18 январи соли 2017 дар Қасри миллат Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ноиби Президенти Бонки ҷаҳонӣ оид ба Аврупо ва Осиёи Марказӣ Сирил Мюллерро ба ҳузур пазируфтанд.
Дар мулоқот вазъ ва дурнамои ҳамкориҳои дуҷонибаи Тоҷикистон ва Бонки ҷаҳонӣ дар соҳаҳои мавриди таваҷҷуҳ баррасӣ шуд.
Дар 23 соли шарикӣ Гурӯҳи Бонки ҷаҳонӣ бо Тоҷикистон дар самтҳои мухталифи рушд, пеш аз ҳама, дар соҳаҳои энергетика, инфрасохтор, кишоварзӣ, иҷтимоӣ, дастгирии Буҷети давлатӣ ва дигар соҳаҳои афзалиятнок ҳамкории манфиатбор ба роҳ монда, дар ин муддат қарзҳои имтиёзнок, грантҳо ва кумакҳои техникии зиёд пешниҳод намудааст. Аз сатҳи ҳамкориҳои дуҷониба изҳори қаноатмандӣ карда шуд ва таъкид гардид, ки дар айни замон лоиҳаҳои фаъоли бонк ба маблағи зиёда аз 350 миллион доллар дар бахшҳои мухталифи иқтисодӣ ва иҷтимоии Тоҷикистон мавриди иҷро қарор доранд.
Ҷонибҳо доир ба татбиқи босамари Стратегияи панҷсолаи ҳамкориҳои дуҷониба, ки пеш аз ҳама, самтҳои рушди бахши хусусӣ, иҷтимоӣ ва тақвияти робитаҳои минтақавиро дар бар мегирад, табодули афкор карда, тарҳрезӣ ва амалисозии лоиҳаҳои пешгирӣ аз хавфи офатҳои табиӣ, барқарорсозӣ ва соҳилмустаҳкамкунии дарёҳои Тоҷикистонро низ дар доираи ин стратегия муҳим арзёбӣ намуданд.
Ҷиҳати идомаи бобарори ҳамкориҳо дар татбиқи Лоиҳаи минтақавии интиқоли неруи барқи «CASA-1000», таҷдиду барқарорсозии Неругоҳи барқи обии «Норак» ва дарёфти маблағҳои иловагӣ дар татбиқи лоиҳаи мазкур, ҳамчунин, рушди нақлиёт ва инфрасохтори роҳ фикру мулоҳизаҳои судманд баён гардиданд.
Дар мулоқот, ҳамчунин, масоили ҳамкории самарабахш дар татбиқи барномаю стратегияҳои рушди миллии Тоҷикистон ва мусоидат ба пешгирии шиддати буҳрони ҷаҳонии молиявию иқтисодӣ мавриди баррасӣ қарор дода шуд.
www.president.tj
