Изҳороти муштараки ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон дар бораи делимитатсия ва демаркатсияи сарҳади давлатӣ байни Ҷумҳурии Тоҷикистон ва Ҷумҳурии Қирғизистон

№62-63 (4324-4325) 08.05.2021

Таджикистан-и-Кыргызстан-scaled1 — 2 майи соли 2021 дар шаҳри Ботканди вилояти Ботканди Ҷумҳурии Қирғизистон ҷаласаи якҷояи ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон оид ба делимитатсия ва демаркатсияи сарҳади давлатии Тоҷикистону Қирғизистон баргузор гардид. Дар рӯҳияи эътимоди тарафайн ва ҳамсоягии нек, бо истинод ба таърихи қадимаи ҳамзистии осоиштаи ду халқи бародар, оид ба қабули чораҳои фаврӣ, ки ба ҳалли вазъ дар сарҳади Тоҷикистону Қирғизистон равона шудаанд, эҳё ва фаъолсозии  кори Комиссияи муштарак, мубодилаи ҳамаҷонибаи афкор сурат гирифт.

Роҳбарони ҳайатҳои Ҷумҳурии Тоҷикистон ва Ҷумҳурии Қирғизистон дар бораи зарурати тасвири ҳар чӣ зудтари хатти Сарҳади давлатӣ байни Ҷумҳурии Тоҷикистон ва Ҷумҳурии Қирғизистон дар қисматҳои боқимонда пурра изҳори ҳамдигарфаҳмӣ карданд.

Ҷонибҳо ба мувофиқа расиданд, ки барои тасвири хатти лоиҳавии Сарҳади давлатӣ байни Ҷумҳурии Тоҷикистон ва Ҷумҳурии Қирғизистон дар қисматҳои аз нуқтаи сарҳадии № 43 то нуқтаи сарҳадии № 61 ва аз нуқтаи сарҳадии №135 то нуқтаи сарҳадии №141 аз ҳуҷҷатҳо ва маводи марзбандии миллию ҳудудии солҳои 1924 — 1927 ва комиссияи паритетии соли 1989 истифода мекунанд.

Ба гурӯҳҳои кории топографӣ дастур дода шуд, ки хатти лоиҳавии Сарҳади давлатӣ байни Ҷумҳурии Тоҷикистон ва Ҷумҳурии Қирғизистонро дар қисматҳои дар боло зикр­шуда аз 5 то 9 майи соли 2021 тасвир кунанд.

Ҳамчунин, бо ин, дар минтақаҳои Овчӣ — Қалъачаи ноҳияи Бобоҷон Ғафуров, Чоркӯҳ, Сомониён, Хоҷаи Аълои шаҳри Исфараи вилояти Суғди Ҷумҳурии Тоҷикис­тон, инчунин нуқтаҳои аҳолинишини Максат, Кулундуи ноҳияи Лайлак, Коктерек ва Оқсойи ноҳияҳои Бодканди Ҷумҳурии Қирғизистон гурӯҳҳои кории Тарафҳо то 17 майи соли 2021 ба иҷрои корҳои топографӣ ва тасвири хатти лоиҳавии Сарҳади давлатӣ байни Ҷумҳурии Тоҷикистон ва Ҷумҳурии Қирғизистон дар қисматҳои болозикр шурӯъ мекунанд.

Ба мувофиқа расида шуд, ки то ба итмом расидани раванди делимитатсия, демаркатсия ва барасмиятдарории қонунии Сарҳади давлатӣ байни Ҷумҳурии Тоҷикистон ва Ҷумҳурии Қирғизистон, бо мақсади ҳаракати бемамониати шаҳрвандон, убури воситаҳои нақлиёт ва молҳои Ҷумҳурии Тоҷикистон, ҷонибҳо роҳи мошингарди «Хоҷаи Аъло-Ворух»-ро дар хамгашти самти шарқии нуқтаи аҳолинишини Танги (Капчыгай) якҷоя месозанд ва ҷониби Тоҷикистон истифода ва нигоҳдорӣ мекунад. Мақоми ин роҳро созишномаи алоҳидаи давлатӣ байни ҳар ду кишвар муайян мекунад.

Барои ҳар чӣ зудтар оғоз намудани сохтмони роҳ, ба гурӯҳҳои кории топографӣ супориш дода шуд, ки якҷоя бо ташкилотҳои лоиҳакашӣ тадқиқоти саҳроии ин мавзеъро дар заминҳои истифодаи амалии минтақаи Ботканд то 1 июни соли 2021 анҷом диҳанд.

Ҷонибҳо ба мувофиқа расиданд, ки пас аз ба итмом расидани сохтмони роҳи мошингарди «Хоҷаи Аъло-Ворух» дар хамгашти шарқии нуқтаи аҳолинишини Танги (Капчыгай) ба тасвири лоиҳавии хатти Сарҳади давлатӣ байни Ҷумҳурии Тоҷикистон ва Ҷумҳурии Қирғизистон шурӯъ мекунанд.

Ҷонибҳо ба мувофиқа расиданд, ки ҷаласаи муштараки навбатӣ дар қаламрави Ҷумҳурии Тоҷикистон баргузор карда мешавад.

Аз ҳайати Ҷумҳурии Тоҷикистон                                                                                    Аз ҳайати Ҷумҳурии Қирғизистон

С. С. Ятимов                                                                                                                               К. К. Ташиев