона Ёраҳмад Шарипов, он соли 1970 сохта шуда, таъмирталаб гардида, ҳоли табоҳ дорад.
- Аз хизматрасонии корхона 4500 муштарӣ, 25 ташкилоту муассисаҳои буҷетӣ ва 168 соҳибкори бозори маркази ноҳия истифода мебарад. Корхона худхизматрасон аст. Ҳоло дар он 20 корманд фаъолият мекунад, ки 6 нафарашон роҳрӯб буда, аз ҳисоби ҳукумати маҳаллӣ маош мегиранд. Боқӣ, маоши кормандон аз ҳисоби хизматрасонии корхона мебошад. Феълан дар тавозуни корхона як адад трактори хурд аст, ки барои кашонидани партов басандагӣ намекунад. Мушкили асосӣ набудани техника дар корхона аст, — гуфт Ёраҳмад Шарипов.
Ҳангоми боздид маълум гардид, ки бинои корхона, дар ҳақиқат, фарсудаю корношоям буда, дар ҳолати садамавӣ қарор дорад.
Кормандони корхона ҳар моҳ ба КВД фаръии «Хоҷагии манзилию коммуналӣ»-и назди Ҳукумати ҷумҳурӣ 2700 сомонӣ маблағ месупоранд. Савол ба КВД фаръии «Хоҷагии манзилию коммуналӣ» -и ҷумҳурӣ ҳамин аст, ки агар қудрати хариди техникаро надоред, пас он маблағ ба чӣ хотир аст?
Умед бар он мебандем, ки роҳбарияти КВД фаръии «Хоҷагии манзилию коммуналӣ»-и назди Ҳукумати ҷумҳурӣ якҷо бо Мақомоти иҷроияи маҳаллии ҳокимияти давлатии ноҳияи Ховалинг барои хариди техникаи корӣ ва таъмири бинои муассиса кумак мерасонанд.
Исломи РАҶАБАЛӢ,
«Садои мардум»
