Дар нишасти матбуотии Агентии стандартизатсия, метрология ва нозироти савдои назди Ҳукумати Ҷумҳурии Тоҷикистон иттилоъ дода шуд, ки соли 2024 низ бозори истеъмолӣ аз маҳсулоти пастсифат эмин нигоҳ дошта шуда, эътимоди шаҳрвандон ба ин ниҳод афзоиш ёфтааст. Бемайлон афзудани муроҷиати мардум дар робита ба нақзи ҳуқуқи истеъмолӣ ба «Тоҷикстандарт» далели ин гуфтаҳо арзёбӣ гардид.
Роҳбарияти агентӣ изҳори қаноатмандӣ карданд, ки дар заминаи тавсеаи корҳои фаҳмондадиҳӣ сатҳи масъулиятшиносии соҳибкорон беҳтар гардида, тибқи дархости даҳҳо соҳибкор ба анбори нигоҳдории муваққатии агентӣ зиёда аз 225 000 кг маҳсулоти гуногуни хӯрокворӣ, ки муҳлати истеъмолашон гузаштааст, супорида шуд.
Соли 2024 дар озмоишгоҳҳои санҷиш ва андозагирии воситаҳои ченаки агентӣ 438 466 воситаи ченак аз санҷиш гузаштаанд, ки нисбат ба ҳамин давраи соли пешин 66230 адад зиёд мебошад. Аз ин 303 803 ададро воситаҳои ченаке ташкил медиҳанд, ки ҳангоми баҳисобгирии сӯзишворию неруи барқ истифода мешаванд.
Маълум гардид, ки соли 2024 озмоишгоҳҳои ташхиси маҳсулоти нефтии агентӣ дар 5396 ҳолат 1 159 986 тонна маҳсулотро аз ташхис гузаронида, дар 78 ҳолат 220,6 тонна сӯзишворӣ (аз рӯи нишондоди адади октанӣ, миқдори сулфур ва таркиби фраксионӣ) ва антифриз (аз рӯи ҳарорати яхбандӣ) ғайристандартӣ эътироф шуд.
Бо назардошти таҷрибаи дигар давлатҳо муаллифи сатрҳо пешниҳод намуд, ки бамаврид аст, агар «Тоҷикстандарт» барои таҳияи феҳристи соҳибкорони бовиҷдони мамлакат иқдом намояд. Масъулин ин пешниҳодро хуб пазируфта таъкид намуданд, ки соҳибкоронро ҳамаҷониба дастгирӣ бояд кард, то ҳавасманд шаванду беш аз пеш баҳри рушди мамлакат саҳмгузорӣ намоянд.
Д. АБДУЛЛО,
«Садои мардум»
