25 сентябри соли 2015 Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи мамлакат Эмомалӣ Раҳмон дар Гвардияи миллии Ҷумҳурии Тоҷикистон бо иштироки афсарону сарбозони ҷузъу томҳои Қувваҳои Мусаллаҳ ва мақомоти ҳифзи ҳуқуқ вохӯрӣ баргузор намуд.
Баъди садои Суруди миллии Ҷумҳурии Тоҷикистон маросими супоридани мукофотҳои давлатӣ ба хизматчиёнӣ ҳарбӣ ва шаҳрвандоне, ки барои таъмини амният ва ҳифзи ҳуқуқҳои конститутсионии шаҳрвандон саҳми беназир гузоштаанд, доир гардид.
Бо Фармони Президенти Ҷумҳурии Тоҷикистон Эмомалӣ Раҳмон барои хизмати содиқона ва саҳми арзанда дар таъмини ҳифзи ҳуқуқҳои конститутсионии шаҳрвандон, ҷасорату фидокорӣ ҳангоми мубориза бо ҷинояткорӣ ва нигоҳдории тартиботи ҷамъиятӣ як зумра хизматчиёни ҳарбӣ ва шаҳрвандон бо мукофотҳои давлатӣ сарфароз гардиданд.
Президенти мамлакат, Сарфармондеҳи Олии Қувваҳои Мусаллаҳи Ҷумҳурии Тоҷикистон Эмомалӣ Раҳмон ба 122 нафар сарбозон ва шаҳрвандон, ки хизмати содиқона ва ҷонфидоӣ кардаанд, мукофотҳои давлатӣ, аз ҷумла Ордени Спитемен дараҷаҳои 1 ва 2, Ордени Шараф, медали Ҷасорат, рутбаҳои навбатӣ ва Ифтихорномаи Ҷумҳурии Тоҷикистонро супорид.
Ба наздикону пайвандони 14 нафар корманди ҳифзи ҳуқуқ, ки ҳангоми адои вазифа ба ҳалокат расидаанд, баъди марг ва ба як нафар захмӣ орден ва рутбаи навбатии ҳарбӣ тақдим карда шуд.
Баъди маросими супоридани мукофотҳои давлатӣ Президенти мамлакат, Сарфармондеҳи Олии Қувваҳои Мусаллаҳи Ҷумҳурии Тоҷикистон Эмомалӣ Раҳмон дар назди ҳозирин суханронӣ карда, изҳор дошт, ки ин ҷамъомад ба хотири анҷоми муваффақонаи амалиёти махсус, ки рӯзҳои 4-16 — уми моҳи сентябр барои дастгир ва безарар гардонидани хоинону душманони давлат ва миллати тоҷик гузаронида шуд, доир гардида истодааст.
Сарвари давлат Эмомалӣ Раҳмон таъкид намуд, ки хушбахтона, мақсади нопоку хиёнаткоронаи хоинон ва хоҷагони хориҷиашон ба шарофати ҷасорату далерии ҳайати шахсии Қувваҳои Мусаллаҳи мамлакат, инчунин ҷонибдории мардуми сулҳпарвару ватандӯсти кишвар бартараф карда шуд ва нақшаи хоинони Ватан ин дафъа низ барбод рафт.
Бинобар ин, Президенти мамлакат Эмомалӣ Раҳмон ба тамоми ҳайати шахсӣ, ки дар амалиёти мазкур далерона иштирок карда, рисолат ва қарзи фарзандии худро дар назди Модар — Ватан ва халқи Тоҷикистон ҷавонмардона иҷро намуданд, аз номи худ ва Ҳукумати мамлакат бори дигар миннатдории самимӣ изҳор кард.
Президенти мамлакат ба аҳли оила, наздикону пайвандони сарбозону афсароне, ки бар зидди дастаи террористӣ ва душманони халқу Ватан далерона ба набард бархоста, ҳангоми адои вазифаи хизматӣ ҷони ҷавони худро аз даст додаанд, изҳори тасаллият карда, таъкид намуд, ки шуҷоату далерии онҳо аз хотираи мардуми тоҷик ва Давлату Ҳукумати кишвар ҳаргиз фаромӯш нахоҳад шуд.
Чорабинии имрӯзаро гузашти низомии ҷузъу томҳои Гвардияи миллӣ, Вазорати мудофиа, Вазорати корҳои дохилӣ, Агентии назорати маводи нашъаовари назди Президенти Ҷумҳурии Тоҷикистон, Агентии назорати давлатии молиявӣ ва мубориза бо коррупсияи Ҷумҳурии Тоҷикистон, Хадамоти гумрук, Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон, Қӯшунҳои сарҳадии Кумитаи давлатии амнияти миллии Ҷумҳурии Тоҷикистон, воҳидҳои зудамал, воҳидҳои танкӣ, артиллерия ва Оркестри ҳарбии муттаҳидаи Вазорати мудофиа ва гвардияи миллӣ анҷом бахшиданд.
www.president.tj
