24 феврали соли 2022 Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Бохтар бо роҳбарон ва фаъолони вилояти Хатлон мулоқот карданд.
Сарвари давлат муҳтарам Эмомалӣ Раҳмон бо натиҷагирӣ аз дастовардҳои сокинони вилоят дар соли таҷлили 30 — юмин солгарди Истиқлолияти давлатӣ дар назди роҳбарияти мақомоти иҷроияи ҳокимияти давлатии вилоят ва шаҳру ноҳияҳои он барои татбиқи ҳадафҳои стратегии кишвар, амалисозии барномаҳои давлатӣ, аз ҷумла «Стратегияи миллии рушд барои давраи то соли 2030» ва «Барномаи миёнамуҳлати рушд барои солҳои 2021 – 2025» вазифаҳои мушаххас гузоштанд.
Зикр шуд, ки тайи се соли охир дар шаҳру ноҳияҳои вилоят беш аз 8300 иншоот бо таъсиси зиёда аз 40 ҳазор ҷойи кор сохта ба истифода дода шудааст.
Президенти мамлакат муҳтарам Эмомалӣ Раҳмон натиҷаҳои рушди иқтисодию иҷтимоии вилояти Хатлонро ҳамаҷониба таҳлил карда, таъкид намуданд, ки суръати иҷрои барномаҳои рушди иҷтимоиву иқтисодии вилоят ва шаҳру ноҳияҳои он дар соли 2021 ба талабот ҷавобгӯ набуда, сатҳи татбиқи лоиҳаҳои пешбинишуда дар қиёс бо нақшаҳо хеле паст мебошад.
Вобаста ба ин, Сарвари давлат муҳтарам Эмомалӣ Раҳмон ба мақомоти иҷроияи ҳокимияти давлатии вилояти Хатлон ва шаҳру ноҳияҳои он супориш доданд, ки якҷо бо вазорату идораҳои марбута иҷрои сифатноку саривақтии лоиҳаҳои дар барномаҳои рушди иҷтимоиву иқтисодии вилоят ва шаҳру ноҳияҳо воридшударо таъмин намуда, банақшагирии рушди иҷтимоиву иқтисодиро воқеъбинона ва бо дарназардошти ҳадафи саноатикунонии босуръати кишвар ба роҳ монанд.
Дар замони соҳибистиқлолӣ барои таъмин намудани рушди бахшҳои иқтисодиёти вилояти Хатлон ва баланд бардоштани сатҳу сифати зиндагии аҳолӣ аз ҳисоби ҳама сарчашма беш аз 63 миллиард сомонӣ маблағ равона гардидааст.
Дар ин давра танҳо барои дастгирии буҷети шаҳру ноҳияҳои вилоят аз ҷониби Ҳукумати мамлакат беш аз 5,5 миллиард сомонӣ субвенсия ҷудо ва 80 лоиҳаи сармоягузории давлатӣ ба маблағи қариб 15 миллиард сомонӣ амалӣ гардида, ҳоло татбиқи боз 40 лоиҳаи сармоягузории давлатӣ идома дорад, ки маблағи дар доираи онҳо азхудшуда беш аз 7 миллиард сомониро ташкил медиҳад.
Танҳо барои бо оби босифати ошомиданӣ таъмин намудани аҳолии шаҳру ноҳияҳои вилояти Хатлон аз ҷониби Ҳукумати мамлакат то ба ҳол чор лоиҳаи давлатии сармоягузорӣ ба маблағи беш аз 500 миллион сомонӣ амалӣ гардида, татбиқи боз чор лоиҳаи дигар ба маблағи беш аз 1 миллиард сомонӣ идома дорад.
Барои пурра ва босифат татбиқ кардани лоиҳаҳо, ҷоннок кардани раванди ҷалби сармояи мустақими ватанию хориҷӣ, таъсиси ҷойҳои нави кор ва таъмин намудани шароити мусоиди инфрасохторӣ роҳбарияти вилояти Хатлон ва шаҳру ноҳияҳои он вазифадор шуданд.
Ҳарчанд соли 2021 дар вилоят нақшаи ҷамъоварии андозу пардохтҳо 106,4 фоиз ва дар моҳи январи соли ҷорӣ 102,4 фоиз иҷро шудааст, вале сифати иҷрои нақшаи ҷамъоварии андозу пардохтҳо дар шаҳру ноҳияҳо ба талабот ҷавобгӯ набуда, аз ин ҳисоб соли 2021 ба буҷет беш аз 102 миллион сомонӣ ва моҳи январи соли ҷорӣ 7 миллион сомонӣ маблағ ворид нагардидааст. Ҳамчунин, бақияи қарзи андозҳо дар вилоят то ҳол зиёд буда, то 1 феврали соли ҷорӣ 182 миллион сомониро ташкил додааст, ки чунин вазъ бояд ҳар чӣ зудтар бартараф карда шавад.
