18 октябри соли 2022 дар шаҳри Душанбе Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кори Конфронси байналмилалии «Ҳамкории байналмилалӣ ва минтақавӣ оид ба амният ва мудирияти сарҳад ҷиҳати муқовимат ба терроризм ва пешгирӣ аз таҳарруки террористон» иштирок ва суханронӣ карданд.
Дар он намояндагони воломақоми расмии кишварҳои аъзои Созмони Милали Муттаҳид, ниҳодҳои Паймони ҷаҳонии зиддитеррористии Созмони Милали Муттаҳид, созмонҳои байналмилалӣ ва минтақавӣ, ташкилотҳои ҷомеаи шаҳрвандӣ ва коршиносони соҳаи таъмини бехатарии сарҳадот иштирок карда, роҳҳои таҳкими ҳамкории байналмилалӣ ва минтақавӣ оид ба амният ва мудирияти сарҳад барои муқовимат ба терроризм ва пешгирӣ аз ҳаракати террористҳоро баррасӣ карданд.
Конфронс дар ҳамкорӣ бо Созмони Милали Муттаҳид, Созмони амният ва ҳамкорӣ дар Аврупо, Иттиҳоди Аврупо ва дигар шарикони байналмилалӣ баргузор шуда, он идомаи мантиқии «Раванди Душанбе» мебошад, ки моҳи майи соли 2019 зимни аввалин конфронси минтақавии Дафтари зиддитеррористии Созмони Милали Муттаҳид якҷо бо Ҳукумати Ҷумҳурии Тоҷикистон оғоз гардид.
Чорабиниро муовини Дабири кулли Созмони Милали Муттаҳид, Роҳбари Дафтари зиддитеррористии Созмони Милали Муттаҳид Владимир Воронков ифтитоҳ кард.
Президенти мамлакат муҳтарам Эмомалӣ Раҳмон зимни суханронӣ роҳбарони ҳайатҳои бонуфузи кишварҳои аъзои Созмони Милали Муттаҳид ва дигар ташкилоту созмонҳоро ба Тоҷикистон хайрамақдам гуфтанд.
Сарвари давлат муҳтарам Эмомалӣ Раҳмон бо итминон изҳор доштанд, ки зимни ин ҳамоиш масъалаҳои таъмини амният, мудирияти сарҳад ва муқовимати муассир ба ифротгаройиву терроризм, бахусус пешгирии таҳарруки террористон тавассути сарҳадҳо, ҳамаҷониба баррасӣ гардида, аз натиҷаи он қарорҳои мушаххас қабул карда мешаванд.
Таъкид гардид, ки тайи солҳои охир доираи хатару таҳдидҳои аз терроризму ифротгаройӣ бароянда мунтазам васеъ гардида, ин зуҳуроти харобиовар боиси оқибатҳои даҳшатбор мегардад ва фаъолияти созмону гурӯҳҳои террористиву ифротгаро хусусияти афзояндаи фаромарзиву фаромиллӣ касб менамояд.
Президенти мамлакат изҳор доштанд, ки Тоҷикистон дар хатти аввали мубориза бо хатари ифротгароиву терроризм қарор дошта, на танҳо минтақа, балки қаламравҳои фаротар аз онро аз оқибатҳои фалокатбори ин зуҳурот ҳимоя мекунад.
Ҳукумати Тоҷикистон, бо дарназардошти вазъи мураккаби минтақа, ба таҳкими доимии ҳифзи сарҳади давлатӣ таваҷҷуҳи хоса зоҳир намуда, барои пешгирӣ кардани интиқоли фаросарҳадии ҷангҷӯёни террорист, қочоқи маводди мухаддир, силоҳ ва дигар ҷиноятҳои фаромиллӣ тадбирҳои зарурӣ меандешад. Бахусус, ба мақсади такмил додани раванди муҳофизати сарҳади давлатӣ ҳанӯз соли 2010 «Стратегияи миллии идора намудани сарҳад» ва нақшаи амали онро доир ба ислоҳоти низоми таъмини амнияти сарҳад барои давраи то соли 2025 бо мусоидати шарикони байналмилалӣ қабул намуд.
Барои таъмин намудани амнияти минтақа ва ҷаҳон ба таври мунтаззам пешгирӣ кардани чунин раванд ва оқибатҳои фоҷеабори он аз ҷумлаи иқдомоти шадидан зарур дониста мешаванд.
Сарвари давлат муҳтарам Эмомалӣ Раҳмон таъкид доштанд, ки мо умед дорем, ки кишварҳои ҷаҳон дар ҳамбастагӣ муқовимати муассирро бар зидди ин зуҳуроти номатлуб роҳандозӣ мекунанд ва дар роҳи пешгирӣ кардани таҳарруки террористҳо, интиқоли онҳо аз як минтақа ба минтақаи дигар, дарку фаҳмиши омилҳои таҳрикдиҳандаи терроризм, инчунин таҳияи мавқеи ягона нисбат ба мафҳумҳои ифротгароӣ ва терроризм комёб мегарданд.
Дар охир Президенти мамлакат муҳтарам Эмомалӣ Раҳмон бори дигар ба кори конфронс барору комёбӣ ва натиҷаҳои неку назаррасро орзу карда, изҳори итминон намуданд, ки кишварҳо ва созмонҳо ҷиҳати баланд бардоштани сатҳи огоҳӣ, дониш ва таҳкими иқтидори давлатҳо дар мубориза бо терроризм мувофиқи механизмҳои мавҷуда ҳамкории зичро ба роҳ мемонанд.
Сипас, Дабири кулли Созмони Милали Муттаҳид Антонио Гутерриш ва Дабири кулли Созмони амният ва ҳамкорӣ дар Аврупо хонум Хелга Шмид бо навори видеоӣ ба иштирокчиёни чорабинӣ муроҷиат карда, ба кори конфронс барору комёбӣ орзу намуданд.
Кори Конфронси байналмилалии «Ҳамкории байналмилалӣ ва минтақавӣ оид ба амният ва мудирияти сарҳад ҷиҳати муқовимат ба терроризм ва пешгирӣ аз таҳарруки террористон» дар бахшҳои алоҳида идома ёфта, интизор меравад, ки аз руи натиҷаи он «Эъломияи Душанбе оид ба амният ва мудирияти сарҳад ҷиҳати муқовимат ба терроризм ва пешгирӣ аз ҳаракати террористҳо» қабул гардад.
