26 январи соли 2018 миёни Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Молдова Игор Додон ба муносибати 25-умин солгарди барпо намудани робитаҳои дипломатии ду кишвар мубодилаи барқияҳои табрикӣ сурат гирифт.
Дар барқияи табрикии Президенти Ҷумҳурии Тоҷикистон муҳтарам Эмомалӣ Раҳмон ба унвони Президенти Ҷумҳурии Молдова Игор Додон омадааст:
«Муҳтарам Игор Николаевич!
Бо камоли самимият Шуморо ба муносибати санаи муҳим дар таърихи муосири муносиботи Тоҷикистон ва Молдова — 25-солагии истиқрори равобити дипломатӣ байни кишварҳоямон табрик мегӯям.
Боиси қаноатмандист, ки тайи ин давра муносибатҳои дӯстӣ ва ҳамкорӣ миёни Тоҷикистон ва Молдова дар асоси дуҷониба ва ҳам дар чорчӯби сохторҳои бисёрҷонибаи байналмилаливу минтақавӣ хислати рушди пайгиронаро доштанд.
Изҳори итминон менамоям, ки бо такя ба таҷрибаи андӯхтаи мусбат равобити байнидавлатии ду кишвар дар маҷрои манфиатҳои аслии мардумонамон минбаъд низ тавсеаву таҳким хоҳанд ёфт.
Муҳтарам ҷаноби Президент, ба Шумо сиҳатмандии комилу комёбиҳои нав дар фаъолияти давлатиатон, сулҳу созгорӣ ва рифоҳ ба мардуми дӯсти Молдова таманно менамоям».
Дар барқияи табрикии Президенти Ҷумҳурии Молдова Игор Додон ба унвони Президенти Ҷумҳурии Тоҷикистон Эмомалӣ Раҳмон омадааст:
«Муҳтарам ҷаноби Президент!
Шуморо сидқан бо 25 — солагии истиқрори муносибатҳои дипломатии миёни Ҷумҳурии Молдова ва Ҷумҳурии Тоҷикистон табрику таҳният мегӯям.
Тайи солҳои сипаригашта кишварҳои мо ба хотири тавсеаву таъмиқи ҳамкориҳои байнидавлатӣ, ки дар фазои ҳусни тафоҳум, эҳтиром ва муколамаи созанда рушд меёбанд, кори зиёдеро анҷом доданд.
Бо истифода аз фурсати фароҳамшуда мехостам изҳори итминони комил намоям, ки муносибатҳои анъанавии дӯстӣ ва шарикии баробарҳуқуқи миёни кишварҳоямон минбаъд низ дар самтҳои мухталиф бомуваффақият рушд хоҳанд кард.
Ба Шумо, муҳтарам ҷаноби Президент, дар фаъолияти масъулиятноки давлатиатон дастовардҳои намоёни навин ва ба мардуми дӯсти тоҷик сулҳу ризоят ва шукуфоӣ орзумандам».
www.president.tj
