23 июни соли 2021 Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳбарони ҳайатҳо — иштирокчиёни вохӯрии 16-уми котибони шӯроҳои амнияти кишварҳои аъзои Созмони ҳамкории Шанхайро ба ҳузур пазируфтанд.
Дар мулоқот мушовири Сарвазири Ҳиндустон оид ба масъалаҳои амнияти миллӣ Довал Аджит, ёрдамчии Президент — котиби Шӯрои амнияти Ҷумҳурии Қазоқистон Асет Исекешев, котиби Шӯрои амнияти Ҷумҳурии Қирғизистон Марат Иманкулов, мушовири Сарвазири Ҷумҳурии Исломии Покистон оид ба масъалаҳои амнияти миллӣ Юсуф Моид, котиби Шӯрои амнияти Федератсияи Россия Николай Патрушев, котиби Шӯрои амнияти Ҷумҳурии Тоҷикистон Насрулло Маҳмудзода, муовини котиби Шӯрои амнияти Ҷумҳурии Ӯзбекистон Бобур Усманов ва директори Кумитаи иҷроияи сохтори минтақавии зиддитеррористии СҲШ Ҷумахон Ғиёсов иштирок карданд.
Президенти мамлакат муҳтарам Эмомалӣ Раҳмон таъкид доштанд, ки Тоҷикистон ҳамчун раиси кунунӣ дар Созмони ҳамкории Шанхай ба нишасти сарони шӯроҳои амнияти кишварҳои аъзо аҳамияти калон медиҳад.
Зимни суҳбат масоили ҳамкорӣ дар муборизаи дастаҷамъона бар зидди шиддати таҳдидҳои терроризми байналмилалӣ, экстремизм, сепаратизм, радикализми динӣ, хатарҳои афзоиши ҷинояткории муташаккилонаи фаромиллӣ, аз ҷумла гардиши ғайриқонунии силоҳ ва маводи мухаддир, мавриди баррасӣ қарор дода шуданд.
Таъкид гардид, ки Кумитаи иҷроияи сохтори минтақавии зиддитеррористии Созмони ҳамкории Шанхай метавонад дар таъмини амнияти минтақавӣ ва таҳкими робитаҳои кишварҳои аъзо дар мубориза бо таҳдиду хатарҳои ҷаҳони муосир нақши муҳим дошта бошад.
Инчунин, ҳамкории кишварҳои аъзо дар самти таъмини амнияти боэътимоди иттилоотӣ, муборизаи муштарак бар зидди ҷиноятҳои киберӣ ва вобаста ба вазъи пандемияи коронавирус масъалаҳои амнияти биологӣ ва озуқаворӣ низ баррасӣ гардиданд.
Ҳамчунин, вазъи ҳозираи низомиву сиёсии Афғонистон ва тамоюлҳои ташвишовари шиддат гирифтани он мавриди таваҷҷуҳи ҷонибҳо қарор дошт.
Дар охир Президенти мамлакат муҳтарам Эмомалӣ Раҳмон ба иштирокчиёни вохӯрии 16-уми котибони шӯроҳои амнияти кишварҳои аъзои Созмони ҳамкории Шанхай барори кор орзу карда, бо итминон изҳор доштанд, ки натиҷаҳои мулоқот дар марҳилаи муҳими омодагӣ ба Саммити Душанбе дар соли 2021 пурсамар хоҳанд буд ва барои пешрафти масъалаҳои амнияти минтақавӣ ва ҷаҳонӣ хидмат хоҳанд кард.
