- Дар Донишгоҳи байналмилалии забонҳои хориҷии Тоҷикистон ба номи Сотим Улуғзода 13 ихтисоси нави ба талаботи бозори меҳнат ҷавобгӯ таъсис дода шуд. Ихтисосҳои нав дар зинаи бакалавр ва магистратура буда, аз ҷумла 6 ихтисос дар равияи омӯзгорӣ, 1 ихтисос дар соҳаи рӯзноманигорӣ ва 1 ихтисос тарҷумонӣ аст. Дар соли таҳсили 2025-2026 довталабон аз рӯи ин ихтисосҳо ба донишгоҳ қабул карда мешаванд, — хабар дод ректори донишгоҳ Жило Гулназарзода дар нишасти матбуотӣ.
Аз шаш забони ҷаҳонӣ, ки аз ҷониби Созмони Милали Муттаҳид эътироф шудаанд, то имрӯз ду забон — испанӣ ва италиявӣ дар донишгоҳ омӯзонда намешуд. «Аз ин рӯ, тасмим гирифтем омӯзиши ин забонҳоро роҳандозӣ намоем»,- афзуд ректори донишгоҳ.
Зикр гардид, ки соли 2024 ба донишгоҳ 316 нафар ба гурӯҳҳои буҷетӣ ва 1244 нафар ба шартномавӣ қабул шудаанд, ки дар қиёс ба ҳамин давраи соли 2023-юм 10 дарсад зиёд мебошад. Дар ин муддат, ҳамчунин, 105 воҳиди корӣ таъсис ёфт.
Бо мақсади дар амал татбиқ намудани дастуру супоришҳои Президенти мамлакат муҳтарам Эмомалӣ Раҳмон дар назди донишгоҳ гимназия ва маркази инкишофи кӯдак таъсис дода шуд, ки соли аввали фаъолият 204 нафар ба таҳсил фаро гирифта шудаанд.
М. СОЛИҲЗОДА,
«Садои мардум»
