Суханронии Сардори давлат Эмомалӣ Раҳмон дар маросими ифтитоҳи муассисаи нави таҳсилоти миёнаи умумӣ дар шаҳри Душанбе
30 августи соли 2016
Падару модарони муҳтарам!
Омӯзгорону хонандагони азиз!
Қабл аз ҳама, шумо ва сокинони пойтахти кишварамон – шаҳри Душанберо ба муносибати фарорасии ҷашни бузурги 25 — солагии Истиқлолияти давлатӣ самимона табрик мегӯям.
Соли равон ба ифтихори таҷлили ҷашни муқаддаси камолоти давлатамон дар мамлакат садҳо иншооти нави таъиноти иҷтимоӣ ба истифода дода шуданд, ки аксари онҳоро муассисаҳои нави таълимӣ ташкил медиҳанд.
Ин лаҳзаҳо мову шумо шоҳиди ифтитоҳи боз як муассисаи таълимии нави замонавӣ дар маҳаллаи 104-уми ноҳияи Синои пойтахт гардидем, ки тибқи супориши Ҳукумати мамлакат сохтмони он дар ҳамкорӣ бо яке аз ширкатҳои бузурги чинии «ТВЕА» барои 2500 ҷойи нишаст ба анҷом расонида шудааст.
Бо истифода аз фурсат, омӯзгорону хонандагон ва падару модаронро бо ифтитоҳи муассисаи таълимӣ табрик гуфта, инчунин ба роҳбарияти ширкати давлати ба мо дӯсту ҳамсоя — Ҷумҳурии Мардумии Чин ҷиҳати бо сифати баланд сохта, ба истифода додани иншооти мазкур миннатдорӣ баён менамоям.
Маориф ва омӯзиши илму фан аз дер боз ба як унсури муҳими ҳаёти инсон табдил ёфта, дар масири таърих ҳамчун чароғи ақлу хирад боиси равшанӣ ва рушди ҳаёти инсоният гардидааст.
Бузургони миллати тоҷик низ аз қадим инсониятро ба омӯхтани илму дониш ҳидоят намуда, пос доштан ва эҳтиром гузоштан ба аҳли илму маорифро аз бузургтарин хислатҳои неки инсонӣ номидаанд.
Аҷдоди хирадманди мо дар давраҳои маҳдуд будани азхудкунии илму дониш ба хотири аз донишу маърифат бебаҳра намондани ҷавонон дастовардҳои илму маърифатро ҳатто дар сангпораҳо нигошта, бо ин роҳ ба ташнагони илму дониш ғизои маънавӣ мебахшиданд.
Устод Айнӣ дар осори гаронарзиши худ ишора мекунад, ки дониш андӯхтан кори саҳл нест.
Соҳиби донишу савод шудан кори бениҳоят сангин аст ва шахсе дар роҳи илм шарафёб мегардад, ки сабру тоқат ва майлу хоҳиши баланди илмомӯзӣ дошта бошад.
Дар замони муосир илму дониш аҳамияти боз ҳам бештар касб намуда, рушди бемайлони илму техника ва технологияҳои иттилоотиву иртиботӣ ба воқеияти ҳаёт табдил ёфтааст.
Мо ба ҳайси миллати соҳибтамаддун ҳеҷ гоҳ аз ин раванд дар канор буда наметавонем.
Баръакс, дар ин ҷода талош мекунем, ки ҳама гуна низоми наву пешрафтаи таълимро бо манфиатҳои миллӣ ва арзишҳои таърихии миллати тоҷик мувофиқ созем ва дар ин замина пешрафти низоми маорифи кишвари худро таъмин намоем. Зеро рушду инкишофи минбаъдаи мамлакат ба саъю талоши насли созандаву эҷодкор марбут аст.
Бинобар ин, мо имрӯз вазифадор ҳастем, ки ба тарбияи ворисони соҳибмаърифату донишманд ва содиқ ба Ватани хеш бо масъулияти баланд муносибат кунем.
Мо беҳуда таҳкими низоми маориф ва дар ин замина омода кардани насли ояндасози кишварро ба яке аз самтҳои афзалиятноки сиёсати иҷтимоии давлат эълон накардаем ва минбаъд низ онро ҳамчун омили асосии таҳкими давлат ва наҷоти миллат арзёбӣ хоҳем кард.
Дар ин раванд соли ҷорӣ аз Буҷети давлатӣ ба соҳаи маориф зиёда аз се миллиард сомонӣ пешбинӣ гардидааст, ки нисбат ба соли гузашта 231 миллион сомонӣ ё 10 фоиз ва дар муқоиса ба даҳ соли пеш, яъне соли 2006, қариб 13 баробар зиёд мебошад.
