Бистуми майи соли ҷорӣ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо иштироки Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ, роҳбарони як қатор сохторҳои марказии кишвар ва вазорату идораҳои ҷумҳуриявӣ машварати корӣ доир намуданд.
Дар машварат нахуст масъалаи бартараф намудани оқибати офатҳои табиӣ дар минтақаҳои гуногуни кишвар, таъмиру боз намудани роҳҳои осебдида ва расондани кумакҳои зарурӣ ба мардуми зарардида баррасӣ шуд.
Сарвари давлат муҳтарам Эмомалӣ Раҳмон доир ба ин масоил ва ҳамчунин, барои иҷрои супоришҳои рӯзи 9 март дар мулоқот бо фаъолон, намояндагони ҷомеа ва ходимони дини кишвар додашуда, аз ҷумла барои таъмини волоияти қонун ва амну суботи устувор дар ҷомеа, ба масъулин супоришҳои мушаххас доданд.
www.prezident.tj
