Мулоқоти Пешвои миллат бо Маулен Ашимбаев

№58 (4478) 14.05.2022

52070340614_8d461b0a92_o13 майи соли 2022 дар Маҷмааи давлатии «Қас­ри миллат»-и Дастгоҳи иҷроияи Президенти Ҷумҳурии Тоҷикистон Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Раиси Сенати парламенти Ҷумҳурии Қазоқистон Маулен   Ашимбаевро, ки бо даъвати Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо сафари расмии ҷавобӣ дар Тоҷикистон қарор дорад, ба ҳузур пазируфтанд.

Дар ҷараёни мулоқот маҷмӯи васеи масъалаҳои ҳамкории ҳар ду кишвар мавриди баррасӣ қарор дода шуд.

Президенти Ҷумҳурии Тоҷикистон муҳтарам Эмомалӣ Раҳмон изҳор доштанд, ки рушди муносибатҳои шарикии стратегии Тоҷикистону Қазоқистон самти афзалиятноки сиёсати хориҷии Тоҷикистон буда, ба анъанаҳои деринаи дӯстӣ, ҳусни тафоҳум ва дастгирии ҳамдигар асос ёфтаанд.

Аз робитаи кишварҳо, бахусус муколамаи боэътимоди сатҳи олии сиёсӣ ва ҳамкории созанда, изҳори қаноатмандӣ карда шуд.

Инчунин, масъалаҳои ҳамкории Тоҷикистону Қазоқистон дар соҳаҳои сиёсӣ, тиҷоратию иқтисодӣ ва робитаҳои байнипарламентӣ баррасӣ гардиданд.

Таъкид гардид, ки Қазоқистон яке аз шарикони асосӣ дар сохтори тиҷорати хориҷии кишвар мебошад ва гардиши мол соли гузашта қариб 30 фоиз афзуда, ба зиёда аз як миллиард доллари америкоӣ расид.

Ҷонибҳо, ҳамчунин, ба таҳкими ҳамкорӣ дар соҳаҳои фарҳангию гуманитарӣ ва маориф таваҷҷуҳ зоҳир карданд.

Дар самти ҳамкории кишварҳо дар чаҳорчӯбаи ташкилотҳои минтақавию байналмилалӣ масъалаи таъмини амният дар минтақа баррасӣ гардида, ҷонибҳо атрофи масъалаҳои мубрами минтақавию глобалӣ, аз ҷумла қазияи Афғонистон, мубодилаи афкор намуданд.

www.president.tj