30 июни соли 2014 таҳти раёсати Президенти Ҷумҳурии Тоҷикистон, Раиси Ҳукумати кишвар Эмомалӣ Раҳмон маҷлиси навбатии Ҳукумати Ҷумҳурии Тоҷикистон баргузор гардид.
Дар оғози маҷлис Нақшаи кори Ҳукумати Ҷумҳурии Тоҷикистон барои нимсолаи дуюми соли 2014 тасдиқ карда шуд.
Дурнамои нишондиҳандаҳои асосии макроиқтисодии Ҷумҳурии Тоҷикистон барои солҳои 2015-2017 маъқул дониста шуд. Тибқи ин санад, Маҷмӯи Маҳсулоти Дохилӣ дар соли 2015 дар ҳаҷми 52,8 миллиард сомонӣ бо суръати афзоиши 7,2 фоиз пешбинӣ шудааст. Дар солҳои 2016 ва 2017 бошад, ин нишондиҳандаҳо мутаносибан ба андозаи 60 миллиард ва 68,4 миллиард сомонӣ, яъне 7,2 фоиз ва 7,4 фоиз дар назар аст.
Барои муқоиса зикр гардид, ки Маҷмӯи Маҳсулоти Дохилӣ дар соли равон ба андозаи 46,3 миллиард сомонӣ бо суръати афзоиши 7,1 фоиз пешбинӣ шудааст.
Сатҳи таваррум барои соли 2015-ум 7,5 фоиз ва қурби миёнасолии асъори миллӣ нисбат ба 1 доллари амрикоӣ 5 сомонӣ пешбинӣ шудааст. Қурби асъори миллӣ нисбат ба 1 доллари амрикоӣ дар солҳои 2016 ва 2017 мутаносибан ба андозаи 5,05 ва 5,10 сомонӣ дар назар аст.
Вазорати молияи кишвар вазифадор шуд, ки ҳангоми таҳияи Буҷети давлатӣ барои ин солҳо нишондодҳои дурнамои мазкурро ба инобат бигирад.
Сипас, ҳисоботи раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон оид ба рафти иҷрои «Барномаи рушди футбол барои солҳои 2012-2016» шунида шуд. Тавре зикр гардид, барномаи мазкур дар асоси супориши Президенти Ҷумҳурии Тоҷикистон дар мулоқот бо варзишгарони кишвар, ки 20 декабри соли 2010 баргузор шуда буд, таҳия, қабул ва мавриди татбиқ қарор гирифтааст. Дар давраи татбиқи барнома дар ҷумҳурӣ 19 варзишгоҳ ва 100 майдони гуногуни футбол бунёд ёфта, таваҷҷуҳ ба ин бахши муҳими варзиш афзун гардид. Дар 103 мактаби варзишии кишвар 603 гурӯҳи футбол ташкил шудааст, ки ба онҳо 5756 футболбоз ва 261 мураббӣ шомил мебошанд. Фаъолияти панҷ мактаби махсуси футбол ва Академияи футбол низ назаррас номида шуд.
Ҳоло Тоҷикистон дар рейтинги байналмилалии ФИФА миёни 208 кишвари ҷаҳон дар ҷойи 113 қарор дорад, ки ин нисбат ба соли 2011-ум 41 зина боло мебошад. Дар миёни кишварҳои Осиё бошад, Тоҷикистон дар ҷойи 19 қарор дорад.
Сарвари давлат Эмомалӣ Раҳмон таъкид дошт, ки барои таъмини оммавияти ҳамаи бахшҳои варзишу тарбияи ҷисмонӣ, хусусан рушди футбол, дар ҷумҳурӣ аз тамоми имкону захираҳои мавҷуда васеъ истифода бояд кард.
Зимни муҳокимаи лоиҳаи «Барномаи давлатии такмили омӯзиши забонҳои русӣ ва англисӣ барои солҳои 2015-2020» Президенти кишвар Эмомалӣ Раҳмон ба ин масъала таваҷҷуҳи хос зоҳир намуда, доир ба таъмини пурраи муассисаҳои таълимӣ бо омӯзгорони ин фанҳо ва ҳамчунин баланд бардоштани сифати таълим ба масъулин супоришҳои мушаххас дод. Дастур дода шуд, ки лоиҳаи як бинои иловагии таълимӣ дар Донишкадаи давлатии забонҳои Тоҷикистон ба номи Сотим Улуғзода таҳия ва ба Ҳукумати Ҷумҳурии Тоҷикистон пешниҳод карда шавад.
«Барномаи давлатии рушд ва татбиқи технологияҳои иттилоотию коммуникатсионӣ барои солҳои 2014-2017», «Қоидаҳои гузарондани аттестатсияи ҷойҳои корӣ аз рӯйи шароити меҳнат» ва «Қоидаҳои ҳамоҳангсозии фаъолияти мақомоти назораткунандаи гузаргоҳҳои автомобилӣ тариқи сарҳади гумрукии Ҷумҳурии Тоҷикистон» аз рӯйи принсипи «Истгоҳи ягона» тасдиқ карда шуд.
Тағйиру иловаҳо ба Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият», Кодекси мурофиаи ҳуқуқвайронкунии маъмурии Ҷумҳурии Тоҷикистон ва Кодекси мурофиавии ҷиноятии Ҷумҳурии Тоҷикистон маъқул дониста шуда, ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод гардид.
Дар фароварди маҷлис Сарвари давлат Эмомалӣ Раҳмон аз болобарии сунъии нархи маводи ғизоӣ, хусусан гӯшт, дар моҳи шарифи Рамазон изҳори нигаронӣ карда, барои муайян намудани сабабҳои асосии ин раванд ва бартарафсозии ин ҳолати номатлуб ба масъулин супоришҳои мушаххас дод. Таъкид гардид, ки дар моҳи шарифи Рамазон, мувофиқи расму оин ва суннатҳои мусулмонӣ, нархҳо бояд арзон карда шаванд, на баръакс.
www.president.tj
