Дуюми апрели соли 2018 Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Президенти Ҷумҳурии Арабии Миср Абдулфаттоҳ ас-Сиси барқияи табрикӣ ирсол намуданд, ки дар он, аз ҷумла, омадааст:
«Ҷаноби Олӣ!
Лутфан табрикоти самимии ин ҷонибро ба муносибати пирӯзиатон дар интихоботи Президенти Ҷумҳурии Арабии Миср бипазиред.
Ба Шумо саломатии комилу саодат ва дар маснади сермасъули роҳбари давлат комёбиҳои рӯзафзун баҳри таъмини рифоҳу шукуфоии мардуми дӯсти Миср орзумандам.
Итминон дорам, ки тайи давраи нави фаъолияти давлатии Шумо кишварҳои ба ҳам дӯсти мо муколамаи созандаро чӣ дар сатҳи дуҷониба ва чӣ дар арсаи байналмилалӣ ба манзури густариши бештари ҳамкориҳояшон дар ҳамаи соҳаҳои мавриди таваҷҷуҳи тарафайн, аз ҷумла иқтисоду тиҷорат, илму маорифу фарҳанг ва мубориза бо хатару таҳдидҳои ҷаҳонӣ, идомаи самарабахш хоҳанд бахшид.
Бо истифода аз фурсати нек омодагии ҷониби Тоҷикистонро барои саъю талошҳои муштарак дар ҷодаи таъмиқу тавсеаи муносибатҳои дӯстӣ ва ҳамкориҳои гуногунҷанбаи Тоҷикистону Миср муҷаддадан таъкид менамоям».
www.president.tj