Президенти мамлакат муҳтарам Эмомалӣ Раҳмон ба роҳбарони вилояти Хатлон ва шаҳру ноҳияҳои он супориш доданд, ки якҷо бо Вазорати молия ва Кумитаи андоз ҷиҳати сари вақт ва пурра ҷамъоварӣ намудани андозҳо, кам кардани бақияпулии онҳо, роҳ надодан ба қарздории музди меҳнат, ташаккули буҷети маҳаллӣ, истифодаи самараноки маблағҳо ва шаффофияти хароҷоти онҳо тадбирҳои қатъӣ андешанд.
Бонки миллӣ ва дигар ташкилотҳои қарзӣ супориш гирифтанд, ки барои дастрасии соҳибкории хурду миёна ба қарзҳои имтиёзнок, хусусан, дар ноҳияҳои дурдасти вилоят ва умуман зиёд намудани ҳаҷми қарздиҳӣ ба соҳибкории истеҳсолӣ тадбирҳои иловагӣ андешанд.
Зимни таҳлили вазъи соҳаи саноати вилояти Хатлон ва арзёбии ҳадафҳои стратегии Ҳукумати мамлакат оид ба саноатикунонии босуръати кишвар ва ноил шудан ба ҳадафҳои стратегӣ солҳои 2022 — 2026 «Солҳои рушди саноат» таъкид гардид, ки соли 2021 истеҳсоли маҳсулоти саноатӣ дар вилоят ба 10,2 миллиард сомонӣ баробар шуда, нисбат ба соли 2020 беш аз 11 фоиз афзудааст. Соли 2021 дар вилоят 86 корхонаву коргоҳи нави саноатӣ бо 1140 ҷойи кор ба истифода дода шудааст, ки 36 адади онро корхонаҳо ташкил медиҳанд.
Ҷиҳати мутобиқ кардани нишондиҳандаҳои мазкур ба талаботи саноатикунонии босуръати кишвар, Сарвари давлат ба роҳбарони мақомоти иҷроияи ҳокимияти давлатии вилояти Хатлон ва шаҳру ноҳияҳои он якҷо бо вазорату идораҳои дахлдор супориш доданд, ки бо ҷалби васеи соҳибкорону сармоягузорон рушди соҳаи саноат, хусусан, саноати сабуку хӯрокворӣ, мошинсозӣ, химия, истеҳсоли масолеҳи сохтмон ва дорусозиро бо ворид намудани технологияҳои муосир ва тавассути коркарди пурраи захираҳои ашёи хоми вилоят, аз ҷумла канданиҳои фоиданок, маҳсулоти кишоварзӣ ва рустаниҳои шифобахш таъмин карда, ба ин васила, ҳаҷми истеҳсоли маҳсулоти содиротӣ ва ивазкунандаи воридотро афзоиш диҳанд.
Ҳамчунин, супориш дода шуд, ки роҳбарияти вилояти Хатлон ва шаҳру ноҳияҳои он дар ҳамкорӣ бо Вазорати саноат ва технологияҳои нав ва Кумитаи давлатии сармоягузорӣ ва идораи амволи давлатӣ барои ба кор андохтани корхонаҳои аз фаъолият бозмонда ва роҳ надодан ба қатъ шудани фаъолияти корхонаҳо чораҷӯӣ намуда, ҷиҳати ҷалби сармояи дохиливу хориҷӣ, бахусус сармояи мустақим ва тақвияти иқтидори истеҳсолии вилоят, тадбирҳои мушаххас андешанд. Барои бунёди корхонаҳои нави саноатӣ бо технологияҳои замонавӣ ва дар ин замина таъмин намудани диверсификатсияи истеҳсолот ва дарёфти манбаъҳои нави андозбандӣ низ чораҷӯӣ намоянд. Барои расидан ба ин ҳадаф истифодаи самараноки минтақаҳои озоди иқтисодӣ ва дар ин раванд ташкили паркҳои технологӣ ва маҷмааҳои саноативу агросаноатӣ зарур шумурда шуд.
Роҳбарону масъулини вилоят ва шаҳру ноҳияҳои он вазифадор шуданд, ки якҷо бо вазорату идораҳои марбута дар самти истифодаи самараноки обу замин, зиёд намудани майдони кишт, беҳтар кардани фаъолияти хоҷагиҳои тухмипарварӣ, истифодаи усули агротехникаи пешрафта, баланд бардоштани ҳосилнокии зироатҳо, афзоиш додани ҳаҷми истеҳсоли маҳсулоти кишоварзӣ, таъсиси марказҳои логистикӣ, инчунин, доир ба нигоҳдорӣ, коркард, бандубаст ва содироти маҳсулоти соҳа тадбирҳои иловагӣ андешанд.
Ҳамчунин, ба масъулини соҳа супориш дода шуд, ки ҷиҳати зиёд намудани майдони боғу токзор, аз ҷумла бунёди боғҳои нави интенсивӣ ва ба ин васила афзоиш додани ҳаҷми истеҳсолот ва содироти маҳсулот, ҳама имкониятро сафарбар созанд.
Ба хотири расидан ба ҳадафи стратегии таъмини амнияти озуқаворӣ вусъат додани корҳо доир ба ташкили корхонаҳои чорводориву парандапарварӣ, хоҷагиҳои моҳипарварӣ ва таъмини бозори истеъмолӣ бо маҳсулоти хушсифати ватанӣ зарур шумурда шуд.
