23 октябри соли 2013 Президенти кишвар Эмомалӣ Раҳмон доир ба масоили омодагӣ ба таҷлили 3000-солагии Ҳисор машварати корӣ доир намуд.
Машварати корӣ бо иштироки аъзои Кумитаи тадорукот доир ба омодагӣ ва таҷлили ин ҷашн, аъзои Ҳукумати кишвар ва роҳбарони ташкилоту муассисаҳои дахлдори ҷумҳуриявӣ ва ҳамчунин роҳбарону фаъолон ва соҳибкорони бонуфузи ноҳияи Ҳисор баргузор шуд.
Тавре зикр гардид, ҷашни 3000-солагии Ҳисор моҳи сентябри соли 2015 таҷлил мегардад. Дар доираи омодагӣ ба ин ҷашн аз ҳисоби буҷети ҷумҳуриявӣ ва дигар сарчашмаҳои марказии маблағгузорӣ, буҷети маҳаллӣ ва соҳибкорони ноҳияи Ҳисор садҳо иншооти нави замонавӣ бунёд ёфта, ҳазорон ҷойҳои нави корӣ муҳайё мегардад.
Доир ба рафти иҷрои нақшаи чорабиниҳои омодагӣ ба ҷашн муовини раиси Кумитаи тадорукот, муовини Сарвазири кишвар Муродалӣ Алимардон, раиси ноҳияи Ҳисор Усмон Сабзов ва дигар шахсони масъул ҳисобот доданд.
Чунонки иттилоъ дода шуд, варзишгоҳи бузурги марказӣ бо 20 ҳазор ҷойи нишаст, мактаби президентӣ, чанд мактаби таҳсилоти миёнаи умумӣ, беморхонаи нави марказӣ ва якчанд иншооти дигари тиббӣ, китобхонаю осорхона, боғи марказии фарҳангию фароғатӣ бо чойхонаи миллӣ аз ҷумлаи иншооте мебошанд, ки бо маблағгузории ҷумҳуриявӣ бунёд хоҳанд ёфт. Дар ин муҳлат мушкили норасойи оби ошомиданӣ ва навсозии шабакаи обу корези маркази ноҳия бартараф шуда, зеристгоҳи барқии 220 киловолта бунёд хоҳад ёфт. Беш аз 130 иншооти дигар, аз ҷумла корхонаҳои истеҳсолӣ аз ҷониби соҳибкорони ноҳия сохта, ба кор дароварда хоҳанд шуд.
Президенти кишвар Эмомалӣ Раҳмон таъкид дошт, ки «ҳадафи асосӣ аз таҷлили ҷашни 3000-солагии Ҳисор ҳифзи ёдгориҳои таърихию фарҳангии ин диёри маъруфи бостонӣ, ободу зебо намудани он ва ба шаҳри зебои муосир табдил додани маркази ноҳия аст». Тавре иттилоъ дода шуд, барои таҳти васоёи ЮНЕСКО таҷлил намудани ин ҷашни таърихию фарҳангӣ ба ин созмон дархости Ҳукумати кишвар фиристода шудааст.
Роҳбарону фаъолон ва соҳибкорони ноҳияи Ҳисор ва ҳамчунин роҳбарони сохторҳои масъули ҷумҳуриявӣ қавл доданд, ки барои дар сатҳи матлуб омодагӣ дидану таҷлил намудани ин ҷашнвораи пурифтихор аз тамоми имкону захираҳои мавҷуда пурсамар истифода мебаранд. Аз нақшаҳои иштироки худ дар ободонии ноҳияи Ҳисор, аз ҷумла соҳибкорони бонуфузи ин водии файзбор Ҷамшед Зиёев, Маҳмадӣ Тӯраев, Неъмат Қурбонов, Рустам Саидов, Ашӯралӣ Раҳматзода, Мавҷуда Ҳакимова ва Асадулло Абдуллоев изҳори андеша карданд. Тавре зикр гардид, танҳо аз ҷониби як соҳибкор Рустам Саидов дар маркази ноҳияи Ҳисор як мактаб, ду кӯдакистон, як бинои шашошёнаи истиқоматӣ ва як шаҳраки замонавии иборат аз 187 хонаҳои истиқоматии ду ва сеошёна бунёд меёбад. Ашӯралӣ Раҳматзода бошад, азм дорад, ки як терминали калони нақлиётӣ, як меҳмонхонаи дорои 200 ҷойи хоб ва як силсила биноҳои нуҳошёна бунёд намояд. Соҳибкорзани маҳаллӣ Мавҷуда Ҳакимова бошад, то имрӯз иншооти зиёд бунёд намуда, то таҷлили 3000 -солагии Ҳисор боз якчанд корхонаи дигар бунёд карданӣ аст.
Сарвари давлат Эмомалӣ Раҳмон ба ҳамаи соҳибкорони ташаббускор, хусусан ба ин бонуи соҳибзавқ, арзи сипос карда, таъкид дошт, ки дар омодагӣ ба ин ҷашни пурифтихор тамоми мардуми ноҳия, бахусус соҳибкорони он бояд саҳмгузор бошанд. -Омодагӣ бояд аз ҳар як хона, кӯча, деҳа, деҳот ва тамоми ҳудуди ноҳия оғоз ёбад, — изҳор дошт Сарвари давлат Эмомалӣ Раҳмон.
www.president.tj
