27 октябри соли 2015 зимни иштирок дар тантанаҳои ҷашнӣ Сарвари давлат Эмомалӣ Раҳмон бо корҳои анҷомёфта ва ҷараёни барқарорсозии симои таърихии Мамнуъгоҳи таърихиву фарҳангииҚалъаи Ҳисор низ бевосита шинос шуд.
Дар саҳни назди қалъа Пешвои созандаю бунёдкор ва ободгару ваҳдатовари миллат Эмомалӣ Раҳмонро мардуми Ҳисори шодмон ва аҳли илму фарҳанги кишвар бо тантанаҳои бошукӯҳи идона истиқбол гирифтанд.
Тавре зикр гардид, Қалъаи Ҳисор муҳимтарин иншооти ин ҷашни таърихӣ ба шумор меравад, зеро мавҷуд будани ин Мамнуъгоҳи таърихиву фарҳангӣ аз таъриху фарҳанги бостону пурғановати шаҳрсозии водии Ҳисор ва умуман мардуми тоҷик гувоҳӣ медиҳад.
Тавре иттилоъ доданд, бо маблағгузории мутамаркази ҷумҳуриявӣ таҳти назари олимону мутахассисони Академияи илмҳои Ҷумҳурии Тоҷикистон, Вазорати фарҳанги Ҷумҳурии Тоҷикистон ва дигар муассисаҳои илмию фарҳангии кишвар аз ҷониби бинокорони моҳир барқарорсозии симои таърихии ин ёдгории бостонӣ ба роҳ монда шудааст. Дар ҷараёни барқарорсозӣ деворҳои атрофи қалъа, дарвозаю аркҳои он, чойхона бо сад ҷойи нишаст, ҳавзи дохил, шаш адад айвони суҳбатгоҳ, сарбозхона, амфитеатр бо 700 ҷойи нишаст, даҳ адад дӯконҳои гуногун барои ҳунармандон ва дигар иншооти дорои аҳамияти таърихии он бунёд ва навсозӣ шудаанд.
Ҳамзамон дар ин ҷо олимони бостоншиносу таърихнигор бо ҳафриёту тадқиқоти илмию амалӣ машғуланд. Натиҷаи бозёфтҳои олимон гувоҳӣ аз он медиҳад, ки Қалъаи Ҳисор таърихи тӯлонӣ дошта, аз қарнҳои биринҷӣ маншаъ мегирад ва аз нуҳ қабати таърихӣ иборат аст.
Зимни боздид Сарвари давлат Эмомалӣ Раҳмон ба корҳои анҷомёфта баҳои баланд ва барои идомаи корҳои созандагӣ супоришҳои мушаххас дод. Ҳамзамон таъкид дошт, ки тамоми корҳо бояд бе расонидани осеб ба ёдгориҳои таърихию фарҳангӣ анҷом дода шаванд.
Маврид ба ёдоварист, ки аз таърихи тоҷикон ва водии Ҳисор, махсусан Қалъаи Ҳисор, на танҳо мардуми кишвар, балки ҷаҳониён воқифанд. Корҳои созандагиву ободкорӣ ва нигаҳдории ёдгориҳои таърихӣ, ки бо таваҷҷуҳи махсус ва ғамхории Сарвари давлат Эмомалӣ Раҳмон анҷом меёбанд, ҷалби сайёҳону дӯстдорони таъриху фарҳанги бостонии тоҷиконро беш аз пеш кардаанд. Барои навсозии Мамнуъгоҳи таърихиву фарҳангии Қалъаи Ҳисор 13 миллиону 224 ҳазор сомонӣ маблағ ҷудо гардида буд, ки то ба имрӯз 12 миллиону 989 ҳазор сомонӣ барои иҷрои корҳои сохтмонӣ сарф карда шудааст. Масоҳати умумии иншооти бунёдёфтаю барқароргашта 19,8 гектарро ташкил медиҳад. То ба имрӯз дар ҳамаи зериншоотҳо корҳои сохтмонию пардоздиҳӣ анҷом ёфтааст. Ободонии гирду атрофи қалъа пурра анҷом ёфта, тамоми имконот барои сайёҳони дохилу хориҷ фароҳам оварда шудааст.
www.president.tj
