Бо мақсади шарҳу тавзеҳи Паёми навбатии Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ гурӯҳҳои корӣ бо шумули муовинони раиси вилоят, масъулини мақомоти иҷроияи маҳаллии ҳокимияти давлатӣ ва роҳбарони як қатор идораву муассисаҳои вилоят таъсис дода шуда, ба шаҳру ноҳияҳои ВМКБ сафарбар гардиданд.
Чунин як мулоқоти гурӯҳи корӣ бо сокинони деҳоти Қалъаихумб, Зиғари деҳоти Нулванд ва деҳоти Вишхарви ноҳияи Дарвоз сурат гирифт.
Дар рафти мулоқот таъкид шуд, ки дар Паём дастоварду пешравиҳо дар зарфи солҳои охир ноилшудаи Тоҷикистони соҳибистиқлол баён гардида, ҳамаи пешравиҳои зикршуда, маҳз бо заҳмати содиқонаву софдилона ва азму талоши ватандӯстонаи мардуми шарифи мамлакат ба даст омадаанд.
Президенти кишвар ба мардум муроҷиат карда, аз ҳар яки онҳо даъват намуданд, ки табиати Тоҷикистонро ба гулистон табдил дода, ободӣ, тозагию озодагиро аз ҳар хонаву кошона сар карда, то деҳоти дурдасттарин вусъат бахшанд.
Тавре Сарвари давлат зимни ироаи Паём изҳор намуданд: «Ман ба ҳисси баланди миллӣ, эҳсоси гарми ватандӯстӣ, нияти неку азми қатъӣ ва саъю талоши созандаи мардуми шарафманди Тоҷикистон эътимоди комил дорам. Бо итминон изҳор менамоям, ки мо ҳама якҷо бо кору фаъолияти аҳлона Ватани азизамонро, хусусан, то ҷашни бузурги миллӣ -35-солагии Истиқлоли давлатӣ, ободу зебо месозем, давлати соҳибистиқлоламонро пешрафта мегардонем ва эътибору обрӯи онро дар арсаи байналмилалӣ боз ҳам баланд мебардорем».
Инчунин, дар мулоқот бо сокинон оид ба рушди иҷтимоию иқтисодии кишвар, дастоварду пешравиҳо дар давоми солҳои соҳибистиқлолӣ, самтҳои асосии пешрафти минбаъдаи давлат ва ҷомеа, дастгирию ғамхориҳои рӯзафзуни Ҳукумати мамлакат, ташкили корхонаҳои истеҳсолӣ, таъсиси ҷойҳои нави корӣ, баланд бардоштани рақобатнокии маҳсулоти ватанӣ, тақвияти иқтидори содиротии мамлакат, суръат бахшидани раванди рақамикунонии соҳаҳои иқтисоди миллӣ, дастгирии гурӯҳҳои осебпазири аҳолӣ, навсозии неругоҳҳои барқи обӣ, сохтмону таҷдиди роҳҳо ва дигар паҳлӯҳои муҳими Паёми Президенти мамлакат сухан рафт.
Дар ноҳияи Ишкошим гурӯҳи корӣ бо сокинони деҳоти Аскар Замиров, Рустамбек Юсуфбеков, Зонг ва Вранг суҳбату вохӯриҳо анҷом дод.
Гурӯҳи корӣ дар баробари дигар масоили муҳим, ки зимни ироаи Паёми навбатӣ зикр дода шуданд, вобаста ба пешравиҳои назаррас дар ҳамаи соҳаҳои ҳаёти ҷомеа, рушди саноату иқтисодиёти миллӣ, амалисозии барномаҳои созанда, муҳимияти фаъолияти соҳибкорию сармоягузорӣ, беҳсозии соҳаи кишоварзӣ, ҳифзи ёдгориҳои таърихию фарҳангӣ, инкишофи соҳаи сайёҳӣ ва ҳунарҳои мардумӣ, рушди таҳсилоти иловагӣ, тақвияти мақоми омӯзгор дар ҷомеа, ҷалби бештари хонандагону омӯзгорон ба истифодаи технологияҳои иттилоотӣ, қонеъ гардондани талаботи аҳолӣ ба шуғл, ғамхории давлат ва Ҳукумати мамлакат ба мардуми кишвар, тақвият бахшидани ҳифзи иҷтимоии аҳолӣ, ҳимояи арзишҳои миллӣ, ҳифзи манфиатҳои давлату миллат ибрози андеша намуд.
- Расидан ба Истиқлолияти комили давлатӣ, таҳкими пояҳои устувори ҷомеа ва давлат, сулҳу оромӣ, суботи сиёсӣ ва ваҳдати миллӣ, рушди устувори иқтисодӣ, раҳоӣ ёфтан аз бунбасти коммуникатсионӣ ва ҳалли дигар масоил ибтикору фаъолияти саҳлу якрӯза нест. Вале маҳз бо азму талошҳои хастанопазири Пешвои миллат муҳтарам Эмомалӣ Раҳмон ва иттиҳоди халқ метавон ба ҳамаи ормонҳои аҷдодӣ расид, — таъкид гардид зимни мулоқот.
Инчунин, аъзои гурӯҳи корӣ перомуни масъалаи таҳкими маориф ва илм, баланд бардоштани ҳисси миллӣ, ифтихори ватандорӣ ва ҳувияти миллии ҷавонону наврасон, дурӣ ҷустан аз зуҳуроти номатлуби ҷомеа ва ҳиссаи арзанда гузоштан дар рушди бемайлони кишвар бо ҳозирин мулоқот карданд.
Дар ноҳияи Мурғоб суҳбату вохӯриҳои аъзои гурӯҳи корӣ бо сокинони шаҳраки Мурғоб, деҳоти Аличур ва Ғожо Бердибаев, деҳаҳои Тохтамиш ва Шаймоқи деҳоти Қизилработ баргузор гардид.
Таъкид шуд, ки Паёми Пешвои миллат муҳтарам Эмомалӣ Раҳмон ба боз ҳам баланд шудани сатҳу сифати зиндагии мардум нигаронида шудааст. Баланд шудани 40 фоиз маоши кормандони соҳаҳои иҷтимоӣ мардуми заҳматкаши ноҳияи Мурғобро боз ҳам дилгарм карда, ба ояндаи дурахшони Тоҷикистон раҳнамун намуд.
Ноҳияи Мурғоб солҳои охир бахусус, дар самти энергетика, ба комёбиҳои зиёд ноил шуда, неругоҳҳои обию офтобӣ дар ин ҷо мавриди баҳрабардорӣ қарор гирифтанд. Тавре Президенти кишвар дар Паём изҳор доштанд: «Ҳукумати мамлакат, бо дарназардошти фаровонии захираҳои гидроэнергетикӣ, иқтидори бузурги истеҳсоли «энергияи сабз» ва содироти он, дар ҷодаи ноил гардидан ба ҳадафи стратегии худ — расидан ба истиқлоли энергетикӣ қадамҳои устувор гузошта истодааст».
М. ИМОМНАЗАР,
«Садои мардум»
