Як сол мешавад, ки мо, истиқоматкунандагони бинои 28 маҳаллаи 19 шаҳри Хуҷанд, барои пешгирӣ аз қонуншиканӣ талош дорем.
Моҳи январи соли 2019 дар пайравӣ аз дастуру супоришҳои Пешвои миллат оид ба обод кардани маҳалли зист тасмим гирифтем дар майдончаи назди бинои истиқоматиамон, ки партовгоҳ буд, майдончаи футбол ва бозии кӯдакон бунёд намоем. Бо ин мақсад ба МИМҲД шаҳри Хуҷанд бо мактуб муроҷиат кардем. Моҳи марти соли 2019 мактуби расмии МИМҲД шаҳр таҳти № 5/19-437 бо имзои муовини раиси шаҳр А. Раҳматзода ба мо расид, ки дар он барои оғози корҳои ободонӣ иҷозат дода шуд. Моҳи июни соли гузашта бо харҷи зиёда аз 100 ҳазор сомонӣ маблағи сокинон сохтмони майдончаҳоро ба итмом расонидем.
Чанд рӯз нагузашта, соҳибкори инфиродӣ Олимов Содиқҷон Солиҷонович аз шаҳри Истаравшан ба маҳалла омада, даъво кард, ки ин минтақа бо қарори раиси шаҳри Хуҷанд, № 446 аз 18 июни соли 2019 барои сохтмони бинои баландошёна ҷудо шудааст.
Мо ба Прокуратураи шаҳри Хуҷанд муроҷиат кардем. Аз номи прокурори шаҳр А. Н. Назарзода таҳти №8/493 а19 аз 15 июли соли 2019 ҷавоб омад. Дар он гуфта мешавад, ки «омӯзиши қарори мазкур нишон дод, ки зимни интихоб ва додани қитъаи замини мазкур талаботи қонунгузорӣ риоя нагардида, ҳуқуқу манфиатҳои ҳифзшавандаи сокинони бинои № 28, маҳаллаи 19 ба таври ҷиддӣ поймол шудааст».
Дар асоси эътирози прокурори шаҳр қарори мазкур 19 июли соли 2019 таҳти № 530 бекор шуд. Дар ин бора ба мо бо имзои муовини раиси шаҳр А. Раҳматзода нома таҳти № 5/19-2650 аз 29 июли соли 2019 расид ва мо сохтмонро идома додем.
Баҳси мазкур дар Суди иқтисодии вилоят низ мавриди баррасӣ қарор гирифт. Суди иқтисодӣ дар асоси ҳалномаи худ аз 15 ноябри соли 2019 таҳти №1-482/2019 даъвои моро асоснок ва қонунӣ ҳисобид.
Соҳибкор С. Олимов бошад, аз болои ҳалномаи Суди иқтисодии вилоят ба Суди Олии кишвар шикояти кассатсионӣ кард. Суди Олии мамлакат бо таъиноти худ аз 11 феврал парвандаи №1-482/19, № 4-36/20 шикояти кассатсионии соҳибкор С. Олимовро, бинобар беасос будан, бе баррасӣ монд.
Ҳоло соҳибкор С. Олимов даъво дорад, ки баррасии аризаи кассатсиониаш бе иштироки ӯ баргузор шудаасту ғайриқонунӣ мебошад. Ҳол он ки дар таъиноти Суди Олии кишвар дар ин бора чунин оварда шудааст: «Намояндаи шикояткунанда, соҳибкори инфиродӣ Олимов Содиқҷон ба маҷлиси суди марҳилаи кассатсионӣ бе сабабҳои узрнок ҳозир нагардид, инчунин аз ҷониби онҳо дар бораи баррасӣ намудани шикояти кассатсионӣ дар ғоибашон аризаи хаттӣ пешниҳод нагардидааст».
С. Олимов ҳоло ҳам моро ором намегузорад, ҳарчанд биное, ки ӯ сохтанӣ аст, ба талабу меъёрҳои амалкунандаи сохтмон ҷавобгӯ нест. Бар замми ин, аз ин ҷо шоҳқубури оби нӯшокӣ ва партов гузаштааст, ки иқтидори обгузаронии ин қубурҳо барои аз ин беш басанда нест. Иловатан, дар ҳолати бунёди бинои истиқоматӣ байни бинои сохташаванда ва бинои мо 15 метр ҷой мемонаду халос, ки тибқи талабот қатъиян манъ аст. С. Олимов иддао дорад, ки дар ҷойи иншооти мо навашро сохта медиҳад. Магар дар 15 метр ҷой чизе сохтан мумкин аст?! Оё беҳтар нест, ки тибқи маслиҳати Суди Олии кишвар С. Олимов иншоотро дар ягон макони озоду ноободи шаҳр амалӣ созад?!
Бо эҳтиром Р. Турсунов, А. Нормуҳаммедов
