Кумаки «Русмостранс» ба зарардидагони офати табиии Кӯлоб

№66 (4328) 18.05.2021

ФирдавсИмрӯзҳо ба сокинони аз офати табиӣ зарардидаи шаҳри Кӯлоб аз шаҳру ноҳияҳои ҷумҳурӣ  кумакҳои башардӯстона расонида мешавад. Дар баробари ин, ҳамватанони бурунмарзӣ низ ба осебдидагон дасти мадад дароз мекунанд. Аз ҷумла, Ширкати «Русмос­транс»-и Федератсияи Россия, ки сарвариашро  ҷавонмарди саховатманду ватандӯст Фирдавс Наимов ба уҳда дорад, ба 400 ­оилаи аз офати табиӣ зарардидаи шаҳри Кӯлоб 20 тонна орд, 2000 литр равған ва 2 тонна шакар тақдим намуд.

Зикр кардан бамаврид аст, ки Фирдавс Наимов чанд соли охир ба муҳоҷирони меҳнатии тоҷик дар Федератсияи Россия ҳамеша кумакҳои башардӯстона мерасонад. Аз ҷумла, ӯ чанде пеш, дар арафаи иди саиди Фитр ба 7 муассисаи ислоҳии Федератсияи Россия, ки дар онҳо аз  200 то 800 — нафарӣ ҳамватанон нигоҳ дошта мешаванд, маҳсулоти озуқа фиристод. Ба ин  иқдоми неки ӯ Зафархони Мирзоҷон ва Орифи Қодир низ ҳамроҳ шуда, ба ду муассисаи ислоҳии дигар ёрии моддӣ расониданд.

Рус 1Инчунин, барои 600 мактаббача аз оилаҳои муҳоҷирони тоҷик туҳфаҳои идона, ба 500 хонаводаи муҳоҷирони камбизоат  ва 80 донишҷӯи тоҷику афғон маҳсулоти озуқа, аз қабили равғану биринҷ, картошкаю сабзӣ, шакару хурмо, чою қаҳва, кулчақанд ва ғайра тақдим карда шуд. Ҳамин гуна ёрмандӣ ба як хона – интернат низ ирсол гардид.

- Маро бисёр вақт дӯстони соҳибкорам ба меҳмонӣ даъват мекунанд. — Дар дастархон аз анвои гуногуни хӯрданӣ ҷойи холӣ намеёбӣ. Мутаассифона, баъди гузаштани ид ва маросими меҳмондорӣ қисми зиёди маҳсулоти масрафнашударо ба қуттии партов ҳаво медиҳанд. Чунин исрофкорӣ дар ҳолест, ки ҳазорон нафар ба луқмаи нон эҳтиёҷ доранд. Аз ин рӯ, ҳамеша аз ҳамватанон хоҳиш мекунам, ки ба ҷойи роҳ додан ба исрофкорӣ ба дармондаю муҳтоҷон мадад расонанд, — мегӯяд Фирдавс Наимов.

109775148_272522464014423_879011725840124279_nШиркати «Русмостранс» на танҳо дар моҳи шарифи Рамазон ва иди саиди Фитр, балки тамоми сол, аз ҷумла дар давраи пандемияи коронавируси COVID-19 низ, иқдомҳои  хайриявиро ба роҳ монда буд.

С. СУННАТӢ,

«Садои мардум»