23 июли соли 2013 ба Президенти кишвар Эмомалӣ Раҳмон раисони ноҳияҳои Тавилдара, Ховалинг, Муъминобод, Восеъ, Мир Сайид Алии Ҳамадонӣ ва Фархор телефонӣ ҳисобот доданд.
Зимни ҳисобот таваҷҷуҳи асосӣ ба рафти ҷамъоварии ҳосили маҳсулоти кишоварзӣ, хусусан ғалладона ва ба роҳ мондани кишти такрорӣ дар заминҳои корами обӣ ва омодагии ҷиддӣ ба зимистон зоҳир карда шуд. Сарвари давлат супориш дод, ки барои таъмини фаровонӣ дар бозори истеъмолӣ, хусусан дар моҳи шарифи Рамазон ва ҳамчунин фаровон захира намудани маводи ғизоӣ барои зимистон, аз ҳар ваҷаб замини корам ва ҳамаи имконоти дигари мавҷуда пурсамар истифода баранд. Ҳамчунин таъкид намуд, ки дар моҳи шарифи Рамазон ва арафаи иди саиди Фитр ба табақаҳои ниёзманди аҳолӣ, хусусан ятимону бепарасторон, пирону барҷомондагон, маъюбон ва оилаҳои камбизоат дасти кӯмак дароз кунанд.
Эмомалӣ Раҳмон дар назди раисони ноҳияҳои номбурда доир ба иҷрои саривақтии буҷети давлатӣ, таҳлили натиҷаҳои ин кор дар нимсолаи якуми соли равон ва андешидани тад-бирҳо барои бартараф намудани камбудиҳои мавҷуда вазифаҳои мушаххас гузошт. Дастуру супоришҳо, ҳамчунин доир ба вусъат додани корҳои ободонӣ, бунёдкорию созандагӣ, муҳайёсозии ҷойҳои нави корӣ, омодасозии иншооти соҳаи маориф ба соли нави хониши 2013-2014 ва ҳамчунин ба зимистони пешомад дода шуд.
www.president.tj
