27 марти соли 2014 тантанаҳои Наврӯзи ҷаҳонӣ дар шаҳри Кобул, ки яке аз гаҳвораҳои ин ҷашни бостонии хуҷаста ба шумор меравад, бо шукӯҳи хоса ҷараён гирифт.
Барои иштирок дар ин тантанаҳо ва Конфронси байналмилалии Наврӯз ба шаҳри Кобул сарони давлатҳою ҳукуматҳо ва намояндагони воломақом аз ҳашт кишвари ҳавзаи тамаддуни ин ҷашни мардумию табиӣ ташриф оварданд.
Зимни суханронӣ дар Конфронси байналмилалии Наврӯз Сарвари давлати Тоҷикистон Эмомалӣ Раҳмон, аз ҷумла чунин изҳор дошт: «Муҳимтарин хусусияти Наврӯз ин аст, ки ин ҷашн ба ягон воқеаи сирф қавмӣ, миллӣ ё минтақавӣ бахшида нашудааст ва як падидаи фаромилливу фаромазҳабӣ буда, заминаҳои ҷаҳонишавиаш ҳанӯз то милод гузошта шуда буд».
Ҳамчунин таъкид гардид, ки «асли Наврӯз бо воқеаҳои бузурги кайҳониву хамосие решапайванд аст, ки ба сарнавишти Одаму Олам нисбат доранд».
Ба андешаи Эмомалӣ Раҳмон: «Фарҳанги наврӯзӣ метавонад дар ҳалли мушкилоти муосири умумибашарӣ, аз ҷумла дар рафъи буҳрони сахти экологӣ ва маънавӣ роҳнамо бошад».
Дар Наврӯзгоҳи Кобул, ки дар саҳни Арки раёсати Ҷумҳурии Исломии Афғонистон ороста шуда буд, аҳли фарҳанг ва ҳунармандони мардумӣ аз тамоми минтақаҳои ин кишвар ва ҳам аз кишварҳои дигари ҳавзаи тамаддуни Наврӯзи оламафрӯз ҳунарҳои зебои худро ба намоиш гузоштанд. Базми тарабу шодии наврӯзӣ дар наврӯзгоҳи Кобул басо зебою диданӣ буд.
www.president.tj