Вобаста ба ин, маблағгузорӣ ба соҳаи маорифи шаҳри Душанбе низ сол ба сол афзоиш меёбад.
Тибқи таҳлилҳо дар давоми 25 сол барои рушди маорифи пойтахт ва фароҳам овардани шароити таълиму тарбия зиёда аз як миллиард сомонӣ равона гардидааст.
Чанде пеш ба ифтихори истиқболи ҷашни 25 — солагии Истиқлолияти давлатӣ ду боғчаи бачагонаи хусусӣ барои 250 ҷой дар маҳаллаи Зарафшон ба истифода дода шуд. Рӯзҳои наздик ду кӯдакистони хусусии дигар дар маҳаллаи мазкур барои 350 ҷой мавриди баҳрабардорӣ қарор дода мешавад.
Умуман, соли равон дар муассисаҳои таҳсилоти томактабии шаҳри Душанбе қариб 1000 ҷой муҳайё гардида, шумораи умумии кӯдакони ба ин муассисаҳо фарогирифташуда ба зиёда аз 25 ҳазор нафар расонида мешавад.
Ҳамин тавр, давра ба давра ин мушкили мардум низ бартараф гардида, тадбири мазкур дар самти омодасозии хурдсолон барои қабул ба мактаб мусоидат хоҳад кард.
Қобили зикр аст, ки дар тӯли солҳои истиқлол дар шаҳри Душанбе аз ҳисоби ҳамаи сарчашмаҳои маблағгузорӣ даҳҳо муассисаи нави таҳсилоти умумӣ ва биноҳои иловагӣ барои 45 ҳазор ҷойи нишаст сохта, ба истифода дода шудаанд.
Фарзандони азиз!
Имсол давлати соҳибистиқлоли мо 25 — сола шуд. Мардуми заҳматпешаи тоҷик, аз ҷумла падару модарони шумо ва аҳли ҷомеаи кишвар барои расидан ба синни камолоти давлати ҷавону пояндаамон кӯшишҳои зиёд ба харҷ доданд ва барои таъмини пешрафту тараққиёти он бояд ҳамаи мо боз заҳмати бештар кашем.
Шумо низ ҳамчун насли даврони соҳибистиқлолии кишварамон бояд дарк намоед, ки дар ояндаи наздик масъулияти соҳибӣ ва ободонии Ватан ба дӯши шумо афтода, аз шумо илму дониш ва касбу ихтисосҳои замонавиро тақозо хоҳад кард.
Аз ин рӯ, таъкид месозам, ки барои соҳибӣ кардани ин Ватан ва ин хоки муқаддас худро аз имрӯз омода созед. Ба омӯхтани илму дониш, истифодаи техникаву технологияҳои муосир ва обутоби ҷисмониву маънавӣ ҷиддӣ машғул шавед.
Муассисаи таълимии ифтитоҳшудаи имрӯза дар мавзее ҷойгир аст, ки аксари хонандагони он дар самти азхудкунии барномаҳои таълимӣ ва одобу ахлоқ нишондиҳандаҳои хуб доранд.
Имтиҳони дохилшавӣ дар маркази миллии тестӣ дар давоми се соли охир нишон медиҳад, ки хатмкунандагони муассисаҳои таълимии ноҳияи Сино дар байни дигар ноҳияҳои шаҳр ба натиҷаҳои хуб ноил шудаанд, ки ин, албатта, самараи муносибати дилсӯзонаи аҳли маориф ва падару модарон нисбат ба тақдири ояндаи наврасону ҷавонон мебошад.
Ҳукумати мамлакат минбаъд низ ҳамаи имкониятҳоро ба самти муҳайё намудани беҳтарин шароити таълиму тарбия барои наслҳои ояндасози миллат равона месозад.
Итминон дорам, ки наврасону ҷавонони мо дар шароити сулҳу суботи кишварамон аз имкониятҳои барои онҳо муҳайёшуда самаранок истифода карда, ҳамчун мутахассисони болаёқату баландихтисос ба воя мерасанд ва нуфузу обрӯи давлати соҳибистиқлоламонро дар оянда боз ҳам баландтар мебардоранд.
Биступанҷумин солгарди ҷашни соҳибдавлатии Тоҷикистони азизамон ва ифтитоҳи боз як муассисаи замонавии таълимиро бори дигар ба аҳли маорифи пойтахти кишвар ва хонандагони муассисаи таълимии имрӯза табрик гуфта, ба ҳар яки шумо саломативу хушбахтӣ ва иқболи нек орзу менамоям.
Ҷашни Истиқлолияти давлатӣ ва туҳфаи арзандаи идона муборак бошад, фарзандони азиз ва устодони гиромӣ!
