25 июн дар вилояти Суғд Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳбари Агентии Япония оид ба ҳамкории байналмилалӣ (JICA) Синичи Китаокаро ба ҳузур пазируфтанд.
Дар ҷараёни мулоқот ҳамкории Ҳукумати Ҷумҳурии Тоҷикистон бо ташкилоти мазкур дар бахшҳои гуногуни иқтисодию иҷтимоӣ баррасӣ гардид.
Президенти мамлакат муҳтарам Эмомалӣ Раҳмон аз сатҳи ҳамкории дуҷониба дар бахшҳои гуногун, татбиқи лоиҳаҳои сармоягузорӣ, инчунин барои мусоидат дар бозомӯзии хизматчиёни давлатӣ, амалӣ кардани лоиҳаҳо дар самтҳои таъмини оби нӯшокӣ, ҳифзи саломатии модару кӯдак, рушди кишоварзӣ, беҳтар намудани инфрасохтори роҳ, авиатсия, энергетика ва идоракунии сарҳади давлатӣ изҳори қаноатмандӣ карданд.
Ҷонибҳо омодагиро барои идомаи ҳамкорӣ дар самтҳои дигари афзалиятнок ва ҳадафҳои стратегии дуҷониба, аз ҷумла Барномаи нави шарикӣ бо Тоҷикистон баҳри татбиқи Стратегияи миллии рушди Тоҷикистон барои давраи то соли 2030, амалисозии ҳадафҳои стратегии Тоҷикистон оид ба беҳсозии вазъи коммуникатсионӣ, энергетикӣ ва кишоварзӣ изҳор доштанд.
Дар ҷараёни мулоқот беҳсозии фазои соҳибкорӣ, мусоидат ба шуғли аҳолӣ, баланд бардоштани рақобатпазирии кишвар, рушди инфрасохтори зарурии саноат ва содирот, ташкили ҷойҳои нави корӣ, ҷалби маблағҳои грантии Япония оид ба пешгирии офатҳои табиӣ, коҳиш додани зарари тағйирёбии иқлим ба иқтисодиёти кишвар мавриди баррасӣ қарор дода шуд.
Таъкид гардид, ки ҳамкорӣ ҷиҳати омода кардани мутахассисон ва хизматчиёни давлатӣ дар самтҳои идоракунӣ, молия, бонкдорӣ, сайёҳӣ, роҳсозӣ, энергетика ва дигар соҳаҳои муҳим метавонад аз афзалиятҳои рушди ҳамкории дуҷониба бошад.
www.president.tj