Роҳбарони мақомоти иҷроияи ҳокимияти давлатии вилоят, Вазорати кишоварзӣ, Агентии беҳдошти замин ва обёрӣ ва Кумитаи давлатии сармоягузорӣ ва идораи амволи давлатӣ вазифадор шуданд, ки барои беҳтар гардонидани ҳолати мелиоративии заминҳо, барқарорсозии заминҳои аз гардиши кишоварзӣ берунмонда ва аз худ кардани заминҳои нав тадбирҳои зарурӣ андешида, бо ҷалби сармояи ватаниву хориҷӣ истифодаи самараноки заминро таъмин намоянд.
Президенти мамлакат муҳтарам Эмомалӣ Раҳмон саҳми соҳибкорони ватандӯстро дар корҳои созандагӣ ва обод кардани гӯшаву канори сарзамин махсус зикр карда, таъкид намуданд, ки дар оянда низ ташаббуси ватандӯстона дар доираи омодагӣ ба ҷашни 35 — солагии Истиқлолияти давлатӣ бояд ҳаматарафа дастгирӣ ёфта, вусъат бахшида шавад.
Зимни таҳлили вазъи соҳаи нақлиёту боркашонӣ Президенти мамлакат муҳтарам Эмомалӣ Раҳмон дар назди Вазорати нақлиёт ва Корхонаи воҳиди давлатии «Роҳи оҳани Тоҷикистон» вазифа гузоштанд, ки бо истифода аз тахфифҳои ҷоригардида баҳри зиёд намудани ҳаҷми боркашонӣ чораҷӯӣ намоянд.
Президенти мамлакат муҳтарам Эмомалӣ Раҳмон ба масъалаи рушду пешрафти соҳаи иҷтимоӣ, аз ҷумла маорифу тандурустӣ, таваҷҷуҳи махсус зоҳир карда, барои бартараф кардани камбудию норасоиҳои ин бахшҳо супориш доданд, ки дар марҳалаи кунунӣ ҷиҳати боз ҳам баланд бардоштани сатҳу сифати таҳсилот, омода кардани кадрҳои баландихтисос, омӯхтани забони давлатӣ, таъриху фарҳанги бостонии халқи тоҷик, боло бурдани завқу рағбати хонандагон ба омӯзиши фанҳои риёзӣ, дақиқ, табиӣ, технологияҳои иттилоотӣ ва аз худ кардани забонҳои хориҷӣ, махсусан забонҳои русиву англисӣ, аҳли маориф, роҳбарони шаҳру ноҳияҳо, падару модарон, фаъолон ва аҳли зиё бояд чораҳои мушаххас андешанд.
Таъкид гардид, ки роҳбарони вилояти Хатлон ва шаҳру ноҳияҳои он бояд якҷо бо Вазорати маориф ва илм барои таъмин намудани муассисаҳои таълимӣ бо омӯзгорони фанҳои риёзӣ, дақиқ, табиӣ, технологияҳои иттилоотӣ ва забонҳои хориҷӣ, алалхусус забонҳои русиву англисӣ, фаврӣ тадбир андешанд.
Бо дарназардошти вазъи зудтағйирёбандаи ҷомеаи ҷаҳонӣ, пешгирии қонуншиканию ҷинояткориҳо роҳбарони вилоят, шаҳру ноҳияҳои он ва раисони ҷамоатҳои шаҳраку деҳот вазифадор шуданд, ки якҷо бо мақомоти ҳифзи ҳуқуқ ва бо ҷалби васеи сохторҳои кор бо ҷавонон, занон, падару модарон ва фаъолони ҷамоатҳои шаҳраку деҳот ҷиҳати пешгирӣ кардани ҷинояткорӣ ва дигар қонуншиканиҳо, пурзӯр кардани корҳои тарбиявию фаҳмондадиҳӣ, махсусан дар байни наврасону ҷавонон, дар рӯҳияи ватандӯстиву ватанпарастӣ, омӯхтани илму дониш, касбу ҳунар, одобу ахлоқи ҳамида ва эҳтирому риояи қонун тарбия кардани онҳо чораҳои мушаххас андешанд.
Дар охир Сарвари давлат муҳтарам Эмомалӣ Раҳмон бо итминон иброз доштанд, ки мардуми сарбаланди вилояти Хатлон минбаъд низ ба хотири пешрафти давлат ва ободии Ватан сарҷамъу аҳлона ва содиқонаву софдилона заҳмат кашида, ба дастовардҳои боз ҳам бештари иҷтимоиву иқтисодӣ ва сатҳи аз ҳозира беҳтари зиндагии ҳар як оила ноил мегарданд.
Баъд аз суханронии Президенти мамлакат муҳтарам Эмомалӣ Раҳмон оид ба натиҷаҳои рушди иқтисодию иҷтимоии вилоят раиси вилояти Хатлон Қурбон Ҳакимзода ва раисони як қатор шаҳру ноҳияҳо ба Сарвари давлат ҳисобот доданд.
www.president.tj
