Иттилоия

14 майи соли 2018 дар Маҷмааи давлатии «Қасри миллат» таҳти раёсати Асосгузори сулҳу ваҳдати миллӣ — Пешвои миллат, Президенти мамлакат, Раиси Ҳукумати Ҷумҳурии Тоҷикистон муҳтарам Эмомалӣ Раҳмон маҷлиси Ҳукумати кишвар баргузор шуд, ки дар он роҳбарият ва аъзои Ҳукумати ҷумҳурӣ, Роҳбари Дастгоҳи иҷроияи Президенти Ҷумҳурии Тоҷикистон, роҳбарони як қатор сохторҳои давлатӣ иштирок карданд.

Президенти мамлакат муҳтарам Эмомалӣ Раҳмон оид ба раванди иҷрои дастуру супоришҳои қабландодаи Ҳукумати Ҷумҳурии Тоҷикистон, омодагии ҳамаҷониба барои дар сатҳи баланд таҷлил кардани ҷашни умумимиллӣ — 30 — солагии Истиқлолияти давлатии Ҷумҳурии Тоҷикистон ва ҳадафу аҳамияти баргузории мулоқот бо намояндагони ҷомеаи кишвар дар арафаи моҳи шарифи Рамазон андешаронӣ карданд.

Раванди тағйирёбии иқлим, пайомад ва таъсири он ба иқтисодиёти мамлакат, таҳкими амнияти давлату миллат дар шароити зудтағйирёбандаи ҷомеаи ҷаҳонӣ, таъмини волоияти қонун, пешгирӣ ва мубориза бар зидди ҳама гуна ҷинояткорию қонуншиканӣ, вусъати корҳои созандагию ободонӣ, ҳифзи солимии аҳолӣ, дуруст ба роҳ мондани ташхису табобат, таъмиру тармим ва бунёди муассисаҳои тандурустӣ, махсусан марказҳои саломатӣ, бунгоҳҳои тиббӣ, дасти мадад дароз кардан ба табақаҳои эҳтиёҷманд, дар маҷмӯъ фароҳам овардани шароити арзандаи зиндагӣ барои шаҳрвандон аз масъалаҳои муҳими мулоқоти Пешвои миллат бо намояндагони ҷомеаи кишвар буд.

Бо дарназардошти муҳимияти масъалаҳои дар вохӯрӣ баррасишуда Сарвари давлат дар назди аъзои Ҳукумати кишвар, масъулини сохторҳои давлатӣ ва мақомоти марказии ҳокимияти давлатии шаҳру ноҳияҳо баҳри таҳияи нақшаи чорабиниҳо аз рӯйи натиҷаҳои мулоқот ва дар амал татбиқ кардани дастурҳои зикршуда супоришҳо доданд.

Пешвои миллат таваҷҷуҳи аъзои Ҳукуматро ба масъалаи ҷонибдории аҳолӣ аз ҳадафҳои созанда ҷалб карда, дастур доданд, ки бо мақсади амалӣ намудани хоҳишу талошҳои мардум мусоидати фаъол намоянд.

Ёдовар мешавем, ки зимни баромади худ соҳибкорони ватандӯсти ҷумҳурӣ ташаббус пеш гирифтанд, ки бо ҷонибдорӣ аз сиёсати неку ояндадори роҳбарияти Давлату Ҳукумат дар корҳои созандагию бунёдкорӣ тавассути таъмиру тармим ва сохтмони роҳҳо, мактабҳо, марказҳои тандурустӣ, бунгоҳҳои тиббӣ ва дигар иншооти зарурӣ фаъолона иштирок мекунанд.

Ҳамчунин, ба масъулини мақомоти марказӣ ва маҳаллии ҳокимияти давлатӣ оид ба ҳалли масъалаҳои иҷтимоӣ, таълиму тарбияи насли наврас дар роҳи хештаншиносию ватанпарастӣ, бунёди муассисаҳои муосири таълимӣ, китобхона, ҳаммомҳо бо сартарошхонаву кошонаи ҳусн, боғу гулгаштҳо ва ҷойҳои сайру истироҳати оммавӣ, корхонаҳои истеҳсолӣ, аз ҷумла коргоҳҳои дӯзандагӣ, истеҳсоли маснуоти ҳунарҳои мардумӣ дар ҳар як ҷамоати деҳоти кишвар, бо оби босифати ошомиданӣ таъмин намудани аҳолӣ ва таъмири роҳи байни деҳаҳо, риояи муқаррароти қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» ва «Дар бораи танзими анъана ва ҷашну маросим дар Ҷумҳурии Тоҷикистон», супоришҳо дода шуданд.

Аъзои ҳукумат, сохторҳои давлатӣ ва роҳбарони мақомоти иҷроияи ҳокимияти давлатӣ аз Сарвари давлат доир ба ҷоннок кардани корҳои тарғиботию ташвиқотӣ дар байни аҳолӣ ва анҷоми тадбирҳои мушаххас оид ба волоияти қонун, пешгирии ҷинояту ҷинояткорӣ, ба Ватан баргардонидани фарзандони онҳое, ки дар муассисаҳои таълимии динии кишварҳои хориҷӣ ғайриқонунӣ таҳсил мекунанд, таъмини амнияти давлату миллат ва ҳифзи солимии ҷомеа низ дастур гирифтанд.

Чун мулоқоти Сарвари давлат муҳтарам Эмомалӣ Раҳмон бо намояндагони ҷомеаи кишвар дар арафаи моҳи Рамазон баргузор гардид, зимни вохӯрӣ ба масъалаҳои анҷом додани тадбирҳои хайру савоб, дароз кардани дасти сахо ба эҳтиёҷмандон, ятимону камбизоатон, ғамхорӣ нисбат ба падару модар, хоҳару бародарони хеш таваҷҷуҳи махсус дода шуд.

Дар анҷом Президенти мамлакат ба Ҳукумати кишвар ва мақомоти иҷроияи маҳаллии ҳокимияти давлатии шаҳру ноҳияҳо дар бобати андешидани тадбирҳои мушаххас оид ба таъсири тағйирёбии иқлим ба иқтисодиёти кишвар, дарёфти роҳҳои баромадан аз вазъияти баамаломада, захираи кофии анвои ғизоӣ, хӯроки чорво ва дигар маҳсулоти кишоварзӣ супоришҳои мушаххас доданд.