28 феврали соли 2018 таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Ҳукумати кишвар муҳтарам Эмомалӣ Раҳмон маҷлиси Ҳукумати Ҷумҳурии Тоҷикистон баргузор гардид.
Нахуст гузориши раиси Кумитаи давлатии идораи замин ва геодезӣ «Оид ба Ҳисобот дар бораи заминҳои мавҷуда, тақсимоти онҳо аз рӯи гурӯҳҳо, намудҳои замин ва заминистифодабарандагони ҷумҳурӣ ба ҳолати 1 январи соли 2018» шунида шуд.
Таъкид гардид, ки марзи маъмурии Ҷумҳурии Тоҷикистон то1 январи соли 2018 нисбат ба ҳолати 1 январи соли 2017 бетағйир мондааст. Дар истифодаи корхонаю ташкилоти кишоварзӣ 6 миллиону 960 ҳазору 741 гектар, аз ҷумла 681 ҳазору 413 гектар замини обӣ қарор дорад. Дар соли 2017- ум 1 ҳазору 720 гектар замини партови обӣ ба гардиши кишоварзӣ ворид ва ба заминҳои корами обӣ дохил карда шудааст.
Аъзои Ҳукумати кишвар 8 лоиҳаи қонун ва 1 хулосаи Ҳукумати Ҷумҳурии Тоҷикистон, аз ҷумла «Дар бораи пешниҳоди хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи сармоягузорӣ» — ро баррасӣ карда, ба Маҷлиси намояндагони Маҷлиси Олии Ҷумҳурии Тоҷикистон пешниҳод намуданд.
Дар маҷлиси Ҳукумати Ҷумҳурии Тоҷикистон «Дар бораи пешниҳоди Маҷлиси вакилони халқи вилояти Суғд оид ба номивазкунии баъзе маҳалҳои аҳолинишини шаҳрҳои Истаравшан, Конибодом ва ноҳияи Бобоҷон Ғафуров» қарори дахлдор қабул карда шуд. Инчунин, лоиҳаҳои қарорҳои Ҳукумати Ҷумҳурии Тоҷикистон «Дар бораи «Барномаи рушди иҷтимоию иқтисодии шаҳри Душанбе барои давраи то соли 2018 — 2020», «Дар бораи «Барномаи давлатии тарбияи ватандӯстӣ ва таҳкими ҳувияти миллии ҷавонони Тоҷикистон барои солҳои 2018 — 2022», «Дар бораи «Барномаи рушди сайёҳӣ дар Ҷумҳурии Тоҷикистон барои солҳои 2018-2020» ва «Дар бораи «Тартиби гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон» мавриди баррасӣ қарор гирифтанд.
Лоиҳаи Қарори Ҳукумати Ҷумҳурии Тоҷикистон «Дар бораи «Барномаи рушди иҷтимоию иқтисодии шаҳри Душанбе барои давраи то соли 2018-2020» ҳамчун ҳуҷҷати асосӣ самтҳои афзалиятнок ва сиёсати ояндаи рушди иҷтимоию иқтисодии шаҳри Душанбе барои давраи то соли 2025 — ро муайян намуда, ҷиҳати ноил шудан ба рушди устувори иқтисодӣ, дастрасии аҳолӣ ба хизматрасонии заминавии иҷтимоӣ, инфрасохтори мутобиқ, коҳиш додани сатҳи камбизоатӣ ва инчунин зиёд шудани табақаи миёнаи аҳолии шаҳр заминаи мусоид хоҳад гузошт.
Мавриди зикр аст, ки лоиҳаи ин қарор бо мақсади иҷрои банди 1 Нақшаи чорабиниҳо оид ба иҷрои дастуру супоришҳои Президенти Ҷумҳурии Тоҷикистон, ки дар вохӯрӣ бо масъулону фаъолони шаҳри Душанбе 15 феврали соли 2017 баён доштанд, таҳия гардидааст.
Мақсад аз таҳияи лоиҳаи қарор «Дар бораи «Барномаи рушди сайёҳӣ дар Ҷумҳурии Тоҷикистон барои солҳои 2018-2020» такмил додани заминаҳои меъёрии ҳуқуқӣ ва таҳлилу банақшагирии фаъолона ҷиҳати таъмини рушди соҳаи сайёҳии Ҷумҳурии Тоҷикистон, ба талаботи низоми воридшавӣ ва мутобиқ сохтани соҳаи мазкур ба бозори ҷаҳонии хизматрасониҳои сайёҳӣ мебошад.
Ҳадаф аз таҳияи лоиҳаи Қарори Ҳукумати Ҷумҳурии Тоҷикистон «Дар бораи «Барномаи давлатии тарбияи ватандӯстӣ ва таҳкими ҳувияти миллии ҷавонони Тоҷикистон барои солҳои 2018-2022» тарбияи маънавию ҷисмонии ҷавонон, инкишофи ҳисси ватандӯстӣ, ҳифзи амният, таҳкими истиқлолият ва ободии Ватан, эмин нигоҳ доштани насли ҷавон аз таҳдидҳои замони муосир мебошад.
Асосгузори сулҳу ваҳдати миллӣ — Пешвои миллат, Президенти кишвар, Раиси Ҳукумати Ҷумҳурии Тоҷикистон муҳтарам Эмомалӣ Раҳмон ба аъзои Ҳукумат ва роҳбарони сохторҳои давлатӣ оид ба татбиқи лоиҳаи қарорҳои Ҳукумат ва қонунҳои ҷумҳурӣ, инчунин иҷрои дигар масъалаҳои дар маҷлис баррасигардида дастурҳои мушаххас доданд.
Ба Ҳукумати мамлакат, раиси шаҳри Душанбе ва роҳбарони мақомоти иҷроияи маҳаллии ҳокимияти давлатии шаҳру ноҳияҳо низ оид ба корҳои ободонию созандагӣ дар кишвар, бахусус, дар пойтахти мамлакат, омодагии ҳамаҷониба ва арзанда ба ҷашну идҳои умумимиллӣ, аз ҷумла Наврӯзи байналмилалӣ, чорабиниҳои сатҳи минтақавию ҷаҳонӣ, ки соли 2018 дар пойтахти кишвар баргузор мегарданд, вусъати корҳои саҳроӣ, дар сатҳи зарурӣ доир кардани киштукори баҳорӣ, ташкили намоиш — фурӯши маҳсулоти кишоварзӣ, ба роҳ мондани ҳашарҳои умумӣ баҳри таъмини тозагии муҳити зист супоришҳои зарурӣ дода шуд.
www.president.tj
