25-уми январи соли 2024 дар Маҷмааи давлатии «Қасри миллат» Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон муовини Сарвазир, вазири корҳои хориҷии Ҷумҳурии Қазоқистон Мурат Нуртлеуро, ки бо сафари расмӣ дар Тоҷикистон қарор дорад, ба ҳузур пазируфтанд.
Дар мулоқот доираи васеи масъалаҳои ҳамкории Тоҷикистон ва Қазоқистон мавриди баррасӣ қарор гирифт. Тамоюли тавсеаи устувори шарикии стратегии ҳар ду давлат, инчунин, ба сатҳи ҳампаймонӣ баровардани онҳо бо қаноатмандӣ таъкид гардид.
Сарвари давлати мо рушд ва таҳкими муносибатҳои дӯстона ва ҳамкорӣ бо Ҷумҳурии Қазоқистонро авлавияти тағйирнопазири сиёсати хориҷии Тоҷикистон номиданд.
Пешвои миллат аз натиҷаҳои баланди соли гузашта ёдовар шуда, самарабахш будани равобити Тоҷикистону Қазоқистонро дар соли равон таъкид карданд.
Ҷонибҳо аз рушди самарабахши минбаъдаи ҳамкориҳои судманди ҳар ду кишвар дар чунин соҳаҳои иқтисод, ба монанди тиҷорат, саноат, энергетика ва бахши агросаноатию сармоягузорӣ, инчунин, дар соҳаҳои сайёҳӣ, фарҳанг ва маориф ҷонибдорӣ намуданд.
Дар мулоқот, ҳамчунин, доир ба чорабиниҳои сатҳи дуҷониба ва бисёрҷониба, ки соли равон ба нақша гирифта шудаанд, табодули афкор намуда, масъалаҳои муҳими рӯзномаи байналмилалӣ ва минтақавӣ баррасӣ гардиданд.
www.prezident.tj
