14 апрели соли 2015 Раиси шаҳри Душанбе Маҳмадсаид Убайдуллоев ҳайати Бонки Умумиҷаҳониро таҳти сарварии роҳбари Лоиҳаи дуюми обтаъминкунии шаҳри Душанбе ҷаноби Пйер Франческо Мантовани бо хоҳиши онҳо ба ҳузур пазируфт.
Зимни мулоқот ҷонибҳо корҳои то ба имрӯз анҷомгирифтаро дар доираи татбиқи Лоиҳаи дуюми обтаъминкунии шаҳри Душанбе, ки тӯли панҷ сол бо азхудкунии 16 млн. доллар гранти бебозгашти Бонки Умумиҷаҳонӣ ва 3 млн. доллари ИМА маблағгузории Мақомоти иҷроияи маҳаллии ҳокимияти давлатии шаҳри Душанбе баҳри расидан ба ҳадафҳои пешбинигардида — ташкили фаъолияти самараноки КВД «Обу корези Душанбе» барои кам кардани талафот ва сарфаи оби истеҳсолшуда ба василаи насби ҳисобкунакҳои обӣ, беҳбудбахшии вазъи молиявӣ ва таъмини худмаблағгузорию рушди институтсионалӣ ва худидоракунии корхона сафарбар карда шуда, бобати амалисозии он ширкати олмонии CES Consulting Engineers Saizgitter GmbH мушовир интихоб гардидааст, мавриди баррасӣ қарор дода, ҷараёни корҳои амалигаштаи лоиҳавиро мусбӣ арзёбӣ намуданд.
Пеш аз ҳама, зикр гардид, ки насби ҳисобкунакҳои обӣ, ки имрӯз тибқи Лоиҳаи дуюми обтаъминкунии шаҳри Душанбе дар минтақаҳои алоҳидаи шаҳр бо 45 фоиз фарогирии муштариёни КВД «Обу корези Душанбе» амалӣ шуда истодааст, барои роҳандозии фарҳанги истеъмоли каммасрафи оби нӯшокӣ аз ҷониби муштариён мусоидат намуда, таъмини фишори об дар ошёнаҳои болоии биноҳо амалӣ гаштааст.
Маҳмадсаид Убайдуллоев таъкид кард, ки дар марҳилаи феълӣ тамоми потенсиали ҷонибҳо бояд баҳри таъмини хизматрасонии дарозмуддати ҳисобкунакҳои обии насбшуда ва ҳимояи ҳуқуқи истеъмолкунандагон равона карда шавад. Барои ин, бояд дар доираи маблағҳои лоиҳавӣ ҷиҳати роҳнаёбии регмайдаҳои таҳшинӣ ба шоҳқубурҳои интиқоли об масъалаи шинонидани обполакҳои пуриқтидор дар истгоҳи обтаъминкунии «Худҷореъ» ва беҳдошти ҳолати шабакаҳои корезию пойгоҳи обтозакунии корезии КВД «Обу корези Душанбе» аз ҷониби Бонки Умумиҷаҳонӣ матраҳ карда шавад.
Ҷаноби Пйер Франческо Мантовани аз пешниҳодоти ироашуда бо қаноатмандӣ пазироӣ намуда, афзуд, ки баҳри амалӣ шудани онҳо тамоми имкониятҳои мавҷударо сафарбар намуда, нисбати нуҳ моҳи боқимонда пурсамар татбиқ кардани кулли нишондиҳандаҳои Лоиҳаи дуюми обтаъминкунии шаҳри Душанбе барномаи фаъолияти муштараки ҷонибҳоро тарҳрезию мавриди иҷро қарор хоҳад дод.
Ш. Саидов, котиби матбуотии Раиси шаҳри Душанбе
