3 октябр дар идомаи сафари корӣ дар шаҳри Турсунзода Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо нашъунамои токзори Хоҷагии деҳқонии «Ватан» шинос шуданд.
Ҳадафи сафари Пешвои муаззами миллат ба шаҳри Турсунзода ва ташриф ба Хоҷагии деҳқонии «Ватан» шиносоӣ аз рафти иҷроиши «Барномаи давлатии рушди соҳаи боғу токпарварӣ», татбиқи амалии супоришҳои Президенти мамлакат оид ба истифодаи самараноки заминҳои наздиҳавлигӣ, бунёди боғҳои наву барқарор кардани боғҳои куҳна, кишти такрорӣ, афзоиши истеҳсоли маҳсулоти кишоварзӣ, захираи зарурии маводи хӯрокворӣ, таъсиси ҷойҳои нави корӣ, таъмини бозорҳои дохилӣ ва содироти меваҷот ба хориҷи мамлакат мебошад.
Дар хоҷагии «Ватан» Сарвари давлат муҳтарам Эмомалӣ Раҳмон нахуст бо намоиши маҳсулоти истеҳсолкардаи хоҷагӣ, аз қабили навъҳои гуногуни ангур, сабзавот ва дигар зироатҳо шинос шуданд.
Хоҷагии деҳқонии «Ватан» соли 2008-ум таъсис ёфта, дорои 45 гектар замин мебошад.
Хоҷагӣ 165 нафар саҳмдоронро сарҷамъ намуда, дар токзори он 10 намуд, асосан ангурҳои навъи «Президент», «Истиқлол», «Ҳусайнии сиёҳу сафед», «Ғалаба», «Шоҳона», «Пешпазак» ва «Кишмиши сиёҳу сафед» парвариш карда мешавад. Бояд гуфт, ки аз соли 2020 дар Хоҷагии деҳқонии «Ватан» парвариши навъи нави ангури «Президент» ба роҳ монда шуд.
Роҳбарии хоҷагии «Ватан»-ро деҳқони ботаҷриба ва токпарвари шинохтаи ҷумҳурӣ Неъматҷон Усмонов ба ӯҳда дорад.
Хоҷагии деҳқонии «Ҳоҷӣ Неъмат», ки муассисаш Неъматҷон Усмонов мебошад, дар майдони 105 гектар замин доман паҳн намудааст ва 95,6 гектари онро токзори замонавӣ ташкил медиҳад.
Коргарони хоҷагӣ аз ангурҳои навъи «Президент», «Ғалаба», «Шоҳона», «Пешпазак» ва «Кишмиши сиёҳу сафед» ҳосили хуб ба даст меоранд.
Аз руи маълумоти боғдорон 70 фоизи заминҳои токзорро ангури навъи «Ҳусайнӣ» ташкил мекард, акнун бинобар талабот ба навъҳои боз ҳам беҳтари ангур боғдорон токи ангурҳоро иваз карда, ба ҷойи «ҳусайнӣ» — «ламбарҷинӣ» ва «аватар»-ро, ки бештар барои содирот нигаронида шудааст, шинонида истодаанд.
Дар токзори хоҷагӣ ҳамчунин ба таври таҷрибавӣ навъҳои «Чиликӣ» ва «Кардинал», ки аз Ҷумҳурии Мардумии Чин оварда шудааст, парвариш меёбанд.
Соли ҷорӣ дар баробари таъмини бозори дохилӣ хоҷагӣ беш аз 1750 тонна маҳсулоти хушсифати ангурро ба хориҷи кишвар содирот намуд. Тибқи шартномаи ҳамкорӣ боғдорон ҳосили ба даст овардаи худро асосан ба Федератсияи Русия ва Ҷумҳурии Қазоқистон мефиристанд.
Таҷрибаи наве, ки дар хоҷагӣ ҷорӣ шудааст, хушк кардани ангур мебошад, ки бо риояи технологияи махсус амалӣ мегардад. Асосан боғдорон 50 фоизи ҳосили ангури навъи «ғалаба»-ро хушк карда, ба хориҷи кишвар ва ба бозорҳои дохили ҷумҳурӣ мебароранд.
Дар хоҷагӣ барои беталаф нигоҳ доштани маҳсулот ва дар ҳама фаслҳои сол ба мардум пешниҳод кардани ангури тару тоза сардхона бунёд гардида, ғунҷоиши он беш аз 600 тоннаро ташкил медиҳад. Барои беталаф нигоҳ доштани ҳосил бунёди боз як сардхонаи дигар бо ғунҷоиши 150 тонна идома дорад.
Аз тарафи роҳбарияти хоҷагии «Ватан» дар деҳоти Ҷура Раҳмон, деҳаи Янгибоғ як бунгоҳи муосири тиббӣ бо тамоми таҷҳизот ва бо шаш ҷойи кор бунёд карда шудааст, ки ба мардум хизмат мерасонад.
Президенти мамлакат муҳтарам Эмомалӣ Раҳмон бо натиҷаҳои кори боғдорон шинос шуда, барои парвариши ҳосили хуб, таъсиси ҷойҳои корӣ, таъмини бозори дохилӣ бо маҳсулоти хушсифати кишоварзӣ ва боло бурдани иқтидори содиротии шаҳри Турсунзода, анҷоми корҳои хайр ва саҳм гузоштан дар ободонии як гӯшаи диёр ба роҳбарияти хоҷагӣ изҳори сипос карданд.
