Соли 2024 аз фурудгоҳҳои байналмилалии Тоҷикистон ба кишварҳои хориҷи дуру наздик ширкати ҳавопаймои ватанӣ ва 12 ширкати ҳавопаймоии хориҷӣ мунтазам парвоз намуда, ба 3 миллиону 362 ҳазор мусофир хизмат расондаанд, ки нисбат ба соли пеш 8,6 дарсад кам мебошад. Дар ин бора директори Агентии авиатсияи граждании назди Ҳукумати Ҷумҳурии Тоҷикистон Ҳабибулло Назарзода зимни нишасти матбуотӣ иттилоъ дод.
Бино ба гуфти ӯ, дар ин давра Фурудгоҳи байналмилалии Душанбе аз ҳама бештар хизмат расонидааст. Дар ин фурудгоҳ ба 2 миллиону 338 ҳазор мусофир хизмат расонида шуд, ки нисбат ба соли 2023-юм 5 дарсад зиёд аст. Ҳамчунин, дар ин давра бор ва почтаи аз ҷониби терминали боркашонии фурудгоҳ қабулгардида 2614,4 тоннаро ташкил дод, ки 346,8 тонна бори содиротӣ ва 2614,4 тонна бори воридотӣ мебошад.
Иттилоъ гирифтем, ки соли сипаришуда КВД «Тоҷикаэронавигатсия» ба 71 ҳазору 459 ҳавопаймо хизмат расонидааст, ки нисбат ба соли 2023-юм 37,8 дарсад зиёд мебошад. Сабаби зиёд шудани парвозҳо ба афзудани ҷуғрофияи парвозҳо ва зиёдшавии парвозҳои транзитӣ аз ҷониби ширкатҳои ҳавопаймоии ватаниву хориҷӣ вобаста мебошад. Дар ин давра 48 ҳазору 562 парвози транзитӣ анҷом дода шудааст, ки 87 дарсад зиёд мебошад.
Ширкати ҳавопаймоии «Тоҷик эйр» моҳи октябри соли 2024 дар хатсайри Душанбе — Хоруғ ва моҳи январи соли равон дар хатсайрҳои Душанбе-Кӯлоб ва Душанбе-Панҷакент парвозҳои мунтазам оғоз намуда, нақша дорад, ки дар оянда ба дигар минтақаҳои ҷумҳурӣ, аз ҷумла дар хатсайрҳои Душанбе — Ванҷ, Душанбе — Рашт ва Душанбе — Лахш, низ парвозҳоро ба роҳ монад.
Ш. АТОБУЛЛОЕВ,
«Садои мардум»
