Понздаҳуми майи соли 2015 Президенти кишвар Эмомалӣ Раҳмон барои шиносоии бевосита бо рафти сохтмони қитъаи Ваҳдат — Ёвони роҳи оҳани Душанбе-Қӯрғонтеппа ба ноҳияҳои Рӯдакӣ ва Ёвон сафар кард.
Нахуст Сарвари давлат Эмомалӣ Раҳмон ба деҳаи Истиқболи деҳоти «Султонобод»-и ноҳияи Рӯдакӣ ташриф овард. Зимни шиносоӣ бо лоиҳаи сохтмон, аз ҷумла иттилоъ дода шуд, ки масофаи умумии қитъаи Ваҳдат — Ёвони роҳи оҳани Душанбе — Қӯрғонтеппа 40,7 км буда, дар масири он се нақб бо дарозии 3755 метр, ҳашт пул бо дарозии 764 метр ва иншооти дигар, аз қабили се истгоҳ бунёд хоҳанд ёфт.
Барои бунёди ин қитъаи роҳи оҳан, тибқи лоиҳа ҷудо намудани 800 миллион сомонӣ пешбинӣ шудааст. Аз оғози татбиқи лоиҳа, ки ба соли 2009 рост омада буд, то охири моҳи апрели соли равон 303 миллион сомонӣ аз худ карда шудааст. Дар ин муддат 12 км роҳ пурра бунёд ёфта, дар масофаи қариб 30 километри дигар корҳои заминӣ барои оғози насби релсҳо ба поён расонида шудаанд. Корҳо танҳо барои кандани нақбҳо, бунёди пулҳо ва гузаштан аз чанд қитъаи вазнини кӯҳӣ боқӣ мондааст.
Дар минтақаи кӯҳӣ бунёд намудани ин қитъаи роҳи оҳан барои бинокорони тоҷик таҷрибаи басо зарурӣ мешавад, зеро оянда ин роҳи оҳан аз минтақаҳои ба маротиб аз ин мушкилтари кӯҳӣ бояд аз тариқи кӯҳистони водии Рашт ба Қирғизистону Хитой ва дар ҷануб ба Афғонистону Туркманистон ва Эрон расонида шавад.
Сарвари давлат Эмомалӣ Раҳмон дар даромадгоҳи шимолии нақби аз ҳама дарози ин қитъаи роҳ, ки масофааш қариб се километр хоҳад буд, бо гузоштани санги асос ва нома ба наслҳои оянда ба бунёди он оғози расмӣ бахшид.
Дар ҳамин мавзеи зебои кӯҳӣ Президенти кишвар Эмомалӣ Раҳмон бо роҳбарияти соҳа, бинокорони роҳи оҳан ва намояндагони мардуми деҳоти атроф мулоқот намуда, аз ҷумла таъкид дошт, ки ин роҳи оҳан бояд бо сифати баланди сатҳи ҷаҳонӣ сохта шавад, зеро оянда он бо шабакаҳои минтақавии байналмилалии роҳҳои оҳан пайваст шуда, аз ҷумла робитаи мустақими Тоҷикистонро бо Қирғизистону Хитой ва Афғонистону Туркманистон ва Эрону дигар кишварҳои Осиёи Ҷанубӣ таъмин хоҳад кард.
Зимни шиносоии бевосита дар қитъаҳои гуногуни сохтмони роҳи оҳан, ҳамчунин иттилоъ дода шуд, ки дар ин ҷо ҳоло беш аз 400 нафар бинокорон аз 13 ширкату ташкилоти сохтмонӣ машғули коранд. Даҳ адади ин корхонаҳои сохтмонӣ ватанӣ ва беш аз 70 фоизи бинокорон шаҳрвандони Тоҷикистон мебошанд. Ширкатҳои хориҷӣ, ки асосан дар бунёди нақбу пулҳо иштирок доранд, аз Ҷумҳурии Халқии Хитой ва Ҷумҳурии Исломии Эрон мебошанд. Ҳоло дар қитъаҳои гуногуни сохтмонӣ беш аз 150 адад техникаю механизмҳои сохтмонию боркашонӣ ба кор ҷалб шудааст.
Сарвари давлат Эмомалӣ Раҳмон қариб дар ҳар як қитъаи роҳ таваққуф намуда, бинокоронро ба анҷоми босифати корҳо ҳидоят намуд.
Тавре таъкид гардид, сохтмони қитъаи Ваҳдат-Ёвони роҳи оҳани Душанбе-Қӯрғонтеппа бояд то моҳи августи соли 2016 пурра ба поён расонида шавад.
www.president.tj
