22 сентябри соли 2015 сафари кории Президенти мамлакат Эмомалӣ Раҳмон дар ноҳияи Ҳисор аз маросими ифтитоҳи Кохи фарҳанг дар маркази ноҳия оғоз гардид.
Сарвари давлат бо буридани лентаи рамзӣ ба оғози фаъолияти Кохи бошукӯҳи фарҳанг асос гузошт.
Кохи фарҳанг бо 700 ҷойи нишаст бо харҷи қариб 27 миллион сомонӣ маблағҳои ҷумҳуриявӣ дар масоҳати 1,3 гектар аз ҷониби Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон бунёд шудааст.
Дар корҳои сохтмонӣ пудратчӣ- Ҷамъияти дорои масъулияти маҳдуди «Монолит»-и шаҳри Душанбе беш аз сад нафар мутахассисони маҳаллиро ба кор ҷалб кард.
Корҳои сохтмонӣ дар Кохи фарҳанг, ки аз се ошёна иборат мебошад, аз соли 2013 оғоз гардида буд.
Назди бинои Кохи фарҳанг бо гулу гулзор ва фаввораҳо оро дода шуда, ба як гулгашти зебою сайргоҳи сокинону меҳмонони ин гӯшаи дилписанди Тоҷикистон табдил ёфтааст.
Дар Кохи фарҳанг нигористони театрӣ барои нигоҳдории намунаи либосҳои санъаткорон ва дар осорхонаи он бошад, барои созҳои миллии мусиқӣ ҷойи махсус муҳайё карда шудааст.
Толори васеъ ва даромадгоҳи Кохи фарҳанг бо санъати хоси меъмории кандакорӣ ороиш дода шудааст.
Дар таҳхонаи бино ошхона бо 100 ҷой, ҷойи либосҳои театрӣ, толори варзиш, дар ошёнаи дуюм ҳуҷраҳои кории кормандон, кошонаи ҳусн, синфхонаи дӯзандагӣ, утоқҳои машқу тамрин ва дар ошёнаи сеюм маҳфили рассомон, утоқҳои сурудхонӣ мавҷуд аст.
Иттилоъ дода шуд, ки дар Кохи фарҳанг 70 нафар бо ҷойи кори доимӣ таъмин шудаанд.
Зимни шиносоии Сарвари давлат Эмомалӣ Раҳмон аз шароити муосир, ки Ҳукумати мамлакат барои аҳли санъати ноҳия омода кардааст, намоишномаи театрикунонидашуда пешкаш карда шуд.
Президенти мамлакат ба бинокорон барои иҷрои корҳои сохтмонӣ изҳори сипос намуда, ифтитоҳи ин кохи бошукӯҳи фарҳангиро ба аҳли ҳунар муборакбод гуфт.
www.prezident.tj
